ஜெயமோகனுக்கு ஒரு பகிரங்கக் கடிதம்

தன்னுடைய எழுத்துக்களால் சிறுபான்மை மக்கள் மீதும் இடதுசாரிகள் மீதும் விஷத்தை கக்குவதையே தொழிலாகக் கொண்டிருக்கிற, "பாரத ரத்னா, ஞான பீட விருது" கனவிலிருந்த நேரத்தில் அற்ப "பத்மஸ்ரீ" கொடுத்ததால் அதை நிராகரித்த கொள்கை வீரர் ஜெயமோகனுக்கு நண்பர் கனவுப் பிரியன் முக நூலில் எழுதிய பகிரங்கக் கடிதத்தை இங்கே பகிர்ந்து கொள்கிறேன்.

 

'' கடைசியாக ஒரு இஸ்லாமிய திருமணத்திற்கு நாம் எப்போது அழைக்கப்பட்டிருக்கிறோம்? கடைசியாக நம் விழாக்களில் ஓர் இஸ்லாமியர் எப்போது கலந்துகொண்டிருக்கிறார்? குடும்ப நண்பர்களே காஃபிர்களை அழைக்கலாகாது என்று கட்டுப்பாடு உள்ளது, மன்னித்துவிடுங்கள் என்று நம்மிடம் கோரும் நிலை உருவாகியிருக்கிறது ''
.------- எழுத்தாளர் ஜெயமோகன்.

அன்புள்ள ஜெயமோகன் அவர்களுக்கு,

நேற்று அபுதாபி தமிழ் சங்கத்தின் முக்கிய பதவியில் இருக்கும் வயது மூத்த நண்பர் ஒருவரை சந்தித்து நீண்ட நேரம் பேசும் வாய்ப்பு கிட்டியது.

அவர் நாகர்கோவிலை சேர்ந்த நாடார். ( இந்த வார்த்தையை உங்களுக்காக இங்கே குறிப்பிட வேண்டியுள்ளது என்பதை வருத்தத்துடன் தெரிவித்துக் கொள்கிறேன்.)

நீண்ட காலமாக ஏர் இந்தியாவில் வேலை செய்து பணி ஓய்வு பெற்றவரை ஒரு மருத்துவமனை மேனேஜராக சேர்த்து இன்னும் அவரை வேலை வாங்கிக் கொண்டிருக்கிறது. 

எனக்கு லேசான இருமலுடன் கூடிய காய்ச்சல் அதனால் அவர் இருக்கும் மருத்துவமனை சென்றிருந்தேன். நீண்ட நாட்களாக பார்க்காத அவரையும் சந்தித்து விட்டு வரலாம் என்று எண்ணி. 

அவர் ஒரு என்சைக்ளோபீடியா. (உங்களுக்கு எல்லாம் அப்பன் அவரு. என்ன, அவரு எழுதுறதில்ல அவ்வளவு தான். )

கக்கன் காலம் தொட்டு காங்கிரசில் இருந்து வெளியே வந்த மண்டல் வரை வந்து, முப்தி முஹம்மது செய்யதுக்கு சென்று வி.பி.சிங் தாண்டி ராஜாஜி காலத்தில் சபாநாயகராக இருந்த பிற்படுத்தப்பட்ட நபர் வரை பேசி தீர்த்தார். 

குமரி ஆனந்தன் பற்றியும் மொழிப்போர் தியாகிகளுக்கான கோட்டாவில் டாக்டர் சீட் பெற்ற தமிழிசை பற்றியும் பேச்சு வந்தது. 

கூடவே கண்ணதாசன் பாடல் எழுதக்கூடாது என மறுத்த எம்ஜியாரிடம் " சேரனுக்கு உறவா, செந்தமிழர் நிழலா " எனும் வரிகளை எல்லாம் சுட்டிக்காட்டி " பேசுவது கிளியா பாடலை சேர்த்த கதை கூறி வாலி, நா.காமராசன். புதுமைபித்தன், ஆலங்குடி சோமு என வலம் வந்து 

டைகர் வரதாச்சாரி படத்தில் பிராமணராக நடித்த பிராமண குலத்தை சேர்ந்த சுந்தரராஜன் நீரை வாய் வைத்து குடித்ததையும் கௌரவம் படத்தில் பிராமணர் அல்லாத சிவாஜி அவர்கள் வெளியே செல்லும் போது பூனை குறுக்கே வர, வீட்டின் உள்ளே வந்து " ஜலம் கொண்டாடி " என அண்ணாந்து குடித்ததையும் சுட்டிக்காட்டி சிவாஜி இறந்த போது சுஜாதா குமுதத்தில் எழுதிய " அந்த கண்ணீரில் உண்மை இருந்தது " என்ற வரிகளோடு முடித்தார். 

ப.சிதம்பரத்தின் மாமனார் பற்றி திருவிதாங்கோடு மஹாராஜாவின் முன் கைகட்டி நின்ற பழைய நாடார் சமூகம் பற்றி பிஹார் பற்றி, இப்பொழுதே இந்த நிலை, முப்பது நாற்பது வருடங்கள் முன் எப்படி அடிமைத்தனம் செய்திருப்பார்கள் என வருந்தி ஈ.வே. ராமசாமி என்ற ஒரு ஆள் உண்டாக்கிய சமூக மாற்றம் பற்றி. 

நான் யார் நான் யார் நான் யார் நாலும் தெரிந்தவன் யார் யார் என்ற எம்ஜியார் பாடலை நடு ரோட்டில் வைத்து எழுதியது பற்றி 

14 தொகுதிகளின் சட்டமன்ற உறுப்பினர்களை நிர்மாணிக்கும் தகுதி இருந்தும் ஒரு சீட்க்கு அல்லாடும் முஸ்லிம் சமுதாயம் பற்றி, 

கத்தோலிக்க கல்லூரிகளில் இன்னும் ஊழல் இல்லாமல் இருப்பது பற்றி

லயோலா கல்லூரியில் பிறர் விசுவல் கம்யூனிகேசன் படித்த போது சூர்யாவுக்கு மட்டும் B.Com சீட் கொடுத்தது பற்றி, 

நடிகர் ஜெயசங்கரின் நிறைவேறாத காதல் பற்றி, அந்த சிவகாமி மகனிடம் (காமராசர் ) சேதி சொல்லடி சேரும் ( காங்கிரஸில் ) நாள் பார்க்க சொல்லடி என பாடல் பற்றி

இப்படி அவர் பேசியதை சொல்லிக்கொண்டே போகலாம் இன்னும் ஏராளமாய். என் நினைவில் உள்ளதை கொஞ்சமாய் இங்கே குறிப்பிட்டுள்ளேன். 

ரெண்டு மணி நேரம் பேசிக்கொண்டே இருந்தார் என்னுடன். ஏன் தெரியுமா..?

முஸ்லிமாகிய எனக்கு காய்ச்சல் என்பதால் நாடாராகிய அவர் வீட்டில் அரிசி கஞ்சியும் ரசமும் திடீர் என அவர் மனைவி தயாராக்க ரெண்டு மணி நேரம் தேவைபட்டதால். அதுவும் வெளிநாட்டில். 

அவ்வளவு சீக்கிரம் மதம் என்னும் சொல்லால் மக்களை பிரித்து விடலாம் என எண்ண வேண்டாம். 

மதம் எனும் தீமூட்டி குளிர்காய்ந்த, இப்பொழுது அதே கட்சி மத்தியில் ஆட்சியில் இருந்தும் காணாமல் போன அத்வானியின் புகைப்படம் இருந்தால் அடிக்கடி பார்த்துக் கொள்ளவும்.

பின் குறிப்பு : ஜெயமோகன் மிகப் பெரிய எழுத்தாளர் என்று சொல்லப் பட்டாலும் அவர் சிந்தனைகளில் எப்போதுமே அவர் சிறியவர் என்பதால்   அவர் படத்தை சிறியதாகவே போட்டுள்ளேன்.