நடிகர் திலகம் 3+3

 

 நேற்று நடிகர் திலகம் சிவாஜி கணேசனின் நினைவு நாளன்றே எழுதி இருக்க வேண்டிய பதிவு. வேறு சில பணிகள் காரணமாக இயலவில்லை.

அவரைப் பற்றி புதிதாக  என்ன எழுத?

விபரம் தெரிந்த நாள் முதல் அவர் படங்களை ஆவலாக பார்த்த ரசிகனாக அவர் நடித்த காட்சிகள், பாடல்கள் ஆகியவற்றை மீண்டும் மீண்டும் பார்த்தால் மட்டும் போதுமே!

அனைத்தையும் பகிர்ந்து கொள்ள இந்த தளத்தின் இடம் போதாது என்பதால் மூன்று காட்சிகளும் மூன்று பாடல்களும் பகிர்ந்து கொள்கிறேன்.

கம்பீர நடைக்கு ஓர் உதாரணம்.  தேவேந்திரன் தன்னை வஞ்சிக்க மாறு வேடத்தில் வந்திருப்பதை அறிந்ததும் முகத்தில் காண்பிக்கிற கர்ணன்.

 

பணி ஓய்வை எதிர்பாராததால் எதிர்காலம் பற்றிய பதற்றத்தில் தவிக்கும் பிரெஸ்டீஜ் பத்மநாபன்

 

கிராமந்து வெள்ளந்தியான சாப்பாட்டு ராமன்.

 

இன்றைய இந்தியா உயர்த்திப் பிடிக்க வேண்டிய மத நல்லிணக்கத்தை வலியுறுத்த முத்தான மூன்று பாடல்கள் உங்களுக்காக.

 

திரை இசை திலகம், மெல்லிசை மன்னர்கள், இசை ஞானி என மூவரின் கைவண்ணத்தில் இந்த மூன்று பாடல்கள் அமைந்துள்ளன என்பது இன்னொரு சிறப்பு.

 இப்பதிவுடன் இணைக்கப்பட்டுள்ள புகைப்படங்களே அவர் சிறப்பைச் சொல்லும். ஒன்பது வேடங்களில் தோன்றிய நவராத்திரி படத்தின் காட்சிகளையும் அரசர் வேடத்தில் தோன்றிய காட்சிகளையும் கொஞ்சம் மெனக்கெட்டு தொகுத்திருந்தேன். இவ்வளவு வித்தியாசம் வேறு யார் காண்பித்துள்ளார்கள்!

நடிகர் திலகம் என்றுமே நம் தமிழ் நாட்டின் பெருமை.

இப்போது "பொய்" தேவையில்லை

 

ஒரு மில் எப்படி ஏழு மில் ஆயிற்று? 50 ஏக்கர் எப்படி ஐயாயிரம் ஏக்கராயிற்று? மூன்று லட்சம் மதிப்புள்ள வைர நெக்லஸ் எங்கிருந்து வந்தது? நாம் கணக்கில் சொன்ன பொய். நாம் தொழிலாளிகளிடம் சொன்ன பொய். நாம் வருமான வரியில் சொன்ன பொய்.’

(இன்று தொலைக்காட்சியில் பார்த்த ‘உயர்ந்த மனிதன்’ படத்தில் வரும் வசனம்.)

எங்கள் ஓய்வு பெற்ற அலுவலர் தோழர் ரமணன், முக நூலில் போட்டிருந்த பதிவு அது.

அந்த உணர்ச்சிகரமான காட்சியை முதலில் பாருங்கள்.

"உயர்ந்த மனிதன்" திரைப்படம் வெளியான 1968 காலகட்டத்தில் பொய் சொல்வதன் மூலமாக செல்வந்தர்கள் தங்கள் செல்வத்தை குவித்துக் கொண்டிருந்தார்கள்.

ஆனால்

இப்போது அவர்கள் அப்படி பொய் செல்ல வேண்டிய அவசியம் கிடையாது. அவர்களின் செல்வத்தை பெருக்கும் தரகர்களாக ஆட்சியாளர்கள் மாறி விட்டார்கள்.

முதலாளிகளுக்காக முதலாளிகள் நடத்தும் முதலாளிகள் ஆட்சியில் கொள்கைகள் அவர்களுக்கு சாதகமாகவே வடிவமைக்கப்படுகிறது.

மக்களின் வரிப்பணத்தாலும் உழைப்பாலும் வியர்வையாலும் உருவான தேசத்தின் செல்வாதாரங்களான பொதுத்துறை நிறுவனங்கள் தங்கத் தட்டில் வைத்து தாரை வார்க்கப்படுகிறது.

அத்தியாவசியப் பொருட்கள் சட்டம் நீக்கப்பட்டு பதுக்கல் சட்டபூர்வமாக மாற்றப்பட்டு விட்டது.

பெரு முதலாளிகள் வங்கிகளில் கோடிக்கணக்கில் கடன் வாங்கினாலும் திருப்பிக் கட்ட வேண்டிய அவசியம் கிடையாது. Hair Cut என்ற பெயரில் தள்ளுபடி செய்யப்பட்டு விடும்.

வரி கட்டாமல் ஏய்க்க வேண்டாம். அரசே வசூலிக்கப்படாத வரி என்று ஒற்றை வார்த்தையில் கை கழுவி விடும்.

ஆக, இன்றைய காலகட்டத்தில் பொய் சொல்ல வேண்டிய அவசியத்தை முதலாளிகளுக்கு ஆட்சியாளர்கள் உருவாக்கவில்லை.

இந்த அநீதிக்கு எதிராகத்தான் நாளை மறு நாள், 26, நவம்பர், 2020 அன்று கோடிக்கணக்கான தொழிலாளர்கள்,

மத்தியரசின் பொருளாதாரக் கொள்கைகள் மாற்றப்பட வேண்டும் என்று அகில இந்திய வேலை நிறுத்தம் நடத்தவுள்ளனர்.

மாறும்.

அனைத்தும் நிச்சயம் மாறும்.

புதிதாய் அவரைப் பற்றி என்ன எழுத?

இன்று நடிகர் திலகத்தின் பிறந்த நாள். தமிழகத்தின் பெருமை மிகு கலை அடையாளமான அவரைப் பற்றி புதிதாக என்ன எழுதலாம் என்று யோசித்த போது ஓய்வு பெற்ற எங்கள் கோட்ட மேலாளர் திரு வி.சுப்ரமணியன் அவர்கள் பகிர்ந்து கொண்ட பதிவு கண்ணில் பட்டது.

அதனை இங்கே பகிர்ந்து கொண்டிருக்கிறேன்.

கீழே உள்ள படங்கள் பல சந்தர்ப்பங்களில் நான் தொகுத்தது. 

அதிலே முதல் படத்தில் நடிகர் திலகம் போட்ட ராஜா வேடங்கள் மட்டுமே.

 *வாழும் நடிகர்திலகம்.* 🌺

(படித்ததை பகிர்கிறேன்)

கர்ணன் ஒருநாள் கனவில் வந்தான். யாரந்த சிவாஜிகணேசன் என்றான்

ஏன் எனக்கேட்டதற்கு, கர்ணனாக அவர் நடித்த அந்த படத்தை நானும் பார்த்தேன். நானும் அந்த படக் கர்ணன் மாதிரி கம்பீரமாக முயற்சிப்பதாக சொல்லி மறைந்தான்.

கட்டபொம்மன் பின்னொரு நாளில் இது போலவே கனவில் வந்தான்.

அவன் சொன்னான். அந்த சிங்கத்தமிழனின் தங்கத்தமிழ் என் நாவில் தவழ என்ன செய்யனும் எனக் கேட்ட அவனே, நான் சொல்வதற்குள் அது சாத்தியமில்லை எனச் சொல்லிச் சென்றான்.

ராஜராஜசோழன் வந்தான். சிவாஜி ராஜபரம்பரையைச் சேர்ந்தவரா என்று எடுத்தவுடனே கேட்டான். முகத்தில் ராஜகளையும், அந்த கம்பீரநடையும் தனக்கே வரவில்லையே பிறகு அவருக்கு எப்படி? பிறந்தபோது லட்சுமியின் ஐஸ்வர்யம் இல்லை ஆனால் கலைவாணியின் முழு வரமும் பெற்று பிறந்தவர் என்றேன் நான்.

கப்பலோட்டிய தமிழன் அய்யா சிதம்பரம் ஒருநாள் வந்தார். இருக்கும்போது தன்னை உணராதவர்கள், இப்போது கொஞ்சமாவது உணர்ந்ததெப்படி என்ற ஆச்சரியம் அவருக்கு. நிஜத்தை உணராதவர்கள் நிழல் கண்டாவது கொஞ்சம் உணர்ந்தார்களே என்ற மகிழ்ச்சி எனக்கு.

யாமறிந்த மொழிகளிலே தமிழைப்போல் எங்கும் காணோம் என்று முழங்கிய முண்டாசுகவி பாரதி வந்தான். யாமறிந்த வகையில் எம்தமிழை சிவாஜிபோல் உச்சரிப்பவர் எவருமில்லை என்றான். ஆச்சரியமில்லை எனக்கு.

அப்பர் திருநாவுக்கரசர் வந்தார். உச்சரிப்பு சுத்தம் என்றால் சிவாஜிதான். அவர்தான் திருவருள் பெற்ற ‘திருநா’வுக்கரசர் என்றார். ஆமோதித்தேன்.

காக்கும் கடவுள் சிவபெருமான் வந்தார். கண்களில் கலவரம் அவருக்கு. என்ன என்பதற்குள் அவரே சொன்னார். திருவிளையாடல் படம் பார்த்தேன். அதில் வரும் சிவாஜியைப் பார்த்து என்னை அறியாமல் நானே வணங்கிவிட்டேன். தன்னைத் தானே மறந்தது கலவரமாகிவிட்டது அவருக்கு. தன்னில் பாதியான உமையவளின் சக்தி முழுக்கவும், பிரம்ம பத்தினி சரஸ்வதி அவர் நாவிலும், திருமாலின் நாயகி லட்சுமி அவர் முகத்திலும் குடிகொண்டிருப்பதும் அப்போதுதான் புரிந்தது சிவனுக்கு.

பகத்சிங் வந்து ஒன்றும் சொல்லாமல் நான் சுவற்றில் மாட்டியிருந்த நடிகர்திலகத்தின் படத்தைப் பார்த்து தன் *தொப்பியைக் கழற்றி முதுகை முன் வளைத்து மறைந்தான்.*

இன்னும் இன்னும் சரித்திர நாயகர்களும், புராண புருஷர்களும் வந்து பார்த்தார்கள். ஒவ்வொருவருக்கும் ஒவ்வொரு விதவிதமான ஆச்சரியம்.. ஆனால் சித்திரகுப்தன் கவலைதான் விசித்திரம் எனக்கு.

மேலே, ஆயுள் கணக்கு தணிக்கையில் (Audit) பயங்கர பிரச்னையாம் சித்திரகுப்தனுக்கு. பிறக்காத மனிதர்கள் இறக்காமல் தமிழகத்தில் வாழ்வது எப்படி என்றும், கணக்கில் கோட்டை விட்டதாகவும் தணிக்கை அறிக்கையில் புகார் சித்திரகுப்தன் மீது. முதலில் எனக்கு புரியவே இல்லை. பிறகு அவன் பெயர்களை சொல்லி விசாரித்தபோதுதான் உணர்ந்தேன் நடிகர்திலகத்தின் உன்னதம் எத்தகையதென்று.

அவன் குறிப்பிட்ட பெயர்களில் சில..... பிரஸ்டீஜ் பத்மநாப அய்யர், பாரிஸ்டர் ரஜினிகாந்த், அழகாபுரம் ஜமீன் சின்னதுரை ஆனந்த், ராஜபார்ட் ரங்கதுரை, பர்மா குணசேகரன், மனோகரன், படிக்காதமேதை ரங்கன், பாசமலர் ராஜசேகர், சிக்கல் சண்முகசுந்தரம் நீள்கிறது பட்டியல்....

சித்திரகுப்தனுக்கு சமாதானம் கூறினேன். நீங்கள் எதுவும் குறிப்பில் தவறு செய்யவில்லை என்றேன். அவரை மகிழவிடவில்லை நான். தொடர்ந்தேன். தணிக்கை அறிக்கையும் சரிதான் என்றேன். குழப்பம் அதிகமானது அவருக்கு. கதாபாத்திரமாகவே மாறிவிடுவதுதானே நடிகர்திலகத்தின் திறன். *விளங்காத அதியசமே நடிகர்திலகம் சிவாஜிதான்.*

வாழ்ந்து மறைந்தவர்களே நேரில் வந்தாலும் நாங்கள் ஒத்துக்கொள்ள மாட்டோம் நடிகர் திலகம் போல் இல்லையென்று.

இந்த பூமியில் *பிறக்காத பலரை இறக்காமல் வாழவிட்டதுதான்* நடிகர்திலகத்தின் விந்தை.

🌼 *எட்டாத அதிசயம் நீ* 🌼

🌺 *வாழ்க நடிகர் திலகம் புகழ் ! வாழியவே !* 🌺

சிவாஜி - சிவாஜி

காக்கா முட்டை திரைப்படத்தில் ஒரு குடிம்கன் 'ராமன் எத்தனை ராமனடி'  திரைப்படத்தில் சத்ரபதி சிவாஜியாக நடிகர் திலகம் சிவாஜி கணேசன் பேசும் வசனத்தை பேசுவதாக ஒரு காட்சி வரும்.

ஆண்டுகள் பல கடந்தாலும் இன்னும் நிலைத்திருக்கும் காட்சியை இங்கே கண்டு களியுங்கள்  

கவியரசு கண்ணதாசனின் வசனத்திற்கு நடிகர் திலகம் உயிர் கொடுத்திருப்பார்.

சிவாஜியின்  கம்பீரம் அற்புதமாக வெளிப்படும் காட்சி இது.

எனக்கு மிகவும் பிடித்த காட்சியும் இது. 

உழைப்பவர்களுக்கான உரிமையை மறுப்பதென்பது இன்னும் மாறாமல் இருப்பது ஒரு பெருந்துயரம்.

நல்ல வேளை, இந்த கண்றாவியைப் பார்க்க அவர்கள் உயிரோடு இல்லை!

ஞாயிற்றுக் கிழமையன்று  “வேலையில்லா பட்டதாரி” படம் பார்க்க சென்றிருந்தோம். அதன் விமர்சனம் நாளை எழுதுகின்றேன்.

திரைப்படத்திற்கு முன்பாக ஒரு விளம்பரப் படம். ஜெ வின் மூன்றாண்டு கால சாதனையைப் பாராட்டி மனோபாலா, சின்னி ஜெயந்த் ஆகியோரை வைத்து எடுத்துள்ளார்கள்.

திருவிளையாடல் தருமி காட்சியை அடிப்படையாகக் கொண்டு எடுத்த விளம்பரப் படம். நாகேஷாக மனோ பாலாவும் நக்கீரனாக சின்னி ஜெயந்தும். சிவாஜியிடம் நாகேஷ் கேள்வி கேட்பதையும் நக்கீரனிடமே கேட்பதாக மாற்றியிருந்தார்கள்.

தமிழக திரை வரலாற்றில் ஒரு முக்கியமான காட்சியை கொலை செய்து ஜெயலலிதா புகழ்பாட எப்படித்தான் மனது வந்ததோ? கொஞ்சம் மனசாட்சி இருந்ததால் சிவாஜி கேரக்டரை விட்டு விட்டார்கள் போல.

நல்ல வேளை இந்த கண்றாவிக் காட்சியைப் பார்க்க ஏ.பி.நாகராஜன், சிவாஜி கணேசன், நாகேஷ் உயிரோடு இல்லை.

இனிமையான பாடல்களோடு தேசிய விருது காமெடியையும் ரசியுங்கள்

உலகக் கோப்பை கால்பந்து போட்டிகளின் இறுதி ஆட்டம் இரவு 12.30 மணிக்குத்தான் தொடங்கியதல்லவா! அதுவரை தூக்கம் வராமல் இருப்பதற்காக நான் பார்த்துக் கொண்டிருந்த சில பாடல்களை இங்கே பகிர்கிறேன். 

இனிமையான பாடல்களோடு கடைசியில் ஒரு காமெடி பாடலும் உள்ளது. அதையும் தவறாமல் பாருங்கள்

 

சிவாஜி கணேசனின் கம்பீரம், பத்மினியின் நளினமான நடனம் இவற்றை மகாபலிபுரம் சிற்பங்களின் பின்னணியில்  அழகு தெய்வம் மெல்ல நடந்து வரும் போது  கண்டு ரசியுங்கள்  

இந்த கம்பீரம் நிஜமான அரசர்களிடம் கூட இல்லாதது. சிவாஜியால் மட்டுமே சாத்தியம். பத்மினியின் துள்ளல் நடனத்தை இந்த மன்னவனோடு    நீங்களும் ரசிப்பீர்கள்.

மீண்டும் ஒரு சிவாஜி பத்மினி பாடல், கோவலனும் மாதவிப் பொன் மயிலாள் இப்படித்தான்  சீண்டிக்கொண்டே இருந்திருப்பானோ? அதனால்தான் அவளும் அவனை வெறுப்பேற்றி வெளியேற்றிருப்பாளோ? 

அருகில் இருந்தும் பேச முடியாத தவிப்பை என்று நலம்தானா?பாடல் வரிகளால் பத்மினி வெளிப்படுத்த விழிகளால் சிவாஜி ஆறுதல் சொல்வதை   பார்த்து ரசியுங்களேன்.

மதுரை பொன்னுசாமி, சேதுராமன் இசைக்கு  இங்கே  சிவாஜி கணேசன் தன் அற்புதமான ஆற்றலால்  உயிர் கொடுத்திருப்பார்.

மாளிகைக்குள் நுழைய முடியாத ரசிகர்களுக்காக அவர் வாசிக்க       வெளிநாட்டவரும் தேடி வந்து ரசிப்பதை நீங்களும் ரசிப்பீர்கள்.

தேனோடு கலந்த இனிய இசையை நிஜ வாழ்விலும் இணைந்த தம்பதியர்   வழங்க நாமும் கொஞ்சம் மெய்மறந்து போவோம்.

எல்லாமே  இனிய பாடல்களாக இருந்தால் திகட்டி விடுமல்லவா? ஆகவே இந்த காமெடிப் பாடலையும் பாருங்கள். இந்த நடிப்பிற்குத்தான் தேசிய விருது தரப்பட்டது என்பது பாடலை விட மிகப் பெரிய காமெடி. 

நடிகர் திலகம் சிவாஜி கணேசனின் சோதனைக்காலம்

நேற்று சிறிது நேரம் தொலைக்காட்சி முன்பு அமர்ந்து ரிமோட்டில் சேனல்களை மாற்றி வருகையில் ஏதோ ஒரு சேனலில் நடிகர் திலகம் சிவாஜி கணேசன் நடித்த சந்திப்பு திரைப்படம் ஒளிபரப்பிக் கொண்டிருந்தார்கள். அது கொஞ்சம் நினைவுகளை கிளறி விட்டது.

கல்லூரி இரண்டாம் ஆண்டின் முதல் நாள் அது. விடுதி வாழ்வின் முதல் நாளும் கூட. ஏனென்றால் முதல் வருடம் என் அக்காவின் மாமனார் வீட்டிலிருந்து கல்லூரிக்கு சென்று வந்திருந்தேன். காலையில் நெய்வேலியிலிருந்து மதுரை திருவள்ளுவர் பஸ் நிலையத்தில் இறங்கி டீ சாப்பிடும்போதே தினத்தந்தி கடைசி பக்கம் முழுவதுமே சந்திப்பு திரைப்படத்தின் விளம்பரம்தான். பிரம்மாண்டமான செட்டிங்கின் வண்ணப்படம் ஆவலைத் தூண்டியது.

வகுப்பு முடிந்ததும் அவசரம் அவசரமாக சினிப்ரியா தியேட்டர் நோக்கி புறப்பட்டோம். அந்த ப்ரியா காம்ப்ளெக்ஸ் கோன் ஐஸ் நன்றாகவே இருக்கும். ஒவ்வொரு நாளுக்கு ஒரு சுவை. இன்று என்ன ஃப்ளேவர் ஐஸ்க்ரீம் என்று பார்த்தெல்லாம் அந்த தியேட்டருக்கு சினிமா பார்க்க போன காலம் அது. (இப்போதும் அந்த சுவை உள்ளதா என்பதை மதுரைக்காரர்கள்தான் சொல்ல வேண்டும்)

“ஆனந்தம் விளையாடும் வீடு, நான்கு அன்பில்கள் குடி கொண்ட கூடு” என்ற அருமையான பாடலோடு ஆரம்பம் என்னமோ நன்றாகத்தான் இருந்தது. ஆனால் அதற்குப் பிறகுதான் சோதனை தொடங்கியது. ஸ்ரீதேவி டிஸ்கோ ஆட, அதற்கு நட்சத்திர ஹோட்டல் சர்வரான சிவாஜி கணேசனும் டிஸ்கோ மூவ்மெண்ட் கொடுத்துக் கொண்டே சர்வ் செய்ய சிக்கிக் கொண்டோம் என்பது மட்டும் புரிந்தது. உத்தம புத்திரன் யாரடி மோகினி பாட்டுக்கான அவரது நடன அசைவுகளை இன்னும் ரசிக்க முடிகிறது. ஆனால் சந்திப்பு? அதிலும் க்ளைமேக்ஸில் சிவாஜி, பிரபு, சரத்பாபு, ஸ்ரீதேவி, ராதா, மனோரமா ஆடும் “ஷோலாபூர் ராஜா” பாட்டை முழுமையாக பார்க்க முடிந்ததென்றால் நீங்கள் நிச்சயம் பொறுமைசாலி, தைரியசாலி.

அந்த காலக்கட்டத்தில் இரு மேதைகள், தராசு, சிம்ம சொப்பனம் என்று சோதனை தந்த இன்னும் சில படங்கள் கூட உண்டு. மற்ற நண்பர்கள் ப்ரூஸ் லீ யின் பிக் பாஸ் படம் பார்க்க நானும் இன்னொரு நண்பனும் மட்டும் எதிரில் இருந்த லட்சுமி தியேட்டரில் தராசு படத்திற்கு போய் மாட்டிக் கொண்டோம். அது சிவாஜி கணேசனுக்கான சரியான பாத்திரங்களை தராத இயக்குனரின் தவறா இல்லை தவறான பாத்திரங்களை தேர்ந்தெடுத்த சிவாஜி அவர்களின் தவறா என்று பட்டிமன்றமே நடத்தலாம்.

ஆனாலும் அது சோதனைக் காலம்தான். அவருக்கும் ரசிகர்களுக்கும்.

(தோழர் சாய் ஜெயராமனும் இதை ஒப்புக் கொள்வார் என்று நம்புகிறேன்)

பார்க்க, கேட்க சிவாஜி கணேசன், கேட்க மட்டுமே எம்.ஜி.ஆர்

இன்று நான் சினிமா பற்றி மட்டுமே எழுதப் போகிறேன்.

கடந்த சில நாட்களாக இரவு பத்து மணிக்கு மேல் முரசு டி.வியில் காலத்தால் அழியாத பல நல்ல பாடல்களை பார்த்து வருகிறேன். சுகமான அனுபவமாக அது உள்ளது.

அதிலும் நடிகர் திலகம் சிவாஜி கணேசனின் பாடல்களை பார்ப்பதும் கேட்பதம் எவ்வளவு இனிமையாக உள்ளது! காதல் பாடல்களாக இருந்தாலும் சரி, சோகப் பாடல்களாக இருந்தாலும் சரி அவர் காண்பிக்கிற முக பாவத்திற்கு ஈடு இணையாக இன்னொருவர் இன்னும் தோன்றவே இல்லை.

தில்லானா மோகனாம்பாள் படத்தில் வரும் நலந்தானா பாடலை எல்லோரும் சிலாகிப்பார்கள். நானும் கூட. அதிலே குறிப்பாக ஒரு இடம். “ புண் பட்ட சேதியைக் கேட்டவுடன், இந்த பெண் பட்ட பாட்டை யாரறிவார் ? “ என்று பத்மினி ஆடிக்கொண்டே பாட, இவர் நாகஸ்வரத்திலும் கண்களாலும் “ நானறிவேன் “ என்று பதில் சொல்வார். உடனே பாலையா நெகிழ்ந்து போய் சிவாஜியை தட்டிக் கொடுப்பார்.

இதை விட இன்னொரு இடம் எனக்கு மிகவும் பிடித்திருந்தது.

படத்தின் தொடக்கத்தில் சிவாஜி கணேசனும் ஏ.வி.எம்.ராஜனும் தியாகராஜரின் நகுமோ கீர்த்தனையை வாசித்துக் கொண்டிருப்பார்கள். அப்போது பத்மினி மாட்டு வண்டியில் வந்து இறங்குவார். உடனே சிவாஜி நாகஸ்வரம் வாசித்துக் கொண்டே பாலையாவிடம் கண் ஜாடை காண்பித்து வாசலைப் பார்க்கச் சொல்வார். அவரும் பார்த்து விட்டு சூப்பர் என்பது போல கண்களிலேயே பதில் சொல்வார். அதற்குப் பிறகு சிவாஜியின் வாசிப்பிலும் ஒரு துள்ளல் தெரியும். கண்டதும் காதல் போலும். 

அந்தக் காட்சியின் இணைப்பை இங்கே  அளித்துள்ளேன்.

நீங்களும் பார்த்து ரசியுங்கள். 

சான்ஸே இல்லை, சிவாஜி இஸ் கிரேட்..

இரண்டு தினங்கள் முன்பாக சென்னை சென்று காரில் திரும்பும்போது சிவாஜியின் பாடல்கள்தான் கேட்டுக் கொண்டு வந்தேன். பாடல்களை கேட்கும்போது கண் முன்னே சிவாஜிதான் தெரிந்தார்.

அதே சமயம் இன்னொரு அருமையான பாடலான கொஞ்சும் சலங்கை சிங்கார வேலனே தேவா வில் சிவாஜி கணேசன் போன்ற சிறந்த நாகஸ்வர வித்வானாக ஜெமினி கணேசனின் நடிப்பு இல்லை என்பதையும் அப்பாடலில் சாவித்ரியிடம் இருந்த இயல்பும் கூட  ஜெமினியிடம் இல்லை என்பதையும் நீங்கள் ஒப்புக் கொள்வீர்கள்.

எந்த வில்லங்கமும் இல்லாமல் இந்த பதிவை முடிக்க மனம் வரவில்லை.

சிவாஜியின் பாடல் பார்க்கவும் கேட்கவும் இனிமை.

ஆனால் எம்.ஜி.ஆர் பாடல்கள் கேட்க மட்டும்தான் இனிமை.

ரொமான்ஸ் பாடல்களில் எம்.ஜி.ஆரின் முகத்தைப் பார்த்தால் காமெடி காட்சி போல சிரிப்பு வந்து விடுகிறது. பாஸ் என்கிற பாஸ்கரனில் சந்தானம் எவ்வளவோ சொல்லிக் கொடுத்தும் ரொமான்ஸ் முகபாவம் வராத ஆர்யா போலத்தான் எல்லா பாடல்களில் எம்.ஜி.ஆர் தெரிகிறார்.

அவருக்கு தேசிய விருது அளிக்கப்பட்ட ரிகஷாக்காரன் படத்தை ஒரு முறை பார்க்கும் துர்பாக்கியம் கிடைத்தது. ஆனால் அதை காமெடி படமாக நினைத்து சிரித்து மகிழ்ந்தேன் என்பது வேறு விஷயம்.