Sunday, April 5, 2020

பாலத்திற்குள் சிக்கி பரிதவித்தவர்கள்

இன்று காலை செய்தித்தாள் வர கால தாமதமானதால் பழைய இதழ்களை புரட்டிக் கொண்டிருந்தேன். அப்போது கண்ணில் பட்ட செய்தி கீழே உள்ளது.




மிசோரமைச் சேர்ந்த 26 பேர், அதிலே 11 பேர் குழந்தைகள், மியன்மரில் உள்ள தங்கள் உறவினர்களைப் பார்க்க அனுமதி பெற்று சென்றுள்ளனர். ஊரடங்கு பற்றிய அறிவிப்பு வந்ததும் வீடு திரும்பியுள்ளனர். மியன்மர் எல்லையில் இருந்த தொங்கும் பாலத்திற்குள் அவர்கள் நுழைந்ததும் மியன்மர் எல்லைக்காவல் படை தங்கள் எல்லைப் பக்கத்தில் இருந்த கதவுகளை பூட்டி விட்டது.

பாலத்தின் இன்னொரு புறத்தில் இருந்த இந்தியாவின் துணைக்காவல் படையான அஸ்ஸாம் ரைபிள்ஸ் அவர்கள் இந்தியாவிற்குள் நுழைய முடியாதபடி பாலத்தின் இந்தியப்பக்கத்தை மூடி விட்டது.

இரண்டு இரவுகளுக்கு மேலாக அவர்கள் இந்தியாவிற்குள்ளும் வர முடியாமல் மியன்மருக்கும் திரும்ப முடியாமல் உணவு, தண்ணீர் இல்லாமல் குளிரில் நடுங்கி மிகப் பெரிய இன்னலை சந்தித்துள்ளனர்.

மிசோரம் முதல்வரின் தலையீட்டுக்குப் பிறகே பாலத்தின் கதவுகள் திறக்கப்பட்டுள்ளன.

மோடியின் அவசர கதியிலான அறிவிப்பால் இது போல எத்தனை பேர் எத்தனை விதமான துன்பங்களை அனுபவிக்கின்றனறோ?


Saturday, April 4, 2020

மோடி முன் கூட்டி சொன்னதனால் . . .



ஊரடங்கு உத்தரவுக்கு நான்கு மணி நேர அவகாசம் கொடுத்த மோடி விளக்கு ஏற்றுவதற்கு மட்டும் ஐம்பது மணி நேரத்திற்கு முன்பே தகவல் சொல்கிறார் என்று ஒரு விமர்சனம் பார்த்தேன்.

அது சரியானதுதான்.

அந்த நான்கு மணி நேர அவகாசம் என்பதுதான் இன்று கோடிக் கணக்கான தொழிலாளர்களின் வாழ்வில் இருளைக் கொண்டு வந்து சேர்த்துள்ளது. அந்த இருளைப் போக்க வழி செய்யாமல் விளக்கேற்று என்ற அறிவிப்பு எல்லாம் வெறும் நாடகத்தனம். ஆட்சியாளர்களின் தோல்வியிலிருந்து மக்களை  கவனத்தை திசை திருப்பும் கேவலமான உத்தி. 

ஆகவே மோடி அறிவித்துள்ள்படி நாளை இரவு எரியும் விளக்குகளை அணைக்கவும் மாட்டேன். ஒன்பது நிமிடங்களுக்கு அகல் விளக்கோ, மெழுகு வர்த்தியோ, செல்போன் லைட்டோ, டார்ச் லைட்டோ காண்பிக்க மாட்டேன்.  போட்டோ எடுத்து வாட்ஸப்பிலும் முக நூலிலும் போட்டு விளம்பரம் செய்து கொள்பவர்கள் வேண்டுமானால் மோடியின் நாடகத்தின் கதாபாத்திரங்களாக மாறிக் கொள்ளட்டும்.

ஆனால் இந்த முறை ஐம்பது மணி நேர அவகாசம் கொடுத்தது நல்லதாய் போயிற்று.

இந்த ஒன்பது நிமிட கூத்தின் விளைவுகளை மின் வாரிய பொறியாளர்கள் உணர்ந்து எச்சரித்துள்ளனர்.

ஏற்கனவே தொழிற்சாலைகளுக்கான மின் வினியோகம் என்பது இல்லாத சூழலில் ஒன்பது நிமிடங்கள் அனைத்து விளக்குகளையும் அணைத்து மீண்டும் எரிய விடுகிற போது ஏற்படுகிற திடீர் அழுத்தம் காரணமாக மின் தடை ஏற்பட்டு மின் வினியோகம் பாதிக்கப்பட்டு இயல்பு நிலை திரும்ப நீண்ட  காலம் எடுக்கும் என்று எச்சரிக்கிறார்கள். வட கிழக்கு மாநிலங்களில் இது போன்ற நிலை 2012 ல் ஏற்பட்ட போது மீண்டும் மின்சார வினியோகம் தொடங்க இரண்டு நாட்கள் என்ற வரலாற்றுத்தகவலை பகிர்ந்து கொண்டுள்ளார் ஃப்ரண்ட் லைன் ஆசிரியர் தோழர் விஜயசங்கர் ராமச்சந்திரன்.

தயார் நிலையில் இருக்குமாறு அனைத்து ஊழியர்களுக்கும் அதிகாரிகளுக்கும் சுற்றறிக்கை அனுப்பியுள்ளது தமிழ்நாடு மின்சார வாரியம்.



ஃப்ரிட்ஜ், ஏ.சி போன்றவை இயங்கிக் கொண்டு இருக்கட்டும் என்று அவர்கள் அறிவுறுத்துகிறார்கள்.

நல்ல வேளை மோடி முன் கூட்டியே சொன்னதால் அதை சமாளிக்க மின் வாரியம் தயாராகி விட்டது. 

இல்லையென்றால் விளக்கேற்றிய பின்பு இந்தியாவை மீண்டும் இருள் சூழ்ந்திருக்கும்.

அதெப்படி மோடி தேர்ந்தெடுப்பது எல்லாமே தேவையற்ற ஆணியாகவே இருக்கிறது!!!!

பாவம்டா. நாசாவை விட்ருங்க . . .



நாசா, அமெரிக்காவின் விண்வெளி ஆராய்ச்சி அமைப்பு. ஐம்பது வருடங்களுக்கு முன்பே நிலவுக்கு மனிதனை அனுப்பிய அமைப்பு. 

அந்த அமைப்பை சங்கிகள் போல யாரும் இழிவு செய்து விட முடியாது. இவர்களின் அபத்தமான பொய்ப் பிரச்சாரங்களுக்கெல்லாம் நாசாவை இழுத்து நாசாவே சொல்லி விட்டது என்று சொல்லி அதற்கு அறிவியல் சாயம் பூச வேறு முயற்சித்துக் கொண்டே இருக்கிறார்கள்.



திருநள்ளாறு கோயிலை கடக்கையில் செயற்கைக் கோள்கள் எல்லாம் ஒரு நொடி செயலிழக்கிறது, அதுதான் சனி பகவானின் சக்தி என்பதை ஆராய்ந்து நாசாவே ஆடிப் போய் விட்டது என்று கதை விடத் தொடங்கினார்கள்.

சூரியனின் ஒலியை நாசா பதிவு செய்துள்ளது. அது ஓம் என்று ஒலிக்கிறது என்ற கதையை முன்னாள் காக்கிச்சட்டையும் இந்நாள் சங்கியுமான கிரண் பேடியே பரப்பினார்.



அடுத்து கைதட்டலுக்கும்  இது ஒரு அபாரமான மூளை என்று நாசாவே  சொல்லி விட்டதாக கதை விட்டார்கள்.



அடுத்து நாளை விளக்கேற்றுவதற்கும் நாசாவின் சான்றிதழை வெளியிட்டுள்ளார்கள்.



அடேய்களா, நாசா அறிவியல்பூர்வமாக செயல்படும் அமைப்பு. உங்களின் அபத்தங்களுக்கெல்லாம் நாசாவை துணைக்கு அழைக்க வேண்டாம்.

பாவம் அதை விட்டு விடுங்கள்.


வடிவேலுவும் கிரிக்கெட் ரசிகர்களும்


குடிப்பழக்கத்தை நினைத்துக் கூட பார்க்கக் கூடாது என்று மருத்துவரிடம் அறிவுரை வாங்கி வரும் வடிவேலை அவர் கண்ணில் படுபவர்கள் எல்லாம் வெறுப்பேற்றுகிற காமெடி காட்சி நினைவில் உள்ளதா?

அக்காட்சியின் யூட்யூப் இணைப்பு இங்கே

அக்காட்சியை அப்படியே கிரிக்கெட் ரசிகர்களின் இன்றைய மன நிலைக்கு ஏற்றார் போல வடிவமைத்துள்ளார்கள். (அனுப்பி வைத்தது என் மகன்) 

வடிவேலு இல்லையென்றால் மீம்களே கிடையாது போல . . .






Friday, April 3, 2020

மோடி பக்தர்களோடு வாதிடுவது?????



ஃப்ரண்ட் லைன் ஆசிரியர் தோழர் விஜயசங்கர் ராமச்சந்திரன் அவர்களின் முக நூல் பதிவு



மோடி பக்தர்களிடம் விவாதிப்பது புறாவுடன் செஸ் விளையாடுவது போலத்தான். அது காய்களைத் தட்டி விடும். அட்டையின் மீது எச்சமிடும். கடைசியில் வெற்றி பெற்றது போல் பீற்றி நடக்கும்.

இதைச் சொன்னவர் வினோத் துவா. ஒரு காலத்தில் பிரனாய் ராயுடன் இணைந்து தொலைக் காட்சியில் அபாரமாக தேர்தல் முடிவுகளை ஆய்வு செய்தவர்.

மகாத்மா சொன்னதையாவது சொல்லியிருக்கலாமே மோடி



15.08.1947 அன்று இந்தியா விடுதலை பெற்று சுதந்திர தினம் கொண்டாடப் பட்ட நேரத்தில் மகாத்மா காந்தி டெல்லியில் இல்லை. பிரிவினையை ஒட்டி நடைபெற்ற கலவரங்களை கட்டுப்படுத்த கல்கத்தா சென்றிருந்தார்.

15.08.1947 அன்று மக்களுக்கு என்ன சொல்ல விரும்புகிறீர்கள் என்று அவரை பத்திரிக்கையாளர்கள் கேட்ட போது 

"ஒன்றுமில்லை"

என்று பதிலளித்துள்ளார்.

கொரோனா வைரஸ் பரவல் தொற்று இந்தியாவில் எந்த அளவில் உள்ளது?

கட்டுப்படுத்துவதற்கு இதுவரை எடுக்கப்பட்டுள்ள நடவடிக்கைகள் போதுமானதாக உள்ளதா?

நிலைமையில் முன்னேற்றம் உள்ளதா அல்லது மோசமாகி உள்ளதா?

அடுத்த கட்ட நடவடிக்கைகள் என்ன?

போதுமான மருத்துவ உபகரணங்கள் நாடு முழுதும் சீராக உள்ளதா?

ஊரடங்கு உத்தரவு ஏப்ரல் 14 க்குப் பிறகும் தொடருமா?

வாழ்வாதாரம் இழந்து நிற்கும் தொழிலாளர்களுக்கு அரசு என்ன செய்யப் போகிறது?

மூன்று மாத இ.எம்.ஐ தள்ளி வைப்பு என்ற பெயரில் நிவாரணத்திற்குப் பதிலாக தண்டனை வழங்கப்பட்டுள்ளதே, அதை அரசு மாற்றி அமைக்கப் போகிறதா?

பிரதமர் நிவாரண நிதி என்று ஏற்கனவே ஒரு நிதி உள்ள போது புதிதாக உருவாக்கப்பட்டுள்ள பிஎம்-கேர்ஸ் நிதி பற்றி எண்ணற்ற ஐயங்கள் எழுப்பப்பட்டுள்ளதே, அது பற்றிய விளக்கம் என்ன?

ஒரு பிரதமர் மக்களிடம் உரையாற்றினால் இந்த கேள்விகளுக்கு பதில் அளிப்பதுதான் பொருத்தமாக இருக்கும்.

அதற்கெல்லாம் பதில் இல்லையென்றால் அல்லது பதில் சொல்வது சங்கடமான ஒன்றாக இருந்திருந்தால் மகாத்மா காந்தி போல "ஒன்றுமில்லை" என்றாவது சொல்லியிருக்க வேண்டும்.

அதை விடுத்து 

"விளக்கேற்று, டார்ச் அடி, செல்போன் லைட் காண்பி"

என்று சொல்வதெல்லாம் பிரதமரின் வேலை அல்ல. இந்த சமயத்தில் அதெல்லாம் பொருத்தமும் அல்ல.

அப்படி சினிமாத்தனமான அறிவிப்புக்களை மட்டுமே அவரால் செய்ய முடியும் என்றால் அவரை கலாய்ப்போம், நக்கலடிப்போம், கழுவி கழுவி ஊற்றுவோம். 

ஏனென்றால் 

அவை பொறுப்பற்ற மனிதனின் பொறுப்பற்ற செய்கைக்கான எதிர் வினை. அவ்வளவுதான்.

கண்ணாடியை திருப்பினா ஆட்டோ ஒடாது மோடி . . . 


சிவ கார்த்திகேயன் பாணியில் மோடி




வேலைக்காரன் சினிமால சிவகார்த்திகேயன் கிளைமேக்ஸ்ல அவர் கருத்தை ஏற்கும் மக்கள் இரவு 12 மணிக்கு லைட் போடுங்கன்னு ரேடியோவில சொல்வார்.

அப்படி 12 மணிக்கு மக்கள் லைட் போடும் போது தியேட்டரில் கைதட்டல் எழும்.

பாவம் மோடியும் அதையேதான் ஞாயித்துக்கிழமை ஒம்போது மணிக்கு விளக்கேத்துங்கன்னு சொன்னாரு. அதைப் போய் இப்படி நக்கலடிக்கலாமா?

இது நியாயமா? தர்மமா? உங்களுக்கெல்லாம் மனசாட்சியே கிடையாதா

! ஆட்சிங்கறது சினிமா கிடையாதா

அட ஆட்சி சினிமாவா இல்லாம இருக்கலாம். ஆனா மோடி நடிகர்தானே! அவரைப் போய் பிரதமரா பொறுப்பா இருங்கன்னு சொன்னா அது உங்க தப்புங்க!!!


தியாகி செல்லூராரை நக்கலடிக்காதீங்க . . .



"இடுக்கண் வருங்கால் நகுக" என்று திருவள்ளுவர் சொன்னார்.
அதையே கவியரசு கண்ணதாசன் எளிமையாக
"துன்பம் வரும் வேளையில சிரிங்க" என்று பாடினார்.

இன்று ஒன்பது மணிக்கு தொலைக்காட்சியில் உங்களை துன்பம் தேடி வரும் வேளையில் உங்களால் சிரிக்க முடியுமா?



அதனாலதான் மாஸ்க் என்பதற்குப் பதிலாக நாப்கின் என்று சொல்லி உங்களை சிரிக்க வைத்துள்ளார், தியாகி செல்லூரார்.

பாவம், அவரை நக்கலடிக்காதீங்க!
அவர் இல்லையென்றால் உங்களுக்கு நகைச்சுவை கிடைக்குமா?


Thursday, April 2, 2020

ராக்கம்மா கைய தட்டு . . .


இசை ஞானியின் பிரம்மாண்டமான ஹிட்டான"ராக்கம்மா கைய தட்டு" பாடலை Orfeo Band என்ற குழுவினர் வயலினில் அளித்திருப்பதை கீழே உள்ள காணொளியில் பார்த்து ரசியுங்கள். அதிலும் பாடலின் துவக்கம் அட்டகாசம்.


இதை கேட்ட பின்பு ஒரிஜினல் பாடலை கேட்காமல், பார்க்காமல் இருக்க முடியுமா?

தளபதி படத்தின் ராக்கம்மா பாடலின் யூட்யூப் இணைப்பு இங்கே . . .


சல்யூட் என் தோழனே!



கொரோனா  வைரஸ் தாக்குதலில் தேசம் தவிக்கும் சூழலில் இத்துயர் துடைக்கும் பணியில் இன்சூரன்ஸ் ஊழியர்கள் பங்கேற்க வேண்டும் என்று அகில இந்திய இன்சூரன்ஸ் ஊழியர் சங்கம் அறைகூவல் அளித்துள்ளது.  இன்றுள்ள ஊரடங்கு நிலையால் கடுமையாக பாதிக்கப் பட்டுள்ள முறை சாரா தொழிலாளர்களுக்கு உதவுங்கள் என்றும் கேட்டுக் கொண்டுள்ளது.

அகில இந்திய இன்சூரன்ஸ் ஊழியர் சங்கம் ஐந்து லட்சம் ரூபாய் பிரதமர் நிவாரண நிதிக்கு அனுப்பியுள்ளது. தமிழகம், கேரளா, புதுவை உள்ளடங்கிய தென் மண்டலத்தினைச் சேர்ந்த தோழர்கள் ஒரு நாள் ஊதியம் அளிக்க வேண்டுமாறு எங்கள் தென் மண்டல இன்சூரன்ஸ் ஊழியர் கூட்டமைப்பு அறைகூவல் விடுத்துள்ளது.  அலுவலகம் வர இயலாமல் வீட்டிலிருந்து பணியாற்றும் சூழல் இருந்தாலும் இந்த அறைகூவலுக்கு எங்கள் கோட்டத் தோழர்கள் முழுமையாக தோள் கொடுப்பார்கள் என்ற நம்பிக்கை உள்ளது.

எங்கள் புதுவை 1 கிளைத் தோழர்கள் கட்டுமானத் தொழிலாளர்கள் சிலருக்கு அரிசி உள்ளிட்ட அத்தியாவசியப் பொருட்களை வழங்கி உள்ளனர்.  அவர்களுக்கு எங்கள் வாழ்த்துக்களும் பாராட்டுக்களும்.






பெங்களூர், மசூலிப்பட்டிணம் உள்ளிட்ட இடங்களில் இது போன்ற பணி நடந்து வருகிறது. 






இப்பணிகள் குறித்து எங்கள் அகில இந்திய இன்சூரன்ஸ் ஊழியர் சங்கத்தின் முன்னாள் தலைவர் தோழர் அமானுல்லாகான் நெகிழ்ச்சியுடன் பகிர்ந்து கொண்டுள்ள பதிவையும் தென் மண்டல துணைத்தலைவர் தோழர் கே.சுவாமிநாதன் அவர்களின் தமிழாக்கத்தையும் கீழே பகிர்ந்து கொண்டுள்ளேன்.



*I am proud of my comrades in Bangalore and all other centres across the country for the wonderful work they are doing to provide relief to those severely impacted by the present day unprecedented crisis. It is a great sight to see our comrades helping the poor and unorganised risking their own safety. I salute all my comrades for their courage of conviction.*

*It is this conviction that has made AIIEA a unique trade union.*

*Long back, the great revolutionary and icon of working class movement, Che Guevara had said
 “what we have done is practicing charity, and what we have to practice is solidarity”.*

*Therefore, the work we are doing is not charity but an expression of solidarity. Solidarity does not end with immediate relief to the unfortunate but it leads to a demand for justice to them all. Solidarity means demanding a dignified life to these less fortunate citizens of our great country. Solidarity in real sense means holding the government responsible and accountable for its actions and forcing it to ensure a dignified life for the poorest of the poor.*

*Let us continue our good work with this understanding.*

*Greetings to all my comrades. Wish all of you the best. Please stay safe.*

*Amanulla Khan*


*சல்யூட் என் அருமை தோழர்களே!* -

*அமானுல்லா கான்*
**********************************

*இதுவரை கண்டிராத ஓர் அசாதாரண சூழலில் பெங்களூர் மற்றும் நாட்டின் பல மையங்களில் எனது அருமைத் தோழர்கள் கடும் பாதிப்புகளுக்கு ஆளாகியுள்ள மக்களுக்கு நிவாரணம் அளித்து வருகிறார்கள்.  அப்பணியை மேற்கொண்டு வரும் எனது அன்புத் தோழர்களை எண்ணி பெருமை அடைகிறேன்.*

*தங்கள் சொந்த உடல் நலனைக் கூட இடருக்கு ஆளாக்கி ஏழைகளுக்கும், அமைப்பு சாரா உழைப்பாளிகளுக்கும் நமது தோழர்கள் உதவுகிற காட்சி மிகப் பெரிது. இந்த துணிச்சல் மிக்க அர்ப்பணிப்பிற்காக அப் பணியில் ஈடுபட்டுள்ள அத்தனை தோழர்களுக்கும் தலை வணங்குகிறேன். இத்தகைய அர்ப்பணிப்பே அகில இந்திய இன்சூரன்ஸ் ஊழியர் சங்கத்தை தனித்துவம் மிக்கதாக திகழச் செய்துள்ளது.*

*நீண்ட காலத்திற்கு முன்பு, பெரும் புரட்சியாளரும் உழைப்பாளி மக்களின் ஆதர்ச ஆளுமையுமான சே குவாரா சொன்னார். நாம் கொடையாக செய்கிறோம்; ஆனால் தோழமை உணர்வாக அது அமைய வேண்டும் என்றார். ஆகவே நாம் செய்வதும் கருணை நிறைந்த பணி அல்ல. இது தோழமை ஒன்றிணைவின் வெளிப்பாடு.*

*தோழமை ஒன்றிணைவு உடனடி உதவிகளோடு முடிந்து விடக் கூடியதல்ல. அது அனைவருக்கும் நீதி கோருவதற்கு வழி வகுப்பதாகும். தோழமை மிக்க ஒன்றிணைவு என்பது இம் மாபெரும் நாட்டில் வாய்ப்புகள் மறுக்கப்பட்ட எளிய மக்களுக்கு கௌரவமான வாழ்க்கையை கோருவதாகும். தோழமை மிக்க ஒன்றிணைவு என்பதன் மெய்யான பொருள், அரசாங்கத்தை அதன் செயல்களுக்கு பொறுப்பாக்குவதும், ஆக்கபூர்வமான விமர்சனத்திற்கு ஆளாக்குவதும் ஆகும். அதன் மூலம் வறியவர்களிலும் வறியவர்க்கு கௌரவமான வாழ்க்கையை உறுதி செய்வதாகும்.*

*நம்முடைய நற்பணியை இப் புரிதலோடு தொடர்வோம். எனது தோழர்கள் அனைவரையும் வாழ்த்துகிறேன். உங்கள் முயற்சி வெற்றி பெறட்டும். உடல் நலத்தோடு பாதுகாப்பாய் இருங்கள்.*

***********
*அமானுல்லா கான்*
முன்னாள் தலைவர், அகில இந்திய இன்சூரன்ஸ் ஊழியர் சங்கம்.




Wednesday, April 1, 2020

காய்கறிக்காக பேரம் பேசிய எம்.பி

மார்க்சிஸ்ட் கம்யூனிஸ்ட் கட்சியின் மதுரை மக்களவை உறுப்பினர் தோழர் சு.வெங்கடேசன் அவர்களின் பதிவு இது.

மதுரை மக்கள் கொடுத்து வைத்தவர்கள்


மதுரை மக்களே….கைவிட்ராதீங்க!

கடந்த ஞாயிற்றுக்கிழமை மதுரைத் தெருக்களில் கூடிய கூட்டம் யாரையும் மிரளச்செய்யும். “வழக்கமான நாள்களில் கூடுவதைவிட இரண்டு மடங்கு . . . இல்லையில்லை நான்கு மடங்கு . . .” என்று ஆளுக்கு ஒரு கணிப்பைச் சொன்னார்கள்.


மக்கள் கடைக்கு வந்து குவியாமலிருக்க என்னதான் வழியென்று இரண்டு நாள்களாக நிர்வாகம் சார்ந்த பல்வேறு ஆலோசனைகள் நடந்துகொண்டே இருந்தன.

இன்னொரு பக்கம் மொத்தக்கடைகாரர்கள், சில்லறைக்கடைக்காரர்கள், நுகர்வோர் என அனைத்து தரப்பினரிடமிருந்தும் தொடர்ந்து போன் வந்துகொண்டே இருந்தது. எல்லோரும் எல்லோரிடமும் பேசினார்கள். ஆனால், என்ன தீர்வைக் காண்பது என்றுதான் முடிவுக்கு வர முடியவில்லை.


எங்களது கட்சியின் மாவட்டக்குழு அலுவலகத்துக்குப் பின்னாலிருக்கும் தெருவைச் சேர்ந்த மக்கள் எனக்கு போன்போட்டு, “சார், இன்னைக்கும் பெட்டிக்கடை தெறக்கலைன்னா, உங்க கட்சி அலுவலகத்துக்கு வந்திருவோம். நீங்கதான் சாப்பாடு போடனும்” என்று உரிமையோடு கோபித்தார்கள்.

சில்லறை விற்பனைக்கடைகள் அனைத்தும் ஒரே வளாகத்துக்குள் இருப்பது போலவும் மொத்த விற்பனைக்கடைகள் அனைத்தும் ஒரே வளாகத்துக்குள் இருப்பது போலவும்தான் காலங்காலமாய் நகர அமைப்புகள் உருவாக்கப்பட்டுள்ளன. மதுரைக்காஞ்சிக் காலத்தில் வணிகவீதிகள் எப்படி இருந்தனவோ அப்படித்தான் இன்றைய வணிக வீதிகளும் இருக்கின்றன. அதனால்தான் கீழமாசி வீதியின் ஒரு முனையிலிருந்து மறு முனை வரை நடந்துசென்றால், அவ்வீதியெங்கும் நிறைந்து கிடக்கும் வகைவகையான தானியங்களின் வெவ்வேறு வகையான மணம் நமது மூக்கில் நிறைகிறது. ஆனால் ஒரே நாளில் இந்த நிலைமையை தலைகுப்புற மாற்ற வேண்டியுள்ளது. 

கடைகள் நெருக்கமாக அடுத்தடுத்து இருக்கக்கூடாது. வாங்குபவர்கள் தள்ளித்தள்ளி இருக்க வேண்டும். எல்லாவற்றிலும் மூன்றடி இடைவெளி தேவை. ஆனால், ”தராசு தட்டுக்கான சங்கிலியே ஒரு அடில்லதான் இருக்கு, மனுஷனோட கையி ரெண்டு அடிதான். அப்புறம் எப்படியா மூனடிக்கு அங்கிட்டு இருந்து வாங்க முடியும்?” என்று கேட்கிறார்கள் மக்கள். மதுரக்காரன பேசி ஆகவைக்கிறது எளிய காரியமல்ல.


எதையும் கேட்கலாம். ஆனால் எதைக்கேட்டாலும் மூன்றடிக்கு அங்கிட்டு இருந்து கேட்பதே பாதுகாப்பு. எனவே கடைகளையெல்லாம் வளாகத்தைவிட்டு வெளியே கொண்டுவர வேண்டும், அதற்கான இடத்தைத் தேர்வு செய்ய வேண்டும், அதனை வியாபாரிகள் ஏற்றுக்கொள்ள வேண்டும், மக்கள் வந்து சேர வேண்டும், இவை அனைத்தையும் உடனுக்குடன் செய்தாக வேண்டும் என்ற அவசரகதியில் எல்லாம் நடந்துகொண்டிருக்கிறது.

இதற்கிடையில் தேனி மாவட்ட ஆட்சியர் 150 ரூபாய்க்கு உழவர் சந்தையில் காய்கறித் தொகுப்பைக் கொடுக்கும் முயற்சியைச் செய்தார். அது சமூக ஊடகங்களில் நல்ல வரவேற்பினைப்பெற்றது. ஆனால், அதிலிருந்த சிக்கல் மீண்டும் சந்தையை நோக்கி மக்களை வரவைப்பது. அதைச்செய்தால் குரோனோவுக்கு எதிரான சமூகவிலகல் என்பதற்கு அர்த்தமில்லாமல் போய்விடுகிறது. வைகைப்புயல் வடிவேல் பாஷையில் “சங்கத்தையும், சந்தையையும் கலைங்கப்பா” என்பதுதான் இப்பொழுது முதல் வேலையாக இருக்கிறது.

காய்கறிகளை வீடு நோக்கிக் கொண்டுசெல்லும் திட்டந்தான் குரோனாவுக்கு எதிரான தடுப்பு நடவடிக்கையோடு பொருந்திப்போவதாக இருக்கிறது என்று முடிவுசெய்யப்பட்டது. மாநகராட்சி நிர்வாகமோ, குட்டி யானை என்று சொல்லப்படுகின்ற டாட்டா ஏசி வண்டியை டீசல் போட்டு ஓட்டுநருடன் கொடுக்கிறோம், மார்க்கெட்டில் ஒரே விலை நிர்ணயம் செய்யப்பட்ட காய்கறி தொகுப்புகளை மக்களிடம் தன்னார்வலர்கள் மூலம் விற்றுப்பார்க்கலாம் என்ற முடிவுக்கு வந்தது. உயர்நீதிமன்ற வழக்கறிஞர்கள் ( தோழர் சாஜி உள்பட) இரண்டு குழுகளாக இப்பணியைச் செய்ய முன்வந்துள்ளனர். அதே போல “ வா நண்பா வா” அமைப்பைச் சேர்ந்தவர்களும் இரண்டு என்.ஜி.ஓ.களும் இப்பணியைச் செய்ய முன்வந்துள்ளனர். அவர்கள் அனைவருக்கும் எனது வாழ்த்துகள்.


இதற்கிடையில் தூத்துக்குடி மாநகராட்சியில் வண்டியில் கொண்டுப்போய் 200 ரூபாய்க்கான காய்கறித் தொகுப்பினை விற்கும் முயற்சியை, அம்மாநகராட்சியின் ஆணையர் இன்று தொடங்கிய செய்தி வெளியானது. உடனே அவரிடம் மதுரை மாநகராட்சி ஆணையர் பேசி விபரங்களைக் கேட்டறிந்தார்.

காவல்கோட்டம், வேள்பாரி என எனது படைப்புகளின் தீவிர வாசகரும் தமிழிலக்கியக் காதலருமான தூத்துக்குடி ஆணையரிடம் நானும் தொலைபேசியில் பேசினேன். “இரண்டு வண்டிகளில் 200 ரூபாய்க்கான காய்கறித் தொகுப்புகளை 800 பைகளிகளில் போட்டு இன்று விற்பனையைத் தொடங்கினோம். நல்லபடியாக விற்று முடிந்தது” என்றார். நான் எனது வாழ்த்துகளைத் தெரிவித்தேன்.


தேனியில் தொடங்கி தூத்துக்குடி வழியாக மதுரைக்கு வந்து சேர்ந்தது காய்கறி வியாபார உத்தி. எங்கே வாங்கி, எவ்வளவு ரூபாய்க்கு தொகுப்பாக்கி, எப்படி விற்பது என்று மாநகராட்சி நிர்வாகம் முயற்சி செய்து ஒரு வழியாக முடிவுக்கு வந்தது.

இரவு 10 மணிக்கு மாநகராட்சி ஆணையரிடம் பேசினேன். ”மூன்று அல்லது நான்கு நாட்களுக்கு வருவதுபோல 250 ரூபாய்க்கு ஒரு காய்கறித் தொகுப்பை உருவாக்கியுள்ளோம்” என்று சொன்னார், “சரி, பட்டியலை அனுப்புங்கள்” என்றேன். 10. 40 மணிக்கு பட்டியலை அனுப்பினார்.

பட்டியல் முழுவதையும் பார்த்துவிட்டு, ”இன்னும் சிலவற்றைக் கூட்டலாமே” என்றேன். ”


எங்கள் மக்கள் பேசிப்பார்த்ததில் இவ்வளவுதான் முடிந்தது” என்றார்.
”மார்கெட் சங்கத் தலைவரிடம் நான் பேசுகிறேன்” என்றேன்.
”எனக்கு அவரைத் தெரியாது. நீங்கள் பேச முடிந்தால் நல்லது சார்” என்றார்.

இரவு படுக்கைக்குப்போய்விட்ட தோழர் அலாவுதீனுக்கு போன்செய்து, “மனுவேல் செயராஜ் போன் நம்பரைத் தாருங்கள்” என்று கேட்டு வாங்கினேன்.

மணி 11க்கு மேல் ஆகிவிட்டது, சற்றே தயக்கத்தோடுதான் போன் செய்தேன். மதுரை சென்ரல் மார்க்கெட் காய்கறி மற்றும் அழுகும் பொருள் வியாபாரிகள் சங்கத்தின் தலைவர் மனுவேல் ஜெயராஜ் அவர்கள் மார்க்கெட்டின் பேரிரைச்சலுக்கு நடுவே போனை எடுத்துப் பேசினார்.


இந்நேரத்துக்கு நான் கூப்பிட்ட திகைப்பு அவரின் குரலில் தெரிந்தது. நான் நேரடியாக விசயத்தை சொன்னேன். “விலையைக் குறைக்க வேண்டும் அல்லது போடப்படும் பொருளின் எண்ணிக்கையையும் எடையையும் கூட்ட வேண்டும்” என்றேன்.

அவரோ அவர் தரப்பில் இருக்கும் பிரச்சனைகளை விரிவாகக் கூறினார். பொருள்கள் போடவேண்டிய பையின் விலை, அதில் காய்கறிகளை நிறுத்துபோடுவதற்கான உழைப்பு என பலவற்றைச் சொன்னார்.

“உண்மைதான் சார், எல்லோரும் கஷ்டப்படுகிறோம். மக்களுக்காக கஷ்டங்களைப் பகிர்ந்துகொள்ளுங்கள்” என்றேன்.

சற்றே தயக்கத்தோடு “என்ன செய்ய முடியும் எனப் பார்க்கிறேன் சார்” என்றார்.


அடுத்து ஆணையருக்கு போன்செய்து, மனுவேல் ஜெயராஜ் நம்பரைக் கொடுத்து “நீங்களும் கையோடு பேசுங்கள்” என்றேன்.

“சார், மணி 11.30, என்றார்”
“அவர் மார்க்கெட்டில்தான் சார் இருக்கிறார். தாராளமாகப் பேசலாம்” என்றேன்.
உடனே அவரிடம் பேசிவிட்டு, என்னைக் கூப்பிட்டார், “எம்.பி. சாரும் பேசினாரு, நீங்களும் சொல்லியிருக்கீங்க. நான் நல்லபடியா பண்ணிக்கொடுக்கிறேன்” என்று சொல்லியுள்ளதாகக் கூறினார்.

மாநகராட்சி நிர்வாகம் 10 வண்டிகளை நாளை காய்கறி வியாபாரத்துக்காகக் கொடுக்கிறது. எரிபொருள் நிரப்பி, ஓட்டுநருடன் இலவசமாகக் கொடுக்கிறது. ஐந்து குழுகளும் தலா இரண்டு வண்டிகளை எடுத்துக்கொண்டு பைகளில் போடப்பட்டுள்ள காய்கறிகளைத் தெருகளில் கொண்டுசென்று மக்களுக்கு நேரடியாக விற்க வேண்டும். இப்புதிய முயற்சி நாளை சிறப்பாக நடந்தால் கூடுதலாக 70 வண்டிகளைத்தர மாநகராட்சி நிர்வாகம் தயாராக இருக்கிறது. இப்பணியில் தங்களை ஈடுபடுத்திக்கொள்ள நினைக்கும் தன்னார்வலர்கள் கூடுதலாக முன்வரலாம்.

அடுத்த இரண்டு வாரத்துக்கு சந்தைகளில் கூட்டமாய்க் குழுமிக்கிடப்பதைத் தவிர்ப்போம். சரியான மாற்று ஏற்பாட்டுக்கு விரைவாய்ப் போவோம். ஒவ்வொரு நாளும் சூழல் மோசமாகிக்கொண்டிருக்கிறது என்ற எண்ணத்தோடு மடிக்கணினி முன் உட்கார்ந்தேன்.


கொடுமையிலும் கொடுமை, கிராமப்புற மக்களுக்கு வேலைபார்த்த கூலியை இன்னும் கொடுக்காமல் இழுத்தடித்துக்கொண்டிருக்கிறது மத்திய அரசு. எனவே மத்திய ஊரக துறை அமைச்சருக்கு கடிதம் எழுதத் தொடங்கும்போது தொலைபேசி அலைப்போசை கேட்டது.

இரவு 12.15க்கு யார் கூப்பிடுவது என்று யோசித்தபடி போனை எடுத்தேன். மனுவேல் ஜெயராஜ் சார் கூப்பிட்டார். “எம் பி சார். நீங்களும் கமிஷினரும் உங்களுக்காகவா கேக்குறீங்க; மக்களுக்காத்தான கேக்குறீங்க. அதனால சுமார் எட்டரை கிலோ எடைக்கு இருபது வகையான காய்கறியோடு பை போட்டுக்கொடுத்துற்றோம் சார்” என்று எண்ணிக்கையையும் எடையையும் கூட்டி உற்சாகத்தோடு சொன்னார்.

மிகுந்த நன்றியைக் கூறிக்கொண்டேன்.

மதுரை மக்களே… காய்கறிக்காக நள்ளிரவு வரை பேரம் பேசியுள்ளோம். கைவிட்ராதீங்க.

இஸ்லாமிய வைரஸ் - வேதனையின் வெளிப்பாடு

மனுஷ்ய புத்திரனின் கவிதை கீழே உள்ளது. சங்கிகளின் விஷமப் பிரச்சாரத்தால் இன்று இஸ்லாமியர்கள் மீது சந்தேகப்பார்வையை சாதாரண மக்கள் கூட பதிக்கத் தொடங்கியுள்ள நேரம் இது. அந்த வேதனையை இக்கவிதை வெளிப்படுத்துகிறது.

டெல்லியில் நடைபெற்ற தப்ளீக் மாநாட்டால் கொரானா வைரஸ் பரவியது என்று சொல்லும் நேர்மையாளர்கள் அதே காலகட்டத்தில் நடைபெற்ற "நமஸ்தே ட்ரம்ப்", சிவராத்திரி கொண்டாட்டம், ராம நவமி பூஜை, அமிர்ந்தானந்த மயி மடத்தில் ஒளிந்து கொண்டிருந்த வெளி நாட்டினர் பற்றியும் கண்டனக்குரல் தெரிவித்தார்களா என்பதையும்

கைதட்டல் கொண்டாட்டம் கொரோனாவுக்கான அழைப்பிதழ் என்பதை உணர்ந்திருந்தார்களா

என்பதையும் சேர்த்து சொல்ல வேண்டும். 


இஸ்லாமிய வைரஸ்
..................
உரத்த குரலில் அது அறிவிக்கப்படுகிறது
' கொள்ளை நோயை
கொண்டு வந்த
இஸ்லாமியர்கள் உடனடியாக
வெளியே வரவும்
நீங்கள் பதுங்கியிருக்கும்
ஒவ்வொரு கணமும் உலத்திற்கு ஆபத்து"
நான் யோசிக்கவே இல்லை
முதள் ஆளாக கையைத் தூக்கிக்கொண்டு
ஒரு வெள்ளைக்கொடியுடன்
வெளியே வந்துவிட்டேன்
நான் பொறுப்புள்ள இந்தியன்
நான் பொறுப்புள்ள இஸ்லாமியன்
நான் பொறுப்புள்ள
ஒரு சந்தேகத்திற்குரிய குடிமகன்
ஒரு இஸ்லாமியன்
இவ்வளவுகாலம் பயங்கரவாதியாக
இருந்ததைவிட பயங்கரமானது
அவன் ஒரு கொள்ளை நோயைக்கொண்டு வருபவனாக இருப்பது
உலக வரலாற்றிலேயே
ஒரு கிருமி முதன் முதலாக
மதம் மாறியிருக்கிறது
சீனத்தில் பிறந்தால்
கம்யூனிஸ கிருமியென்று
அழைக்கப்பட்ட அது
இந்தியாவிற்குள் நுழைந்ததும்
இஸ்லாமியக் கிருமியாக
பரிமாணம் அடைந்துவிட்டது
முதலில் அது
ஒரு சிறிய ஊரில்
தாய்லாந்து பயணிகள் சிலரிடமிருந்து
ஆரம்பித்ததாக சொல்லப்பட்டது
பிறகு அது நிரூபிக்கப்படவில்லை
அவர்கள் தற்செயலாக
இஸ்லாமியார்களாக இருந்தார்கள்
பிறகு ஒரு நகரத்தில்
சமூகப்பரவலின் முதல் பலி விழுந்ததாக
அறிவிக்கப்பட்டது
அவர் அவசரமாக புதைக்கப்பட்டார்
செய்திகள் வாசிக்கப்பட்டன
அவர் தற்செயலாக
ஒரு இஸ்லாமியராக இருந்தார்
இப்போது அது
தலை நகரத்திலிருந்து வந்திருக்கிறது
இஸ்லாமிய ரயிலில்
இஸ்லாமியர்கள்
இஸ்லாமியக்கிருமியைக்
கொண்டுவந்தார்கள் என சொல்லப்படுகிறது
அவர்கள் தற்செயலாக
இஸ்லாமியராக இருந்தார்கள்
இஸ்லாமியர்கள் பொறுப்புள்ள
குடிமக்களாக இருப்பது அவசியம்
கூட்டமாக இருந்த இஸ்லாமியர்கள்
தாமாக முன் வந்து
தங்களை சோதனைக்கு
ஆட்படுத்திக்கொள்வது அவசியம்
கூட்டமாக இருந்த எல்லோருமே
பொறுப்புடன் நடந்துகொள்ள வேண்டும் என்றாலும்
அது ஒரு இஸ்லாமிய கிருமியாக
இருக்கக்கூடும் என்பதால்
கூடுதல் பொறுப்பு தேவை
கூடுதல் எச்சரிக்கை தேவை
இஸ்லாமியர்கள்
கோயில்களை இடித்தவர்கள்
குண்டுகளை வெடிப்பவர்கள்
தேசத்தைக் காட்டிக்கொடுப்பவர்கள்
காதல் ஜிகாத்தை நடத்துபவர்கள்
என்றெல்லாம் சொல்வதைக்காட்டிலும்
இஸ்லாமியர்கள்
கொள்ளை நோயைக்கொண்டுவந்தவர்கள்
என்று சொல்வது
கொள்ளை நோயைவிடவும் வேகமாக பரவக்கூடியது
ஒரு இஸ்லாமியருக்கு வீடுதராதிருக்கு
ஒரு இஸ்லாமியருக்கு வேலை தராதிருக்க
ஒரு இஸ்லாமியர்கடையில் பொருள்வாங்காதிருக்க
நியாயமான காரணங்கள் இல்லாதிருந்தது
இப்போது அவர்கள்
கொள்ளை நோயைக்கொண்டு வருபவர்கள்
என்பது தெளிவாகிவிட்டது
வாட்ஸப் அப்படித்தான் சொல்கிறது
ஒரு எளிய மனிதனின் தலைக்குள்
அது வைரஸைவிடவும் வேகமாக நுழைகிறது
மாட்டுக்கறி உண்பவன்
என்று ஒருவன் கொல்லப்பட்டதுபோல
வைரஸைக் கொண்டுவருபவன் என
நாளை ஓடும் ரயிலிருந்து
ஒரு இஸ்லாமியன்
கீழே தள்ளப்படலாம்
எதுதான் நடக்கவில்லை இங்கே?
கொள்ளை நோயைக்கொண்டு வருபவர்களென
ஒவ்வொருவரும்
ஒவ்வொருவரையும் சந்தேகிப்பதைக்காட்டிலும்
ஒரு சமூகத்தை சந்தேகிப்பது எளிது
அப்படித்தான்
இன சுத்திகரிப்பின்
இனத் தூய்மைக்கொண்டு
வர முடியும்.
இதை நீங்கள் ஏன்
திரும்ப திரும்ப சொல்கிறீர்கள் என
தெரியாமல் இல்லை
எல்லோரையும் மரண பயம்
ஆட்கொண்டிருக்கிறது
என்னையும்தான்
இருந்தும் உங்கள்
யாரையும் விடவும்
ஒரு இஸ்லாமியனாக
நான் இன்னும் கொஞ்சம் தனிமைப்படுகிறேன்
அது அப்படிதான் நீண்டகாலமாக நிகழ்கிறது
மத நல்லிணக்கத்தில்
நம்பிக்கைக்கொண்ட
என் சிநேகிதி பதட்டமாகக்கூறுகிறாள்
' இன்னும் கொஞ்சம் தள்ளியிரேன்'
மத சகோதரத்துவத்தை போதிக்கும்
என் நண்பர் முணுமுணுக்கிறார்
' உங்கள் ஆட்கள் ஏன் இப்படி
பொறுப்பற்று நடக்கிறார்கள்?'
உண்மைகளுக்காக
கொஞ்சம் காத்திருங்கள்
என்று சொல்ல விரும்பினேன்
ஆனால் சொல்லவில்லை
இப்படி ஏற்கனவே
நிறையச் சொல்லிவிட்டேன்
நான் எப்போதும்போல
தலையைக் குனிந்துகொண்டேன்
நான் பதில் சொன்னால்
நான் கிருமியைக் கொண்டு வருபவன்
என்பதற்குப்பதில்
நானே ஒரு கிருமி என்று அழைக்கப்படுவேன்
நாங்கள் அரசாங்கத்தை நம்புகிறோம்
ஒவ்வொரு எச்சரிக்கையும் நம்புகிறோம்
ஒவ்வொரு கட்டளைக்கும் கீழ்படிகிறோம்
ஆயினும்
நாங்கள் களைத்துபோய்விட்டோம்
எங்கள் பரிசுத்தத்தை நிரூபித்து நிரூபித்து
எங்களிடமிருந்த சோப்புகளெல்லாம்
தீர்ந்துவிட்டன
வெறுப்பின் வைரஸ்கள்
வதந்திகளின் சோதனைக்கூடங்களில் பிறக்கின்றன
அவை மசூதிகளில்
இஸ்லாமியர்களின் சுவாசக்கோளங்களில்
வேகமாக வளர்கின்றன
அடுத்த செய்தி அறிக்கை
ஷாஹின் பாத்தில்
தேசியக்கொடியுடன் அமர்ந்திருந்தவர்களிடமிருந்து
இது துவங்கியது என்பதாக இருக்கலாம்
இதுதான் சிறந்த சந்தர்ப்பம்
நீங்கள் ஏற்கனவே திட்டமிட்டபடி
இஸ்லாமியர்களை
தடுப்பு முகாம்களுக்கு அனுப்ப
ஹிட்லரைப்போல
நீங்கள் கேஸ் சேம்பர்களில்
விஷவாயுக்குழாயை
திறக்காவிட்டாலும்
இந்த தேசத்தின்
அனைத்து இஸ்லாமியர்களையும்
ஒட்டுமொத்தமாக
கிருமி நாசினி குளியலுக்கு
உட்படுத்த இதுதான் சந்தர்ப்பம்
மற்றபடி
கொரோனோவுக்கு
எதிராக
ஒன்றிணைவோம்
1.4.2020
காலை 8.42
மனுஷ்ய புத்திரன்

கார்ட்டர் - கியூபா - கொரோனா

தோழர் யமுனா ராஜேந்திரன் அவர்களின் முக நூல் பதிவு. இன்று அவசியம் அறிந்து கொள்ள வேண்டிய செய்தியும் கூட . . .


ஜிம்மி கார்ட்டர் பற்றி இடதுசாரிகளிடம் எப்போதுமே நல்ல அபிப்ராயம் உண்டு. ஜிம்மி கார்ட்டர் காலத்தில் பயோ டெக்னாலஜி ஆய்வில் ஈடுபட்ட ஒரு அமெரிக்க ஆய்வாளர் கியூபா வருகிறார். கியூப பயோ டெக்னாலஜி ஆய்வகத்துக்குப் போய்விட்டு அவர் பிடலைச் சந்திக்கிறார். அமெரிக்க ஆய்வாளர் கியூப ஆய்வகத்திலிருந்து ஒரு ஆய்வாளரை அமெரிக்காவுக்கு அழைத்துச் செல்ல விருப்பம் தெரிவிக்கிறார். 

பிடல் இருவருக்காக கோரிக்கை வைக்கிறார். இருவர் அமெரிக்கா போகிறார்கள். அமெரிக்க ஆய்வாளர் இவர்களை ஒரு பின்லாந்து நாட்டு பயோ டெக்னாலஜி ஆய்வாளரிடம் அறிமுகப்படுத்துகிறார். கியூப ஆய்வாளர்கள் பின்லாந்து செல்கிறார்கள். அந்த பின்லாந்து ஆய்வாளர் கியூபா வருகிறார். இன்று கொரானோக்கு மருந்தாகப் பாவிக்கும் கியூபத் தயாரிப்பான ‘இன்ட்டர் பரான் ஆல்பா-2பி’ (Interferon Alfa-2B) இப்படித்தான் உருவானது. சே, பிடல், அமெரிக்க, பின்லாந்து, கியூப ஆய்வாளர்கள் தமது கூட்டுச் சிந்தையில் மருத்துவ உலகுக்கு வழங்கிய கொடை இது.

நூலை வாசிக்கிறபோது இந்தச் செய்தியைப் படித்து உடைந்து போனேன் : கம்யூனிஸ்ட் கலைஞர்களை வேட்டையாடிய கொடுங்கோலன் நிக்சன் காலத்தில், அமெரிக்க விஞ்ஞான சஞ்சிகைகளுக்கு கியூபர்கள் சந்தா செலுத்தினால் அதனை ஏற்கக் கூடாது என்று அறிவித்தாராம் அந்த ஜென்டில்மேன்..