உங்களுக்கா இப்படி யுவர் ஆனர்?

 

கீழேயுள்ள செய்தியை படிக்கும் போது சந்திரசூட் மீது பரிதாபமே வந்தது.

அயோத்தி தீர்ப்பளித்தவர்கள் ஐவர். 

அதில் ஒருவர் ஆளுனர், ஒருவர் எம்.பி. இன்னும் இருவருக்கும் கம்பெனி சட்ட வாரியம் போன்ற பதவிகள்.

ஆனால் தீர்ப்பை எழுதியவரை வீட்டை காலி செய்யச் சொல்கிறார்கள். அதிலும் என்ன எழுதுவது என்று தெரியாமல் கடவுளின் முன் அமர்ந்தேன். அவர் சொன்னபடி எழுதினேன் என்று வேறு சொன்னார்.

அப்பேற்பட்டவரையே வீட்டை காலி செய்ய சொல்லி விட்டார்கள்.

இவர் வீட்டுக்கு பிள்ளையார் சதுர்த்தி பூஜை சீன் போட மோடி வந்த போது அவர் வசிக்கும் ப்ங்களா நிரந்தரமாக அவருக்கே என்று சட்டம் போட சொல்லியிருக்கலாம். அப்படியே வழக்கு போடப்பட்டிருந்தாலும் அயோத்தி தீர்ப்பு போல "நம்பிக்கை" என்று சொல்லி தப்பித்திருக்கலாம் .

பாவம் ஐடியா இல்லாத ஆளுங்க!

கவிதைக்கு விதையாய் கவிதை

 அகில இந்திய இன்சூரன்ஸ் ஊழியர் சங்கத்தின் மகத்தான தலைவர் தோழர் அமானுல்லா கான், சென்ற சனிக்கிழமையன்று நடைபெற்ற எங்கள் சென்னை 1 கோட்டத்தின் மாநாட்டில் உருதுக் கவிஞர் கைஃபி ஆஸ்மி அவர்களின் கவிதை வரிகளை கூறியுள்ளார்.

 

புயல் காற்றின் வேகத்தில்
அனைத்து விளக்குகளும்
அணைந்த போதும்
ஒரே ஒரு தீபம் மட்டும்
எரிந்து கொண்டிருந்தது.
அது நம்பிக்கை எனும் தீபம்.

 

இக்கவிதையை அடித்தளமாகக் கொண்டு ஓய்வு பெற்ற மூத்த அதிகாரி தோழர் ஆர்.ரமணன் இன்னொரு கவிதையை உருவாக்கியுள்ளார்.

 அக்கவிதை கீழே . . .

 

பெருங்காற்றினிலே 
பேணிக்காத்த விளக்குகளெல்லாம்
அணைந்தபோதும் 
 எரிந்துகொண்டிருந்தது
 எம் நம்பிக்கை மட்டுமே .
 
அரக்க கை ஒன்று
அனைத்து கதவுகளையும் அடைத்தபோது 
 திறந்திருந்தது
நம் நம்பிக்கை சாளரம் மட்டுமே.
 
ராஜ பாதைகளெல்லாம் பாழடைந்தபோது
 
நல்வழி காட்டியது
நம்பிக்கை எனும் நடைபாதை மட்டுமே.
 
உறவுகளெல்லாம் ஓய்ந்தபோது
 தோள் கொடுத்தது
தோழமை எனும் நம்பிக்கை மட்டுமே.
 
அரச சட்டங்களெல்லாம் 
அடக்கும் அரண்களானபோது
 
உடைக்கும் உறுதுணையானது
அறிவியல் நம்பிக்கையும்
அறவியல் நம்பிக்கையுமே .

 ( சென்னை கோட்டம் 1 மாநாட்டில் *தோழர் அமானுல்லாகான்* அவர்கள்   காட்டிய உருதுக் கவிஞர் *கைஃபி அஸ்மியின்* மேற்கோளிலிருந்து தோன்றிய வரிகள்.)

 நம்பிக்கையூட்டும் அற்புதமான கவிதையை அளித்த தோழர் ரமணன் அவர்களுக்கு வாழ்த்துக்கள்.

நம்பிக்கை நாயகர்கள்

 

 இன்னும் ஏழு நாட்கள் கடந்திருந்தால் ஒரு வருடம் நிறைவடைந்திருக்கும். மூன்று வேளாண் சட்டங்களை திரும்பப் பெற வலியுறுத்தி விவசாயிகள் டெல்லி எல்லையில் நடத்திய போராட்டம் இன்று வெற்றிகரமாக முடிந்துள்ளது.

 விவசாயத்தை கார்ப்பரேட் நிறுவனங்களிடம் ஒப்படைப்பதற்காக ஒன்றிய அரசு கொண்டு வந்த வேளாண் சட்டங்களை ஜனநாயகத்திற்கு புறம்பாக, வாக்கெடுப்பு நடத்தாமல் மோசடியாக நிறைவேற்றியது.

 விவசாயிகளுக்கு *"சுதந்திரம்"* தருபவை என இந்தியப் பிரதமர் 

சொன்னார்

 ஆனால் இச் சட்டங்கள் விவசாயம் சந்தித்துள்ள இன்னல்களுக்கு 

மருந்தாக  அமையாது.

 விவசாயிகளுக்கு கிடைத்துள்ள சுதந்திரம் 

சுரண்டலுக்கு *அவர்கள் தங்களைளை சுதந்திரமாக ஆட்படுத்திக் 

கொள்ளலாம்* என்பதுதான். 

கார்ப்பரேட்டுகளின்  *அடிமைகளாக மாறிக் கொள்வதற்கான* சுதந்திரம். 

 தற்கொலை செய்து கொள்வதற்கான* சுதந்திரம். 

 இந்த சட்டங்கள் விவசாயப் பிணிகளை மேலும் மோசமாக்கக் கூடியவை.. 

ஒரே வரியில் சொல்வதானால் இந்த சட்டங்கள் கார்ப்பரேட்டுகள், பன்னாட்டு நிறுவனங்களுக்கு பலன் கிட்டச் செய்யும் ஏற்பாடுகளே ஆகும். 

இவை விவசாயிகள்,  நுகர்வோர்  நலன்களுக்கு  முற்றிலும் எதிரான சட்டங்களே.

பதுக்கல் மற்றும் கறுப்புச் சந்தையை ஊக்குவிக்கிற  பெரு வணிகர்களின் ஆன்லைன் சூதாட்டத்தை சட்ட பூர்வமாக்கும் சட்டம்.

 

குறைந்த பட்ச ஆதார விலையை விவசாயிகளுக்கு தர வேண்டுமென்பதைப் பற்றிப் பேசாமல் ஒப்பந்த விவசாயத்தை வளர்ப்பது பற்றிப் 
பேசியது.

 

.மிகவும் பலவீனமான அதிகார மட்ட சட்ட முறையைத்தான்   விவசாயிகள் குறைகளைத்   தீர்க்க முன் மொழிகிறது.   

 

மொத்த விவசாயச் சந்தையும் கார்ப்பரேட் வசம் கை மாற்றப்படும். 

 

இதற்கு எதிராகத்தான்

 

26 நவம்பர் 2020 அன்று விவசாயிகளின் “டெல்லி சலோ” போராட்டம் தொடங்கியது.

 

அவர்கள் டெல்லிக்குள் நுழையக் கூடாது என்பதற்காக எத்தனையோ தடைகளை உருவாக்கினார்கள். சாலைகள் வெட்டப்பட்டது. முள் வேலிகள் கொண்டு வரப்பட்டது. அகழிகளை வெட்டி முதலைகளை விடவில்லை. மற்றபடி எல்லா அடக்குமுறை ஆயுதங்களும் பிரயோகிக்கப்பட்டது.

 எத்தனை தடைகளை உருவாக்கினாலும் அவற்றை தகர்த்து எறிந்து விட்டு உறுதியாக போராடினார்கள்.. லட்சக்கணக்கான விவசாயிகள் டெல்லியை முற்றுகையிட்டார்கள். தமிழ்நாடு உள்ளிட்ட பல மாநில விவசாயிகள் டெல்லிக்கு சென்று அவர்களோடு தங்களை இணைத்துக் கொண்டார்கள். மோசமான பனியிலும் கடுங்குளிரிலும் கடுமையான வெயிலிலும் வெட்ட வெளியில் அவர்கள் காட்டிய தீரம் பிரமிக்கத் தக்கது.

 பிரிவினைவாதிகள்,

காலிஸ்தானிகள்,

அர்பன் நக்ஸல்கள்,

தரகர்கள்,

வெளி நாட்டு சதிகாரர்கள்,

இந்திய விரோதிகள்

 என்று எத்தனையோ அவதூறுகள் அள்ளி வீசப்பட்டது.

 குடியரசு தினத்தன்று குழப்பங்களை உருவாக்க முயற்சிகள் செய்தார்கள். ஒருவரை கொலை செய்து மத மோதலை உருவாக்கவும் முயற்சித்தனர். காரேற்றிக் கொண்டு அச்சுறுத்தினார்கள், விலைக்கு வாங்கப்பட்டவர்கள் கொண்டு விஷத்தைக் கக்கினார்கள். திரைப்பட நட்சத்திரங்களும் கிரிக்கெட் தெய்வங்களும் செல்லாக்காசினராய் தங்களை அம்பலப் படுத்திக் கொண்டனர்.

 எதற்கும் அவர்கள் அசையவில்லை. எஃகு போன்ற உறுதியை வெளிப்படுத்தினார்கள்.

 ஒன்றுபட்ட போராட்டத்தை முறியடிப்பது சாத்தியமில்லை என்ற சரித்திரத்தை உருவாக்கினார்கள்,

 500 ஆண்டுகள் போராடினாலும் ஒரு கமா கூட மாற்றப்படாது, ஏனென்றால் இது பாஜக அரசு என்று அண்ணாமலை போன்ற அரைவேக்காடுகள் உளறி கொண்டிருந்த போதுதான்

 மோடி சட்டங்கள் திரும்பப் பெறப்படும் என்று அறிவித்துள்ளார்.

 இடைத் தேர்தல்களில் பெற்ற அடி, நெருங்கி வரும் உபி, பஞ்சாப் தேர்தல்கள் அச்சத்தை அளித்திருக்கும். ராணுவ வீரர்களை பலி கொடுத்து அவர்களின் சடலங்களைக் காட்டி வெற்றி பெறுவது ஒவ்வொரு முறையும் சாத்தியமல்ல என்ற உண்மையும் புரிந்திருக்கும்.

 மோடி தன் முடிவுகளை அறிவிக்க மேற்கண்ட காரணங்கள் ஒரு தூண்டுதலாக வேண்டுமானால் இருக்கலாமே தவிர ஒரு ஆண்டாக நடைபெறும் உறுதியான போராட்டம்தான் அடிப்படையான காரணம்.

 உறுதியான போராட்டத்தைத் தவிர வெற்றிக்கு வேறு குறுக்கு வழி கிடையாது என்பதையும் மிக மோசமான அடக்குமுறை ஆட்சியாளர்களையும் முறியடிக்க முடியும் என்பதையும் இந்திய விவசாயிகள் உலகிற்கே உணர்த்தியுள்ளார்கள்.

 19.11.2021 – இந்திய வரலாற்றின் பொன் நாள்.

 தொழிலாளர் நலச் சட்டங்களை மாற்றியதற்கு எதிராக போராடும் தொழிலாளர்கள்,

பொதுத்துறை நிறுவனங்களை தனியார்மயமாக்குவதற்கு எதிராக போராடும் ஊழியர்கள்,

எல்.ஐ.சி பங்கு விற்பனைக்கு எதிராக போராடும் எங்கள் சங்கம்

 என அனைவருக்கும்  உற்சாகத்தையும் எழுச்சியையும் உறுதியையும் அளித்துள்ளார்கள் நம்பிக்கை நாயகர்களான இந்திய விவசாயிகள்.

 கிட்டத்தட்ட எழுநூறு விவசாயிகள் தம் இன்னுயிர் நீத்து இந்திய விவசாயிகளின் போராட்டத்தை வெற்றிபெறவைத்துள்ளனர். அந்த தியாகிகளுக்கு வீர வணக்கம்.

 மின்சார சட்டத்தை திரும்பப் பெற வேண்டும், குறைந்த பட்ச ஆதார விலை நிர்ணயிக்கப்பட வேண்டும் ஆகிய கோரிக்கைகள் இன்னும் நிலுவையில்தான் உள்ளது என்பதை மிகச் சரியாகவே விவசாயிகள் சங்கத் தலைவர்கள் சுட்டிக்காட்டியுள்ளனர். அவற்றையும் அவர்கள் கண்டிப்பாக வென்றெடுப்பார்கள்.

 வெற்றி பெற்ற விவசாயிகளுக்கு வாழ்த்துக்களும் பாராட்டுக்களும். போராடினால் வெற்றி நிச்சயம் என்ற நம்பிக்கையை நீங்கள் அளித்துள்ளீர்கள். இத்தனை நாள் தயக்கமாக இருந்த அமைப்புக்களும் கூட இனி போராட்டப் பாதையில் பயணிக்கும்.

பிகு : மேலே உள்ள ஓவியம் தோழர் ரவி பாலேட் அவர்களின் கைவண்ணம்.

சூப்பரா சொன்னாரு சு.வெ

 

ஹாக்கி வீராங்கனை வந்தனா கட்டாரியாவை நேரில் சந்தித்தது பற்றி தோழர் சு.வெங்கடேசன் எழுதிய பதிவு இங்கே.

வந்தனா கட்டாரியாவை

நேரில் சந்தித்து வாழ்த்து தெரிவித்தேன்.

ஒலிம்பிக் விளையாட்டுகள் மூலமாக சர்வதேச அரங்கில் இந்திய கொடியை பறக்க விட்டு திரும்பியிருக்கிறார்கள் ஹாக்கி பெண் வீரர்கள். வெற்றி வாய்ப்பை இழந்திருந்தாலும், இதயங்களை அள்ளி வந்திருக்கிறார்கள். இந்தியாவுக்கு சர்வதேச அங்கீகாரம் பெற்றுத்தர உழைத்த பெண்களில் ஒருவருக்கு இங்கு கிடைத்த வெகுமதி சாதிரீதியான இழிவு.

வந்தனா கட்டாரியா – இந்தியாவின் ஒலிம்பிக் நம்பிக்கை. தென்னாப்பிரிக்காவுடனான போட்டியில் ஹாட்ரிக் அடித்த முதல் இந்திய பெண். காலிறுதி போட்டியில் பங்கேற்கும் தகுதியை இந்தியா பெற வழி வகுத்த ஆட்டம் அது. ஒலிம்பிக் போட்டிக்கான பயிற்சியின் பொருட்டு, தந்தையின் இறுதி சடங்குக்கு செல்லாமல் விட்ட வந்தனாவுக்கு கிடைத்ததெல்லாம் சாதி துவேஷம். அவரைப் போன்ற தலித் பெண்கள் இடம் பெற்றதால்தான் தோல்வி என்று கொக்கரித்தது ஒரு கூட்டம்.

குடும்பத்தை விட நாடு முக்கியம் என்று நினைத்து பயிற்சியில் பங்கெடுத்த வந்தனா ஒரு பக்கம், தேசத்தை விட சாதி உயர்வானது என்று நினைத்து தோல்வியை வெடி வைத்து கொண்டாடிய கீழ்த்தரமான கூட்டம் இன்னொரு பக்கம். இதில் இந்தியா எந்த பக்கம் நிற்க வேண்டும்?

குற்றவாளிகளை கைது செய்ததோடு மட்டும் நிற்காமல், இந்தியாவுக்கு பெருமை தேடி தந்த உங்கள் பக்கம்தான் நிற்கிறோம் என்கிற வலிமையான செய்தியை இந்தியா சொல்லியிருக்க வேண்டாமா?விளையாட்டுத்துறை அமைச்சர் நேரில் செல்ல வேண்டும் என்று கோரிக்கை விடுத்தேன்.

நாடாளுமன்ற உறுப்பினராகவும், இளைஞர்நலன் மற்றும் விளையாட்டுத்துறையின் நிலைக்குழு உறுப்பினர் என்ற முறையிலும் இன்று வந்தனா கட்டாரியாவை உத்தரகாண்ட் மாநிலம், ஹரித்துவார் மாவட்டத்தில் ரோஷ்னாபாத் கிராமத்தில் உள்ள அவரது வீட்டில் சந்தித்தேன். நான் சார்ந்திருக்கும் மார்க்சிஸ்ட் கட்சி சார்பிலும் எனது சார்பிலும் வந்தனா,அவரது அம்மா & அவரது அண்ணன் மூவருக்கும் வாழ்த்துகளைத் தெரிவித்தேன்.

அவர் இந்தியாவுக்கு தேடித்தந்த மகத்தான பெருமைக்கு நன்றி சொல்லி திரும்பியிருக்கிறேன்.

அவருடனான உரையாடல் மிகுந்த மனநிறைவை தந்தது. அவர் இன்னும் பெரிய உச்சங்களை தொடுவார் என்கிற நம்பிக்கையை தந்தது.

வந்தனா, இந்தியாவின் மகள்.

அவரது வெற்றி இந்த தேசத்தின் வெற்றி.

இதுதான் வந்தனாவுக்கு நான் சொன்ன சேதி.

வாழ்த்துகள் வந்தனா!

காலம் உங்கள் கைகளில்.

இன்னொரு பதிவும் அவர் எழுதினார். அது ரொம்பவே சூப்பர் . . .

கார் நுழையும் அளவு கொண்ட தெருவில்லை.

இதுவரை வாங்கிய பதக்கங்களையும், கோப்பைகளையும்

வைப்பதற்கு அலமாரிகள் இல்லை,

ஜன்னல் கதவுகளை முழுமையாக சாத்திடும் தன்மையில்

தாழ்பாள் இல்லை,

ஆனால் என்ன?

ஹாட்ரிக் கோல் அடிக்கும் திறனும் உறுதியும்

இருப்பவரின் நம்பிக்கையை

இல்லாமைகள் இல்லாமலா செய்துவிடும்?

ஆறுதலாய் ஒரு . . . .

மனதில் எழுந்த கோபமும் கொந்தளிப்புமே முந்தைய பதிவு. 

கொந்தளித்த இதயத்திற்கு ஆறுதலாய் அமைந்திருந்தது திரு டி.கே.கலாபிரியா அவர்களின் கவிதை.

நன்றி கவிஞரே,

பாதிக்கப்படுபவர்களுக்கும்  ஒரு இறகு கிடைக்கும் என்ற நம்பிக்கையை அளித்தமைக்கு . . .

நூலறுந்து பறக்கும்

பட்டத்தைத்

தவற விட்ட சிறுவனைப்

பறவைக்குத் தெரியும்

அவன் வீடு திரும்பும் வழியில்  

நழுவ விடுகிறது

ஆறுதலாய்த் தன்

ஒரு இறகை.

(2015)