பீஹார், குஜராத் ஆகிறதா தமிழ்நாடு?

 

வழக்கமாக பீகாரிலும் குஜராத்திலும் கட்டப்பட்ட சில நாட்களுக்கு உள்ளாகவே பாலம் இடிந்து விழும். சமீபத்தில் விழுந்த அப்படிப்பட்ட சில பாலங்களை மோடிதான் திறந்து வைத்திருக்கிறார் என்பது கூடுதல் செய்தி. அப்படிப்பட்ட ஒரு நிகழ்வு இப்போது தமிழ்நாட்டிலும் நடந்துள்ளது.

திருவண்ணாமலை மாவட்டத்தில் தென் பெண்ணை ஆற்றின் நடுவே, கட்டப்பட்ட ஒரு பாலம் செப்டம்பர் 2024 ல்தான் பொதுப்பணித்துறை அமைச்சர் எ.வ.வேலுவால் திறந்து வைக்கப்பட்டுள்ளது. 16 கோடி ரூபாய் மதிப்பில் கட்டப்பட்ட அந்த பாலம் சமீபத்திய வெள்ளத்தில் இடிந்து விட்டது,

மூன்று மாதம் கூட அந்த பாலம் தாங்கவில்லையென்றால் அந்த பாலம் எப்படிப்பட்ட தரத்தில் கட்டப்பட்டிருக்கும்?

பாலத்திற்கு டெண்டர் எடுப்பது தொடங்கி இறுதி பில்லுக்கு பணம் வாங்கும் வரை அந்த ஒப்பந்ததாரர் எவ்வளவு பணம் கொடுத்திருப்பார்? அந்த பணம் எல்லாம்தான் இடிந்த பாலத்தின் கீழ் தண்ணீரில் ஓடி விட்டது.

 வெறும் வாயை மென்று கொண்டிருந்த ஆட்டுக்காரன் வகையறா சங்கிகளுக்கு அவல் கொடுத்து விட்டது திமுக அரசு.

 பாலத்தை கட்டிய ஒப்பந்ததாரர், அவரிடம் கை நீட்டி பணம் பெற்ற அரசியல்வாதிகள், அதிகாரிகள், அதிலும் கடைசியில் பாலத்தின் தரத்திற்கு சான்றிதழ் கொடுத்த அதிகாரி என அனைவரும் கைது செய்யப்பட்டு செலவழிக்கப்பட்ட பணம் அவர்களிடமிருந்து வசூலிக்கப்பட வேண்டும்.

 இந்த நடவடிக்கையை முதல்வர் கறாராக எடுக்க வேண்டும். நடவடிக்கைக்கு உள்ளாகும் அனைவரும் அவரது கட்சிக்காரர்களாகவே இருந்தாலும் கூட.

 

நாளை முதல் தஞ்சையில்

எங்களது தென் மண்டல் இன்சூரன்ஸ் ஊழியர் கூட்டமைப்பின் முப்பத்தி மூன்றாவது பொது மாநாடு நாளை தஞ்சையில் தொடங்கி ஜனவரி மாதம் இருபத்தி ஆறாம் தேதி வரை நடைபெறவுள்ளது. அமைப்பின் ஒற்றுமையும் வலிமையும் பிரம்மாண்டமாய் வெளிப்படும் தருணம் இது. தமிழகம், புதுவை மற்றும் கேரளா வைச் சேர்ந்த தோழர்கள் திரளும் சிறப்பான மாநாடு.

மாநாட்டை ஒட்டி நடைபெற்ற பிரச்சார இயக்கத்தில் மக்கள் மத்தியில் எடுத்துச் சென்ற பிரசுரம் கீழே உள்ளது. மனசாட்சியை தட்டி எழுப்பும் இந்த பிரசுரத்தை வடிவமைத்தவர் எங்கள் தென் மண்டலப் பொதுச் செயலாளர் தோழர் கே.சுவாமிநாதன்.

இன்று தஞ்சை நோக்கி புறப்படுகிறேன்.

ஆனாலும் தினம் சந்திப்போம்,  ஏற்கனவே டிராப்டில் உள்ள பதிவுகள் மூலமாக

சென்னை வெள்ளம் – படகில் சென்ற எம்.ஜி.ஆர்

அடையாறு ஆற்றில் ஏற்பட்ட வெள்ளப் பெருக்கு ராமாவரம் தோட்டத்தை சூழ்ந்து கொண்டதால் முதலமைச்சர் எம்.ஜி.ராமச்சந்திரன், தனது வீட்டிலிருந்து படகு மூலமாக தனது வீட்டிலிருந்து புறப்பட்டு கன்னிமாரா ஹோட்டலில் தங்கினார்.

என்ன இது என்று யோசிக்கிறீர்களா?

முப்பது ஆண்டுகளுக்கு முந்தைய வெள்ளம் பற்றி ஹிந்து நாளிதழ் செய்தி வாட்ஸப் மூலம் வந்திருந்தது. அதில் உள்ளதுதான் மேற்கண்ட செய்தி. 

பேரழிவு நிகழ்ந்த இடங்களில் பேரன்புடன்

எங்கள் சங்க உறுப்பினர்களுக்காக வெளியிட்ட சுற்றறிக்கை. ஆனாலும் உங்களுடைய தகவலுக்காகவும். 

காப்பீட்டுக் கழக ஊழியர் சங்கம்,

வேலூர் கோட்டம், பதிவு எண் 640 /என்.ஏ.டி

சுற்றறிக்கை எண் 55/15                                                                                   18.11.2015

அனைத்து உறுப்பினர்களுக்கும்

அன்பார்ந்த தோழரே,

பேரழிவு நிகழ்ந்த இடங்களில் பேரன்புடன்

மழை, வெள்ளத்தை

சபிக்காதீர்.

திருடப்பட்ட தன்

ஏரிகளையும் ஆறுகளையும்

தேடித் தேடி

பரிதாபமாய் அலைகிறது.

கட்டிடங்கள் தன்னிடத்தை

களவாடியதைக் கண்டித்து

மறியல் செய்கிறது

சாலைகளில், வீடுகளில்.

என்றோர் அர்த்தமிக்க கவிதை சமூக வலைத் தளங்களில் உலாவிக் கொண்டிருக்கிறது. ஏரிகள், குளங்கள், வாய்க்கால்கள், ஆறுகள் என நீர் நிலைகள் எல்லாமே இன்று ஆக்கிரமிப்பாளர்களின் லாபச் சுரண்டலுக்கு இரையானதன் விளைவை தமிழகம் அனுபவித்துக் கொண்டிருக்கிறது. குறிப்பிட்ட காலகட்டத்தில் செய்ய வேண்டிய தூர்வாறுதல் பணியை செய்வதில் ஆட்சியாளர்கள் காண்பித்த அலட்சியமும் இணைந்து கொண்டதால் பெரு மழை, பெரும் துயரத்தை தந்துள்ளது.

சுனாமி, தானே புயல் என்று ஏற்கனவே இயற்கையின் சீற்றத்திற்கு பலியான கடலூர் மாவட்டம் மீண்டும் மிகப் பெரிய பாதிப்பிற்கு உள்ளாகியது. கடும் மழையின் தாக்கத்தை சமாளிக்க அரசு நிர்வாகம் தயாராக இல்லாதது மிகப் பெரிய பேரழிவிற்கு அடி கோலியது. பெரிய காட்டுப்பாளையம் என்ற கிராமத்தில் பத்து பேர் வெள்ளத்தில் அடித்துச் செல்லப்பட்டார்கள். அதிலே எட்டு பேர் ஒரே குடும்பத்தைச் சேர்ந்தவர்கள் என்பது ஒரு பெரும் துயரம்.

ஆயிரக்கணக்கான மக்கள் தங்கள் வீடுகளை விட்டு வெளியேறி முகாம்களுக்கு போக வேண்டிய அவல நிலை, இடிந்து போன வீடுகள், அடித்துச் செல்லப்பட்ட உடமைகள், தண்ணீரில் மூழ்கி அழுகிய பயிர்கள், துண்டிக்கப்பட்ட சாலைகள் இவைதான் தமிழகம் முழுதும் நாம் பார்த்த காட்சிகள். கோடிக்கணக்கான ரூபாய்கள் இழப்பு ஏற்பட்டுள்ளது.

இச்சூழலில் நமது சங்கத்தின் மரபிற்கேற்ப நமது கடலூர் கிளைச் சங்கத் தோழர்கள் கடலூர் நகரில் பாதிக்கப்பட்ட ஒரு பகுதி மக்களுக்கு பாய்களும் போர்வைகளும் வழங்கினார்கள். அத்தோடு நமது பணி நின்று போகவில்லை.

மிகப் பெரிய அழிவு கடலூர் மாவட்டத்தில் ஏற்பட்டுள்ள போது அங்கே துயருற்ற மக்களுக்கு உதவிட உடனடியாக நிதியுதவி செய்திடுமாறு தென் மண்டலத்தில் உள்ள அனைத்துக் கோட்டங்களுக்கும் தென் மண்டல இன்சூரன்ஸ் ஊழியர் கூட்டமைப்பு வேண்டுகோள் விடுத்தது. அதனை ஏற்று தமிழகத்திலும் கேரளாவிலும் உள்ள அனைத்து கோட்டச் சங்கங்களும் நிதி அனுப்பி வைத்தனர். பொது இன்சூரன்ஸ் ஊழியர் சங்கமும் இப்பணியில் இணைந்து கொண்டது. நம்முடைய கோட்டத்தின் பங்களிப்பு உட்பட ரூபாய் இரண்டு லட்சத்து ஐந்தாயிரம் திரண்டது.

இத்தொகை கொண்டு பெரிய காட்டுப்பாளையம், விசூர், ராஜிவ் காந்தி நகர், எல்லப்பன்பேட்டை, கல்குணம், கடலூர் புருஷோத்தமன் நகர் ஆகிய பகுதிகளில் பாதிக்கப்பட்ட ஆயிரத்து ஐம்பது குடும்பங்களுக்கு அரிசி, பாத்திரங்கள், பாய், போர்வை, ஆடைகள் என்று நிவாரணப் பொருட்கள் நேற்று (17.11.2015) அன்று வழங்கப்பட்டது.

இந்த நிவாரணப் பணியில் அகில இந்திய துணைத்தலைவர் தோழர் ஜே.குருமூர்த்தி, தென் மண்டலப் பொதுச்செயலாளர் தோழர் கே.சுவாமிநாதன், துணைத் தலைவர் தோழர் ஆர்.புண்ணியமூர்த்தி, துணைப் பொருளாளர் தோழர் வி.ஜானகிராமன், பொது இன்சூரன்ஸ் ஊழியர் சங்க தென் மண்டலப் பொதுச்செயலாளர் ஜி.ஆனந்த், சென்னை II கோட்டப் பொதுச்செயலாளர் தோழர் கே.மனோகரன் ஆகியோர் பங்கேற்றனர்.

நம்முடைய கோட்டத்திலிருந்து கோட்டத் தலைவர் தோழர் டி.மணவாளன், பொதுச்செயலாளர் தோழர் எஸ்.ராமன், துணைத் தலைவர் தோழர் கே.வேலாயுதம், தென் மண்டல செயற்குழு உறுப்பினர் தோழர் எல்.குமார், கடலூர் கிளைச் சங்கப் பொறுப்பாளர்கள் தோழர்கள்  ஆர்.கணேஷ், கே.பி.சுகுமாரன், சரவண குமார், வி.சுகுமாரன், ஆர்.வெற்றிவேல், பி.ராஜூ, பண்ருட்டி கிளைச் செயலாளர் தோழர் ஜி.வைத்தியலிங்கம், கோட்ட அலுவலகக் கிளைச் செயலாளர் தோழர் உ.கங்காதரன், தோழர் சி.கணேசன் (காட்பாடி) ஆகியோர் இப்பணியில் ஈடுபட்டனர்.

மார்க்சிஸ்ட் கம்யூனிஸ்ட் கட்சியின் கடலூர் மாவட்டக் குழுத் தோழர்கள், நிவாரண உதவிகளை பயனாளிகளுக்கு நேரடியாக வழங்குவதற்கான ஏற்பாடுகளை திறம்பட செய்திருந்தனர். மார்க்சிஸ்ட் கட்சியின் தமிழ்நாடு மாநிலச் செயலாளர் தோழர் ஜி.ராமகிருஷ்ணன் நம்மோடு இணைந்து நிவாரணப் பொருட்களை மக்களுக்கு வழங்கினார். சிதம்பரம் தொகுதி சட்டமன்ற உறுப்பினர் தோழர் கே.பாலகிருஷ்ணன், அக்கட்சியின் கடலூர் மாவட்டச் செயலாளர் தோழர் டி.ஆறுமுகம் ஆகியோரும் பாதிக்கப்பட்ட இடங்களுக்கு நம்முடன் வந்திருந்தனர். பாதிக்கப்பட்ட மக்கள்  கண்டு கொள்ளாத அரசாங்கத்தைப் பற்றிய தங்கள் குமுறல்களை, சோகங்களை தோழர் ஜி.ஆர் மற்றும் தோழர் கே.பி ஆகியோரிடம் வெளிப்படுத்தினர். 

இயற்கை நடத்திய கோரத் தாண்டவத்தை பார்ப்பதற்கான வாய்ப்பு நம் முன் உள்ள கடமைகளை உணர்த்தியுள்ளது. நம்மால் இயன்ற உதவியை செய்தோம் என்பதோடு நாம் நிறைவடைய முடியாது. வாழ்வாதாரம் இழந்த மக்களுக்கு வாழ்வை மீட்டுக் கொடுக்க வேண்டிய பொறுப்பு அரசுடையது. அதை அவர்கள் செய்யத் தவறும் போது போராட்டக்குரல் எழுப்ப வேண்டியது நம்முடைய கடமையும் கூட. அகில இந்திய இன்சூரன்ஸ் ஊழியர் சங்கம் நமக்கு கற்றுக் கொடுத்திருப்பதும் அதைத்தான்.

வாழ்த்துக்களுடன்

தோழமையுள்ள

ஒப்பம் எஸ்.ராமன்

                    பொதுச்செயலாளர்