Tuesday, December 11, 2018

மோடிக்கு அடி – ஸ்வீட் எடு, கொண்டாடு . . .


இனிப்பு சாப்பிட்டு கொண்டாடுவோம் . . .



இந்த நாள் நல்ல நாள்.

மோடி அரசின் வீழ்ச்சியின் தொடக்க நாள்.

போலி வாக்குறுதிகளும் பொய் முழக்கங்களும் கொடுத்து ஆட்சிக்கு வந்த அயோக்கியர் கூட்டத்தின் அந்திமக் காலம் நெருங்கி விட்டது என்ற செய்தி தேசமெங்கும் ஒலித்த திரு நாள்.

வடக்கில் ஒன்று, கிழக்கில் ஒன்று, தெற்கில் ஒன்று, மத்தியில் இரண்டு என ஐந்து மாநிலங்களிலும் தாமரை கருகியது தேசத்திற்கு விடியல் நிச்சயம் என்ற நம்பிக்கையை அளித்துள்ளது.

விஷம் கக்கும் பேச்சுக்களால் வெறுப்பைத் தூண்டுவது, மதத்தின் பெயரால் மக்களை பிளப்பது,  தரந்தாழ்ந்த உரைகள் மூலம் கேவலமான தாக்குதல் நடத்துவது போன்ற மோடியின் அம்புக்கள் அனைத்தையும் மக்கள் முனை மழுங்க வைத்து விட்டனர்.

ஐந்து மாநிலங்களிலும் பாஜக நிராகரிக்கப்பட்டதை விட ஒரு மகிழ்ச்சியான செய்தி வேறு ஏதெனும் இருக்க முடியுமா என்ன?

ஸ்வீட் எடுங்க, கொண்டாடுங்க . . .

பிகு:

மூன்று மாநில வெற்றிக்காக காங்கிரஸ் கட்சிக்கு வாழ்த்து கூறும் அதே வேளையும் இந்த வெற்றியின் மூலம் மிதப்போ, திமிரோ, சுணக்கமோ வந்தால் அது நாடாளுமன்றத் தேர்தலில் மீண்டும் பாஜக விற்கு அழைப்பு கொடுப்பதாகவே அமைந்து விடும் என்ற எச்சரிக்கையையும் சொல்ல வேண்டியுள்ளது.

பொறுப்போடு மக்கள் நலன் சார்ந்து செயல்படுங்கள், இனியாவது. .

பாரதி பிறந்த நாளை முன்னிட்டு



மகாகவி பாரதி பிறந்த நாளை முன்னிட்டு என் மகன் வயலினில்
வாசித்த அவரது "நிற்பதுவே, நடப்பதுவே" பாடலின் யூட்யூப் இணைப்பு கீழே உள்ளது.



உங்களின் கருத்துக்கள் அவனை உற்சாகமூட்டும்


Monday, December 10, 2018

மோடி பேச்சும் காக்கா கறியும் . . .



"இந்தியாவில் பிறக்காதவர்களுக்கு காங்கிரஸ் கட்சி பிறப்புச் சான்றிதழ் வழங்குகிறது. இறப்புச் சான்றிதழும் தருகிறது. அவர்களுக்கு விதவை பென்ஷனும் தருகிறது.  போலி அக்கவுண்டுகள் மூலமாக தரப்படும் விதவைப் பென்ஷன் தொகையெல்லாம் காங்கிரஸ் கட்சியின் எந்த விதவைக்கு  செல்கிறது?"


இதுதான் ராஜஸ்தான் தேர்தல் பிரச்சாரக் கூட்டத்தில் நரேந்திர மோடி பேசியது.

விதவைப் பென்ஷன் திட்டத்தில் ஊழல் நடந்திருந்தால் அந்த ஊழலைச் செய்தவர்கள் மீது நடவடிக்கை எடுக்கட்டும். அதைச் செய்தவர் சோனியா காந்தி என்றால் அவரை கைது செய்து வழக்கு போடட்டும்.

அதை விடுத்து இந்தியாவில் பிறக்காதவர், காங்கிரஸ் கட்சியின் விதவை என்றெல்லாம் பேசுவது படு மட்டமாக உள்ளது.

சோனியாவை இழிவு படுத்துவது மட்டுமல்லாமல் ஒட்டு மொத்தமாக விதவைகளையே நையாண்டி செய்வதாக அவரது உடல் மொழி அமைந்துள்ளது. நாடாளுமன்ற விவாதத்திலேயே அவரது உடல் மொழி எவ்வளவு அசிங்கமாக, தரம் கெட்டுப் போயிருந்தது என்பதை நாம் பார்த்தோம்.

இப்போது இன்னும் கேவலமாக கீழிறங்கியுள்ளார்.

நாலாந்தர, ஐந்தாம்தர பேச்சாளர்களை விட நரகல் நடையில் பேசும் நரேந்திர மோடி இந்தியாவின் பிரதமர் என்பது எவ்வளவு வெட்கக் கேடானது?

இவரது பேச்சை இவர் கட்சிக்காரர்கள் கைதட்டி ஆரவாரம் செய்து ரசிக்கிறார்கள்.

தலைவனே படு கேவலம் என்கிற போது தொண்டர்கள் மட்டும் என்ன உத்தமர்களாகவா இருக்கப் போகிறார்கள்!

காக்கா கறி சாப்பிட்டால் காக்கா குரல் வராம உன்னிகிருஷ்ணன் குரலா வரும்!!!

குஜராத்காரரே ஓடிட்டாரே மோடி???



தன்னுடைய அடிமுட்டாள்தன திட்டமான "செல்லா நோட்டு" விவகாரத்திற்கு ரகுராம்ராஜன் சரிப்பட்டு வர மாட்டார் என்று ரிசர்வ் வங்கி ஆளுனராக மோடி கொண்டு வந்த குஜராத்காரர் உர்ஜித் படேல்.

ரிசர்வ் வங்கியின் சுயேட்சைத்தன்மையை பாதுகாக்க வேண்டும், அதனை அரசாங்கத்தின் தொங்கு சதையாக மாற்ற முடியாது என்று ரிசர்வ் வங்கிக்கும் மோடி அரசுக்கும் இடையே நடந்து வந்த பனிப்போரின் தொடர்ச்சியாக "சொந்தக் காரணங்கள்' என்று சொல்லி உர்ஜித் படேல் ரிசர்வ் வங்கி ஆளுனர் பதவியிலிருந்து ராஜினாமா செய்து விட்டார்.

மோடியின் மூடத்தனத்திற்கு அவரால் கொண்டு வரப்பட்ட ஒரு குஜராத்காரராலேயே ஈடு கொடுக்க முடியவில்லை என்பது நிதர்ஸனமான உண்மை.

எஞ்சியிருக்கும் காலத்தில் இன்னும் என்னென்ன நாச வேலைகளை மோடி நிகழ்த்தப் போகிறாரோ?


Sunday, December 9, 2018

பேயோட்ட வந்தாராம் சீ.சீ.ரவி சாமியார் . . .



தஞ்சை பெரிய கோவிலிலிருந்து துரத்தப்பட்ட சீ.சீ.ரவிசங்கர் சாமியார், அங்கே நிகழ்ச்சி நடத்த வந்ததற்கான முக்கியமான காரணம் என்ன தெரியுமா?

கீழே உள்ள செய்தியைப் படியுங்கள்.



ராஜராஜ சோழன் ஆன்மா சாந்தியடையவில்லையாம். அதற்காகத்தான் அவர் நிகழ்ச்சி நடத்த வந்தாராம்.


ஏற்கனவே சதயத் திருவிழாவில் கலந்து கொண்டவர்களுடைய பதவி பறி போய் விடும் என்று ஒரு பழைய புரளி உள்ளது. 



இப்படி மூட நம்பிக்கையை பரப்புபவர்களை நியாயப்படி கைது செய்து உள்ளே தள்ள வேண்டும். ஆனால் சீ.சீ.சாமியாரின் காலில் மண்டியிடுபவர் பிரதமராக இருக்கையில் அதெல்லாம் எங்கே நடக்கப் போகிறது?

ஆனால் ஒன்று தெளிவாகி விட்டது.

சீ.சீ.சாமியார் வாழும் கலையை கற்றுத்தரும் சாமியார் இல்லை, பேயோட்டுவதாக பிழைப்பு நடத்தும் போலிச்சாமியார்தான் என்று.

நோஞ்சான்களின் வல்லரசு


பொருளியல் அரங்கம்-க.சுவாமிநாதன்




உலக ஊட்டச்சத்து அறிக்கை - 2018 வெளியிட்டுள்ள தகவல்கள் பெரும் அதிர்ச்சியைத் தந்துள்ளன. உலகில் ‘குட்டை’ குழந்தைகளும் ‘மெலிவான’ குழந்தைகளும் இந்தியாவிலேயே அதிகம் என்கிறது அவ்வறிக்கை. கோடிக்கணக்கான குழந்தைகள் ஊட்டச்சத்து இன்றித் தவிப்பதன் வெளிப்பாடு இது. இதோ அது குறித்த தொகுப்பு.

v ‘உலக ஊட்டச்சத்து அறிக்கை’ என்றால் என்ன?

லண்டனில் 2013ல் முதல் “வளர்ச்சிக்கான ஊட்டச்சத்து
மாநாடு” நடைபெற்றது.  ஆங்கிலத்தில் என்ஃபார்ஜி (N4G-NUTRITION FOR GROWTH) என்று அம்மாநாடு அழைக்கப்பட்டது. பிரிட்டன், பிரேசில்,  ஜப்பான் ஆகிய நாடுகளின் அரசாங்கங்கள், கொடையாளர்கள், சிவில் சமூக அமைப்புகள் இம்மாநாட்டை முன்னின்று நடத்தினர். 100க்கும் மேற்பட்ட பங்கேற்பாளர்கள் மாநாட்டின் முடிவுகளை ஏற்றுக்கொண்டு உறுதிமொழிகளையும் தந்தார்கள். 2014ல் உலக ஊட்டச்சத்து அறிக்கை வெளியீடு துவக்கப்பட்டது.

என்னென்ன நடவடிக்கைகள் ஊட்டச்சத்து தொடர்பாக பின்தொடர்ந்து எடுக்கப்பட்டன?

2014ல் இரண்டாவது சர்வதேச மாநாடு இத்தாலியின் தலைநகரான ரோமில் நடைபெற்றது. 170 அரசாங்கங்கள், 100 தொழிலகங்கள் உள்ளிட்டு 2200 பிரதிநிதிகள் பங்கேற்றனர். இதில் ரோம் பிரகடனம் வெளியிடப்பட்டது. ‘‘எல்லோருக்கும் ஊட்டச்சத்து உணவு’’ என்பதை உறுதி செய்யக்கூடிய வகையில் சத்துணவுக் குறைபாட்டை ஒழித்தல், உணவு முறைகளை மாற்றுதல் ஆகியனவற்றைப் பரிந்துரைத்தது.

2015-ல் “நிலைக்கத்தக்க வளர்ச்சி இலக்குகள்” வெளியிடப்பட்டு அதன் ஒரு பகுதியாக 2030-இல் சத்துணவு குறைபாட்டை ஒழிப்பதென்ற கால வரையறையும் அறிவிக்கப்பட்டது. 2016-இல் ஊட்டச்சத்தை உறுதி செய்வதற்கான முதலீடுகளை அதிகரிப்பதற்கான இலக்குகள் 2025-இல் எட்டப்படுமென்று அறிவிக்கப்பட்டது. அதே ஆண்டில் “ஊட்டச்சத்திற்கான பத்தாண்டு செயல்திட்டம்” ஐ.நா.சபையால் அறிவிக்கப்பட்டது. 2017-இல் இத்தாலியிலுள்ள மிலன் நகரில் நடைபெற்ற சர்வதேச ஊட்டச்சத்து மாநாட்டில் உலகம் முழுமைக்கான நிதி உறுதிமொழிகள் வழங்கப்பட்டன.

2018 - உலக ஊட்டச்சத்து அறிக்கை தருகிற அதிர்ச்சிகரமான தகவல்கள் என்ன?

நவம்பர் 29, 2018 அன்று இவ்வறிக்கை வெளியிடப்பட்டுள்ளது. உலகத்திலுள்ள “குட்டையான” குழந்தைகளில் மூன்றில் ஒரு குழந்தை இந்தியாவிலே உள்ளது. அதாவது 4 கோடியே 66 லட்சம் குழந்தைகள் வயதுக்கேற்ற உயர்த்தோடு இல்லை. ஆங்கிலத்தில் STUNTED CHILDREN என்கிறார்கள். இதற்கு காரணம் நீண்டகாலம் சத்துணவின்றி இருப்பதும், அடிக்கடி நோய்வாய்ப்படுவதுமே ஆகும்.

எடைகுறைவான “மெலிந்த” குழந்தைகளும் இந்தியாவில்தான் அதிகம். அதாவது உயரத்திற்கேற்ற எடை இல்லாத குழந்தைகள் 2 கோடியே 55 லட்சம். இவர்களை   ஆங்கிலத்தில் WASTED CHILDREN என்பார்கள். ஐந்து வயதுக்குட்பட்ட குழந்தைகளின் மரண விகிதம் அதிகமாக இருப்பதற்கு இந்நிலைமையே காரணம். உணவு போதாமை, நோய்கள் ஆகியனவே காரணிகளாகும்.

உலகம் முழுவதிலும் 15 கோடியே 80 லட்சம் குழந்தைகள் உயரம் குறைந்தவர்களாகவும், 5 கோடியே 50 லட்சம் குழந்தைகள் எடை குறைந்தவர்களாகவும் உள்ளனர்.

“வளர்ச்சி” என்றும் “வல்லரசுக்கனவு” என்றும் பேசுகிற இந்தியாவே இதில் முதலிடம் என்பதே வேதனையான உண்மையாகும்.

குறைபாடுடைய குழந்தைகளின் எண்ணிக்கை இந்தியாவில் அதிகம் போல உள்ளதே!

அதிலென்ன சந்தேகம். வளர்ச்சி குன்றிய குழந்தைகளின் உலக சராசரி 21 சதவீதம் எனில் இந்தியாவில் 40 சதவீதக் குழந்தைகள் இக்குறைபாட்டோடு உள்ளன.

எடைக்குறைவிலோ உலக சராசரியை விட இந்திய சராசரி மிக மிக மோசம். உலக சராசரி 6 சதவீதம் எனில் இந்திய சராசரி கிட்டத்தட்ட 21 சதவீதம்.

மொத்தக் குழந்தைகளில் இத்தனை சதவீதம் இப்படி உடல்நலம் குன்றியவையாக இருந்தால் நாடு மட்டும் எப்படி நலத்தோடு இருக்க முடியும்? இப்பட்டியலைப் பாருங்கள்... மொத்தக் குழந்தைகளில் குறைபாடுடையவர்களின் சதவீதம்....

நாடு                                         உயரம்                     எடை        
                                                  குறைவு %             குறைவு % 

பாகிஸ்தான்                             45.0                          10.5
இந்தியா                                     37.9                            20.8
வங்காள தேசம்                      36.2                            14.4
தென் ஆப்பிக்கா                 27.4                               2.5
சீனா                                             8.1                               1.9
பிரேசில்                                     7.1                               1.6

உலக சராசரி                         21.44                            6.07


பாகிஸ்தானை விட வளர்ச்சி குன்றுவதில் சற்று நல்ல சதவீதம் கொண்டிருந்தாலும் எடை குறைவில் பாகிஸ்தானுக்கும் கீழே இருக்கிறோமே!

இந்திய ஆட்சியாளர்களின் “தேசியம்” நம்மை எதற்கெடுத்தாலும் பாகிஸ்தானோடு ஒப்பிட வைக்கிறது. ஆனால் இந்திய மாநிலங்களுக்குள்ளான ஒப்பீடைப் பார்த்தால் மூச்சு நின்று விடும். உத்தரப் பிரதேசத்தில் வளர்ச்சி குன்றிய குழந்தைகள் பக்ரைன் மாவட்டத்தில் 65 சதவீதம். சிரஸ்வதி மாவட்டத்தில் 64 சதவீதம்.யோகிகள் இதைப்பற்றி யோசிக்க வேண்டாமா? ஜார்க்கண்ட் மாநிலத்து பஸ்சிமி சிங்பூம் மாவட்டத்தில் 59 சதவீதம். வடக்கு மற்றும் மத்திய மாநிலங்களில் எல்லாம் இப்படி நிலைமை மிக மோசமாக உள்ளது. தெற்கு பரவாயில்ல. 20 சதவீதத்திற்கு கீழ் உள்ளது.

மற்ற நாடுகளின் நிலைமை என்ன?

ஏற்கெனவே சதவீதத்தில் பட்டியல் தரப்பட்டுள்ளது.141 நாடுகள் ஆய்வு செய்யப்பட்டுள்ளன. இதில் 88 நாடுகளில் ஏதாவது ஒருவகை சத்துணவுக் குறைவு உடையதாய் உள்ளன. எண்ணிக்கையில் இந்தியாவிற்கு அடுத்து வளர்ச்சி குன்றிய குழந்தைகள் நைஜீரியாவில் அதிகம். அங்கு 1கோடியே 39 லட்சம். அதற்கடுத்து பாகிஸ்தான் 1 கோடியே 7 லட்சம். இந்தியா, நைஜீரியா, பாகிஸ்தான் ஆகிய மூன்று நாடுகளில் மட்டுமே உலகம் முழுவதிலும் உள்ள வளர்ச்சி குன்றிய குழந்தைகளில் பாதிக்கு பாதி உள்ளனர். எடை குறைந்த குழந்தைகளில் இந்தியாவிற்கு அடுத்த இரண்டு இடங்களைப் பிடிக்கிற நாடுகள் நைஜீரியா (34 லட்சம்), இந்தோனேசியா (33 லட்சம்) உலகத்திற்கே மருந்து சீட்டு என்று பரிந்துரைக்கப்பட்ட உலகமயப் பொருளாதாரப் பாதை இன்னோரு தலைமுறையின் எதிர்காலத்தையே பாதித்திருக்கிறது என்பதே இதன் மூலம் தெளிவாகிறது.

என்னதான் தீர்வு?

மாநிலத்திற்கு மாநிலம் சத்துணவு குறித்த சதவீதங்கள் மாறுபடுகின்றன. அரசியல் உறுதி, நிர்வாகத் திறன், கல்வியறிவு, பெண்களுக்கு அதிகாரம் ஆகியனவும் குழந்தைகளின் உடல் நலனில் பிரதிபலிப்பவை என்பதன் வெளிப்பாடே இது. இந்து நாளிதழின் டிசம்பர் 5 தலையங்கத்தின் ஒரு கருத்து முக்கியமானது. “உணவும் சுதந்திரமும் கைகோர்த்து நடைபோட வேண்டும்” என்பதே அது. இவை இரண்டும் ஒன்றையொன்று வலுப்பெறச் செய்பவை. வறுமையற்ற சூழலே திறனை வளர்ப்பதற்கான உந்துதலைத் தரும். அங்கன்வாடிகளின் செயல்பாடுகளை மேம்படுத்த வேண்டும். பெண்கல்வி, திருமண வயது, மகப்பேறுக்கு பிந்தைய கவனிப்பு ஆகியனவும் கருத்தில் கொள்ளப்படவேண்டும். 


அடுத்து “ரெடிமேட்” உணவுகள். இந்தியாவில் விற்பனையாகும் பாக்கெட் உணவுகளில் 21 சதவீதமானவை மட்டுமே தரமானவை ஆகும். அதாவது, சர்க்கரை , உப்பு, கொழுப்பு, புரதம், கால்சியம் போன்றவை உரிய அளவில் இல்லாத உணவுகளே 79 சதவீதம் ரெடிமேட் வகையறாக்களாக கிடைக்கின்றன.மூன்றாவது உடல் நலத்திற்கான அரசின் ஒதுக்கீடு. 2017-18 பொருளாதார ஆய்வின்படி உடல் நலத்திற்கான ஒதுக்கீடு மொத்த உள்நாட்டு உற்பத்தியில் (ழுனுஞ) 6.6 சதவீதம் ஆகும். ரொம்ப காலமாக 6 சதவீதத்தை ஒட்டியே உடல் நலத்திற்கான ஒதுக்கீடுகள் உள்ளன. இது ஆரோக்கியமான தேசத்தை உருவாக்க போதாது.ஒருபக்கம் ஒதுக்கீடுகள் வெட்டப்படும் போது, மருத்துவச் செலவுகளின் பாய்ச்சல் பணவீக்க விகிதத்தை விட இரண்டு மடங்கு உள்ளது. மருத்துவ செலவின போக்கு விகிதம் (ஆநனiஉயட கூசநனே சயவந) 10 சதவீதம் ஆகும். பணவீக்கம் 5 சதவீதம். மருத்துவமனை உள்நோயாளி செலவுகளை விட புறநோயாளி செலவுகளே அதிகமென்று ஆய்வுகள் கூறுகின்றன. 

2020-இல் வல்லரசு என்றார்கள். 2030 என்று இப்போது சொல்கிறார்கள். வளர்ச்சி விகிதங்கள் பற்றியும் புருவங்கள் விரிய விரிய அமைச்சர்கள் பேசுவதைப்பார்க்கிறோம். 

56 இன்ச் மார்பு உள்ள பிரதமர் என்று வேறு பெருமை பேசுகிறார்கள். ஏழுகோடி குழந்தைகளை குள்ளர்களாக, எலும்பர்களாக வைத்துள்ள தேசம் எப்படி வல்லரசு ஆக முடியும்?

நன்றி - தீக்கதிர் 09.12.2018

Saturday, December 8, 2018

ஜெமோவிற்கு பதில் சாரு




சாகித்ய அகாடமி விருது அறிவிக்கப்பட்டாலே அத்துடன் ஒரு சர்ச்சையும் சேர்ந்தே வரும்.

அந்த சர்ச்சையின் ஆதாரமாக பெரும்பாலும் ஜெயமோகனே இருப்பார்.

அந்த படைப்பிலே
அழகியல் இல்லை,
உண்மையின் ஒளி இல்லை,
உப்பு இல்லை,
புளி இல்லை,
மிளகாய்த்தூள் இல்லை

என்று பக்கம் பக்கமாக எழுதுவார்.

திராட்சை கிட்டாத நரியின் புலம்பலாகவே அது இருக்கும்.

ஆனால் என்ன மாயமோ, மந்திரமோ தெரியவில்லை.  இந்த முறை எஸ்.ராமகிருஷ்ணனுக்கு சாகித்ய அகாடமி விருது கிடைத்ததற்கு வாழ்த்து தெரிவித்து விட்டார். இதற்கு முன்பாக வண்ணதாசனுக்கு வாழ்த்து தெரிவித்திருந்தார். விஷ்ணுபுரம் விருது வேறு அப்போது கொடுத்ததாலோ என்னவோ, ஜெமோ தன் வழக்கமான வேலையைக் காண்பிக்கவில்லை.

ஜெயமோகன் புலம்பாவிட்டால் என்ன? அந்த இடத்தில் நான் இருக்கிறேன் என்று சாரு நிவேதிதா புலம்பி விட்டார்.

எஸ்.ராவுக்கு நோபல் பரிசு கொடுக்கனும், புக்கர் பரிசு கொடுக்கனும் என்று சாரு எழுதியதை புலம்பல் என்று சொல்லாமல் வேறெப்படி சொல்வது?

பிகு:

தோழர் சு.வெங்கடேசனுக்கு "காவல் கோட்டம்" நாவலுக்காக சாகித்ய அகாடமி விருது கிடைத்த போது எஸ்.ரா அதனை "ஆயிரம் பக்க அபத்தம்" என்று வசை பாடியது, எஸ்.ராவுக்கு தோழர் சு.வெ வாழ்த்து சொன்ன போது நினைவுக்கு வரத்தான் செய்தது. 


பாத்து போங்கய்யா! பதறுது . . .


நேற்று சென்னை போய் விட்டு இரவு வேலூர் திரும்பிக் கொண்டிருந்தோம். 

இரவு பதினோறு மணியைக் கடந்திருந்தது. சுங்குவார் சத்திரத்திற்கு கொஞ்சம் முன்பாக ஒரு இளைஞன், எங்கள் வாகனத்தை அதி வேகமாகக் கடந்தான். ஆக்டிவா தான். தலையில் ஹெல்மெட் இல்லை. முன்னே செல்லும் கார்களையும் லாரிகளையும் வேகம் வேகமாக கடந்ததும், இரண்டு லாரிகளுக்குள் நுழைந்து நுழைந்து வளைந்து நெளிந்து சென்றதும் மனதை பதற வைத்தது.

ஜாக்கிரதையாக செல்லுப்பா என்று சொல்ல வேண்டும் என்று நினைத்தாலும் அதற்கெல்லாம் வாய்ப்பில்லாமல் எங்கோ வேகமாக புள்ளியாய் மறைந்து போய் இருந்தான்.

என்னதான் அதிவேகமாக பறந்தாலும் கிடைக்கக் கூடிய உபரி நேரம் என்பது அரை மணி நேரமோ அல்லது ஒரு மணி நேரமோ. 

உயிரை விட, விபத்தினால் உருவாகும் உபாதைகள் தரும் வலி மற்றும் அவதிகளை விட அந்த ஒரு மணி நேரம் முக்கியமா? 

ஒரு தகப்பனாக, விபத்தின் விளைவுகளை அறிந்தவனாகச் சொல்கிறேன்.

பார்த்துப் போங்கய்யா! ஜாக்கிரதையா போங்கய்யா!!

Friday, December 7, 2018

சீ.சீ.சாமியார் என்னய்யா ஸ்பெசலு?






தஞ்சைக்கு மட்டுமல்ல தமிழகத்திற்கும் அடையாளமாக இருக்கிற பிரகதீஸ்வரர் கோயிலிற்குள் அந்த பிரம்மாண்டமான கோயிலை உருவாக்கிய ராஜராஜசோழனின் சிலையை வைக்கவே தொல்லியல் துறை மறுத்து விட்டது.

யுனெஸ்கோ அங்கீகரித்த மரபுச்சின்னத்தின் பாரம்பரியத்தை பாதுகாக்க வேண்டுமாம். 

கோயிலைக் கட்டிய ராஜராஜசோழனுக்கே அனுமதி கிடையாது என்று சட்டத்தை கறாராக பின்பற்றிய தொல்லியல் துறை,

சீ.சீ.ரவிசங்கர் சாமியார், அதே தஞ்சை பிரகதீஸ்வரர் கோயில் பிரகாரத்திற்குள் அடைத்து வைத்த பந்தல் போட்டு ஆளுக்கு ஆயிரம் ரூபாய் வசூல் செய்து ஆன்மீக உபன்யாசம்(!) செய்து கல்லா கட்ட எப்படி அனுமதி அளித்தது?

கோயிலைக் கட்டிய ராஜராஜ சோழனை விடவும் சீ.சீ.சாமியார் அப்படி என்ன ஸ்பெசல்?

நான்கு கோடி ரூபாய் அபராதம் வசூலிக்கும் அளவிற்கு முன்பு யமுனையை நாசமாக்கவும் அந்த கலை விழாவுக்கு தற்காலிக பாலம் அமைக்க ராணுவத்தை கூலிப்படையாக மாற்றிய அவலமும் முன்பு நடந்தது. 

சீ.சீ.சாமியாரிடம் ஏன் அனைத்து அதிகார அமைப்புக்களும் வாலை குழைத்துக் கொண்டு அடி பணிகிறார்கள்?

ஊழலை ஒழிப்பேன் என்று கொஞ்ச வருடம் முன்பு கிளம்பி இப்போது ஆழ்துயிலில் இருக்கும் அன்னா ஹசாரே மாதிரியான ஆசாமிகளுக்கு இதெல்லாமும் ஊழல் என்று புரியுமா?

பிகு:

படங்கள் உதவி:  எங்கள் தஞ்சைத் தோழர் களப்பிரன்

Wednesday, December 5, 2018

சினிமாவில் அமாவாசை, நிஜத்தில் மொட்டைச்சாமியார்


அமைதிப்படை படத்தில் ஒரு காட்சி வரும்.  அமாவாசைக்கு எதிரான போலீஸ் இன்ஸ்பெக்டரை கொலை செய்வதற்காக ஒரு கலவரத்தை தூண்டி அதிலே அவரை உயிரோடு எரிப்பார்கள்.

உபியில் நடந்ததும் அதுதான். முகமது அக்லக் வைத்திருந்தது ஆட்டிறைச்சிதான் என்பதை பதிவு செய்த இன்ஸ்பெக்டர் சுபோத்காந்த் சிங்கும் மாட்டிறைச்சியின் பெயரால் நடத்தப்பட்ட கலவரத்தில் கொல்லப்பட்டுள்ளார். 

சினிமா வில்லனை விட நிஜ வில்லன் மொட்டைச்சாமியார் கொடூரமானவர்


சின்ன தொகை, பெரிய நம்பிக்கை




கஜா புயலால் பாதிக்கப்பட்ட மக்களுக்கு நிவாரண உதவி செய்ய எங்கள் தோழர்களிடம் நிதி கேட்டு அறைகூவல் விடுத்தோம்.  தோழர்களும் தாராளமாக அள்ளிக் கொடுத்தனர். கிட்டத்தட்ட இரண்டே முக்கால் லட்சம் ரூபாய். தஞ்சைக் கோட்டச் சங்கத்தின் வழிகாட்டுதல்படி, அவர்களின் கடுமையான பணியின் ஒரு பகுதியாக இப்போது பட்டுக்கோட்டை நோக்கி எங்களால் இயன்ற உதவியை வழங்க சென்று கொண்டிருக்கிறோம்.  

நிதி வசூல் தொடர்பாக சில தகவல்களை மன நிறைவோடு பகிர்ந்து கொள்வதுதான் இப்பதிவின் நோக்கம்

எங்கள் அரக்கோணம் கிளைச் செயலாளர் தோழர் ஆர்.குமரேசன் பகிர்ந்து கொண்ட ஒரு தகவல் .

அரக்கோணம் கிளைப் பொறுப்பாளர்கள், அரக்கோணம் கிளைத் தோழர்களிடம் பட்டியலைக் கொடுத்து நிதியை சேகரிக்கையில் தனது இன்சூரன்ஸ் பிரிமியத்தை செலுத்த வந்த ஒரு பாலிசிதாரர், என்ன விபரம் என்பதைக் கேட்டறிந்து என்னுடைய பங்களிப்பாக வைத்துக் கொள்ளுங்கள் என்று ஒரு ஐநூறு ரூபாயை அளித்துள்ளார். இத்தனைக்கும் அந்த பாலிசிதாரருக்கு எந்த ஒரு ஊழியரோடும் நேரடியாக பரிச்சயம் கிடையாது.

இருப்பினும் பாதிக்கப்பட்ட மக்களுக்கு தானும் உதவ வேண்டும் என்ற நல்லெண்ணத்தில் தன்னால் முடிந்த தொகையை கொடுத்துள்ளார்.

வேலூர் கிளையின் ஒரு மூத்த முகவர், உங்கள் சங்கம் நிவாரண உதவி செய்யவுள்ளதா என்று கிளைத்தலைவர் தோழர் பி.எஸ்.பாலாஜியிடம் தொலைபேசியில் கேட்டு இரண்டாயிரம் ரூபாய் கொடுத்து விட்டு சென்றுள்ளார்.

எங்கள் கோட்டத்தின் முதல் பொதுச்செயலாளர் தோழர் ஆர்.ஜகதீசன், இப்போது ஹைதராபாத்தில் உள்ளார். நிவாரண நிதியாக ஆயிரம் ரூபாய் கொடுக்க விரும்புவதாக மெஸஞ்சர் மூலம் தொடர்பு கொண்டு வங்கி எண்ணை அனுப்பிய அடுத்த நிமிடம் பணத்தை அனுப்பி வைத்தார். 

சின்ன கல்லு, பெத்த லாபம் என்பது திரைப்பட வசனம். 

சின்ன தொகை என்று சொல்லி அவர்கள் கொடுத்தார்கள். ஆனால் அவையெல்லாம் மனிதம் இன்னுடன் உயிர்ப்போடுதான் இருக்கிறது என்ற பெரிய நம்பிக்கையை விதைத்தது அவர்கள் செயல்.



சஞ்சாரத்திற்கு விருது. வாழ்த்துக்கள் எஸ்.ரா


இந்த வருட சாகித்ய அகாடமி விருது "சஞ்சாரம்" நாவலுக்காக எஸ்.ராமகிருஷ்ணன் அவர்களுக்கு கிடைத்துள்ளது. மனமார்ந்த வாழ்த்துக்கள்.

பொதுவாக சாகித்ய அகாடமி அளிக்கப்பட்ட நூல்களை விருது அறிவிக்கப்பட்ட  பிறகே வாங்கிப் படித்துள்ளேன் (போன வருடம் விருது அளிக்கப்பட்ட தோழர் இன்குலாபின் "காந்தள் நாட்கள்" உட்பட).

சஞ்சாரம் நாவலை 2015 ம் வருடம் சென்னை புத்தக விழாவில் உயிர்மை பதிப்பக அரங்கில் வாங்கினேன். அப்போது எஸ்.ரா அங்கிருந்ததால் அவருடைய கையெழுத்தையும் அதில் பெற்றுக் கொண்டேன்.  

அந்த வருடம்  எங்கள் அகில இந்திய செயற்குழுக் கூட்டத்திற்காக புவனேஸ்வர் சென்ற போது இரயிலில் படிக்கத் தொடங்கினேன். கூட்டம் முடிந்து திரும்பி வருகையிலும் ரயில் சினேகிதனாக சஞ்சாரமே இருந்தது. 

அவமதிப்புக்கு உள்ளாகிற நாகஸ்வரக் கலைஞன் பக்கிரி, பழி வாங்குவதற்காக திருவிழாப் பந்தலை கொளுத்தி விட்டு தப்பித்துச் செல்வதில் தொடங்குகிற நாவல், பல்வேறு நாகஸ்வரக் கலைஞர்களின் வாழ்வை, பலத்தை, பலவீனத்தை சொல்கிற கதைகளின் தொகுப்பாக, ஒன்றோடு ஒன்று தொடுக்கப்பட்ட மாலையாக விரியும்.

தஞ்சை மாவட்டத்தில் மட்டும் நாகஸ்வரக் கலை வளர்க்கப்பட வில்லை, நெல்லை மாவட்டத்திற்கும் அந்த பாரம்பரியம் உண்டு என்பதை நாவல் அழுத்தமாக பதிவு செய்து கொண்டே இருக்கும். 

வேகமாக நகர்கிற, சிறந்த வாசிப்பனுபவம் தந்த நாவல் "சஞ்சாரம்". 

அந்த நூலுக்கு விருது அளிக்கப்பட்டது மிகவும் பொருத்தமே. 

திரு எஸ்.ராமகிருஷ்ணனுக்கு மீண்டும் ஒரு முறை வாழ்த்துக்கள். 

பிகு:

இது தொடர்பாக ஒரு உலக அதிசயம் நடந்துள்ளது. அதை என்னவென்று கணிப்பவர்களுக்கு சாகித்ய அதிசயம் விருது வழங்கப்படும். கணிக்க முடியாதவர்கள், அடுத்த பதிவு வரை காத்திருக்கவும். 


மோடியின் முட்டாள் சீடனே, மூச்சு விடலாமா?



கும்ப மேளாவிற்கு வரும் சகல வித சாமியார்களுக்கும் (அது என்ன சகல விதம் என்ற எழவையெல்லாம் தனியாக வேறு எழுத வேண்டுமா என்ன?) சகல வசதிகளோடு தங்க வேண்டும் என்பதற்காக அலகாபாத் (நீ பெயரை மாற்றினால் மட்டும் அது மாறி விடுமா என்ன?)  நகரத்தில் மூன்று மாதம் யாருமே திருமணம் நடத்தக் கூடாது என்று தடை விதித்திருக்கும் மோடியின் பிரதான முரட்டு, முட்டாள் சிஷ்யனான மொட்டைச் சாமியார் யோகியே!

கும்பமேளா சமயத்தில் ஏழை எளிய நடுத்தர மக்களுக்கு மூச்சு விடுவதற்காவது அனுமதி உண்டா?

இல்லை சாதாரண மக்களின் மூச்சு காற்று மண்டலத்தில் கலந்து அது சாமியார்கள் மீது பட்டு தோஷம் உண்டாகி விடும், சாஸ்திரக் குற்றம் உண்டாகி விடும் என்று சொல்லி அதற்கும் தடை விதிப்பீரா?

உம்மையெல்லாம் முதல்வராக்கிய குற்றத்திற்கு உ.பி மக்கள் இன்னும் எத்தனையெத்தனை கொடுமைகளை அனுபவிக்க வேண்டியிருக்குமோ?

ஆனால் ஒன்றய்யா!

நீ மோடியையே நல்லவனாக்க முயற்சி செய்கிறாய்!!!

Tuesday, December 4, 2018

போப்பாண்டவர் சொன்னது சாமியார்களுக்கும் பொருந்தும் . . .



"பாதிரியார்களோ அல்லது கன்னியாஸ்திரிகளோ, அவர்களால் பிரம்மச்சர்யத்தை கடைபிடிக்க முடியாவிட்டால் அவர்கள் அந்த பொறுப்பிலிலிருந்து விலகி விடுங்கள்"

என்று போப்பாண்டவர் கூறியுள்ளது மிகவும் சரியானது.

பாலியல் வன் கொடுமைகள் மற்றும் முறைகேடுகள் தொடர்பான புகார்கள் அதிகரித்து வரும் வேளையில் பசும்தோல் போர்த்திய புலிகளாக இருக்காதீர்கள். உங்களால் கட்டுப்பாட்டுகளுக்கு உட்பட முடியவில்லையென்றால், உணர்வுகளை திருமண வாழ்விற்கு சென்று விடுங்கள் என்பதுதான் இதன் அர்த்தம்.

இதனை வெளிப்படையாகச் சொன்னதற்கு போப்பாண்டவரைப் பாராட்ட வேண்டும்.

இது பாதிரியார்களுக்கு மட்டுமல்ல, அனைத்து மத சாமியார்களுக்கும் பொருந்தக் கூடியதுதான்.

முதன் முதலில் விஜயேந்திர சரஸ்வதி மீது புகார் வந்த போதே நான் சொன்னேன்.

"பாவம், சின்னப்பையன். அவனுக்கும் ஆசாபாசங்கள் இருக்கும். இல்லற வாழ்வில் ஈடுபட விருப்பமும் இருக்கும். இப்படி சாமியாராக்கி கட்டுப்பாடுகள் செய்தால், அதிலிருந்து விடுபட இப்படி தடம் மாறியுள்ளான். சாமியாராக திணிப்பதற்கு முன்பு விருப்பத்தை கேட்டிருக்க வேண்டும்"

என்று பலரிடமும் கூறினேன்.

ஆனால் சாமியாராவதே இது போன்ற வாய்ப்புக்களுக்குத்தான் என நித்யானாந்தாக்கள் உட்பட பல போலிச்சாமியார்கள் வாழும் உதாரணமாக தோன்றுகிறார்கள். 

என் செய்வது?

போலிச்சாமியார்களும் பாலியல் குற்றச்சாட்டுக்களும் ஓயாது. 

வெட்டவெளியில் - கைக்குழந்தையுடன் . . .


பிறந்து 17 நாட்களே ஆன கைக்குழந்தையுடன் வெட்டவெளியில் தவித்த முத்துலெட்சுமி

உதவிக்கரம் நீட்டிய எல்ஐசி ஊழியர்கள்




புதுக்கோட்டை, டிச.3-பிறந்து 17 நாட்களே ஆன கைக்குழந்தையுடன் வெட்டவெளியில் கடும் குளிருடன் புதுக்கோட்டை அருகே நெய்வாசல்பட்டியில் அவதிப்பட்டு வருகிறார் முத்துலெட்சுமி. அவருக்கு எல்ஐசி ஊழியர்கள் உதவிக்கரம் நீட்டியுள்ளனர். 

புதுக்கோட்டை அருகே நெய்வாசல்பட்டி கிராமத்தைச் சேர்ந்த பாண்டி மகள்முத்துலெட்சுமி. இவருக்கும் மதுரை மாவட்டம் மேலூரைச் சேர்ந்த பிரசாத்துக்கும் கடந்த ஆண்டு திருமணம் நடைபெற்றது. இந்நிலையில், கர்ப்பமடைந்த முத்துலெட்சமி பிரசவத்திற்காக கடந்த மாதம் தாய்வீடான நெய்வாசல்பட்டிக்கு வந்தார். கஜா புயல் வீசிய கடந்த 16ஆம்தேதியன்று காலையில் முத்துலெட்சுமிக்கு பிரசவ வலி ஏற்பட்டது. இதனைத் தொடர்ந்து ஆட்டோவில் முத்துலெட்சுமி வீட்டிலிருந்து ஏறும்போது முத்துலெட்சுமியின் கண்முன்னாலேயே தங்கியிருந்த வீடு புயலில் தரைமட்டமானது. 

புதுக்கோட்டை அரசு மருத்துவக்கல்லூரி மருத்துவமனையில் சேர்க்கப்பட்ட முத்துலெட்சுமிக்கு அறுவைச் சிகிச்சை மூலம் அழகான ஆண்குழந்தை பிறந்தது. பிரசவத்தில் பிரச்சனை இருந்ததால் கர்ப்பப்பையும் அகற்றப்பட்டது. இதனால் கடந்த சனிக்கிழமை வரைமருத்துவமனையில் இருந்த முத்துலெட்சுமி அன்று மதியம் வீடு திரும்பினார்.

ஆட்டுக்கொட்டகையில்

வீடு தரை மட்டமானதால் ஆட்டுக் கொட்டகையில் முத்துலெட்சுமியும் குழந்தையும் தங்க வைக்கப்பட்டுள்ளார். வெட்டவெளியில் ஆடுகளை கட்டுவதற்காக தாழ்வாகக் கட்டப்பட்டிருந்த தகரக் கொட்டகையில் கடந்த மூன்று நாட்களாக முத்துலெட்சுமி தங்கி வருகிறார். 

இந்நிலையில், நிவாரணப் பணிகளில் ஈடுபட்டிருந்த காப்பீட்டுக் கழக ஊழியர் சங்க நிர்வாகிகள் என்.கண்ணம்மாள், வி.லதாராணி, மார்க்சிஸ்ட் கம்யூனிஸ்ட் கட்சி ஒன்றியச் செயலாளர் ஜி.நாகராஜன் உள்ளிட்டோர் வெட்டவெளியில் கடும் குளிரில் நடுங்கிக்கொண்டிருந்த முத்துலெட்சுமியையும், குழந்தையையும் பார்த்தனர். 

அதிர்ச்சியடைந்த அவர்கள் தாய்க்கும், குழந்தைக்கும் தேவையான மெத்தை, துணிகள், சோலார் விளக்கு, கொசுவர்த்தி, ஹார்லிக்ஸ் பாட்டில் மற்றும் உணவுப் பொருட்களை வழங்கினர். 

புதுக்கோட்டைக்குப் பக்கத்தில் 5 கிலோ மீட்டர் தொலைவில் இப்படி அவதிப்பட்டு வரும் முத்துலெட்சுமியையும், குழந்தையையும் கவனிக்க ஆட்சியாளர்களுக்கும், அதிகாரிகளுக்கும் நேரமில்லையோ?

நன்றி : தீக்கதிர் 04.12.2018

Monday, December 3, 2018

பராசக்தி -பார்ப்போம், பரப்புவோம்



சமீபத்தில் கோவாவில் நடந்து முடிந்த சர்வதேச திரைப்பட விழாவில் மறைந்த கலைஞர் கருணாநிதி அவர்களை கௌரவிக்கக் கூடிய விதத்தில் அவர் வசனம் எழுதி வரலாறாகிய பராசக்தி படத்தை ஒளி பரப்ப இருந்தார்கள்.

ஆனால் காவிகள் உள்ளே புகுந்து குழப்பமேற்படுத்தி பராசக்தி படத்தின் திரையிடலை தடுத்து விட்டார்கள். பராசக்தி படத்திற்குப் பதிலாக மலைக்கள்ளன் படத்தை திரையிட்டுள்ளார்கள்.

அறுபது வருடங்களுக்குப் பிறகும் காவிகள் பராசக்தி திரைப்படத்தை, அதன் அனல் கக்கும் வசனங்களைக் கண்டு அஞ்சுகிறார்கள்.

“கோவில் கொடியவர்களின் கூடாரமாகி விடக் கூடாது”

“பக்தி பகல் வேஷமாகி விடக் கூடாது”

“பராசக்தி எந்த காலத்திலடா பேசினாள்”

என்ற இடி முழக்கங்கள் அவர்களின் இதயத்தை நடுங்க வைக்கிறது. வயிற்றை கலக்க வைக்கிறது.

அய்யப்பனையும் அயோத்தி ராமனையும் வைத்து கலவர அரசியல் நடத்தும் காவிக்கயவர்கள், கோயில் கொடியவர்களின் கூடாரமாகி விட்டது என்ற வசனம் கேட்கும் மக்களுக்கு கத்துவாவில் ஆசிபாவுக்கு நடந்த அவலமும் சிலைத் திருட்டு கேவலமும் நினைவுக்கு வந்தால் என்ன செய்வது என்று அஞ்சி விட்டார்கள்.

அதனால்தான் பராசக்தியை திரை போட்டு மறைத்து விட்டார்கள்.

அவர்கள் மறைத்தால் என்ன? நாம் பல்லாயிரம் முறை பகிர்ந்து கொண்டே இருப்போம்.

இந்தியத் திரை வரலாற்றின் மறக்க முடியாத நீதிமன்றக் காட்சி இங்கே



பராசக்தி திரைப்படத்தினை முழுமையாக கண்டு களிக்க இங்கே இணைப்பு    உள்ளது.

பராசக்தியை பார்க்க பார்க்க காவிகளுக்கு எரிச்சல் வருமென்றால் நாம் வாய்ப்புள்ள அனைத்து முறைகளிலும் பகிர்ந்து அந்த எரிச்சலை அதிகப்படுத்திக் கொண்டே இருப்போம்.

பிகு

நீதிமன்றக் காட்சியின் காணொளியை நான் கேட்டவுடன் அனுப்பிய எங்கள் தோழர் ஆரோக்கியராஜிற்கு நன்றிகள் பல. 

பத்தாவது மாடியிலிருந்து . . .

போன வாரம் சனிக்கிழமையன்று கோட்டச் செயலாளர்கள் கூட்டத்திற்காக எர்ணாகுளம் சென்றிருந்தேன்.

கூட்டம் நடந்த எல்.ஐ.சி எர்ணாகுளம் கோட்ட அலுவலகக் கட்டிடத்தின் பத்தாவது மாடியிலிருந்து எடுத்த படங்கள் கீழே உள்ளது.

கடலே கண்ணுக்குத் தெரியாமல் கட்டிடங்கள் மறைத்து விட்டன.





Sunday, December 2, 2018

ஆபரேஷனுக்குப் பதில் ஆயின்மென்டா?

ஜி.டி.பி கணக்குகள் பில்டிங் ஸ்ட்ராங்க்... பேஸ்மென்ட் வீக்...
பொருளியல் அரங்கம் 
க.சுவாமிநாதன்




வெள்ளிக்கிழமை மத்திய அரசு மொத்த உள்நாட்டு உற்பத்தி மதிப்பீடுகளை வெளியிட்டுள்ளது. இந்து பிசினஸ் லைன் (01.12. 2018) தந்துள்ள தலைப்பு ‘இரண்டாம் காலாண்டில் மொத்த உள்நாட்டு உற்பத்தி வளர்ச்சி 7.1 சதவீதமாக விழுந்துள்ளது’ என்பதே.

ஜி.டி.பி ன்னா என்ன?

எந்த காலத்திற்கு கணக்கிடுகிறோமோ, அக்காலத்தில் நடைபெறும் சரக்கு மற்றும் சேவை உற்பத்திகளின் மொத்த மதிப்பின் கூட்டுத்தொகை ஆகும். “மொத்த உள்நாட்டு உற்பத்தியின்” ஆங்கில வார்த்தையின் சுருக்கமே ஜி.டி.பி. (G.D.P - Gross Domestic product) ஆகும். தற்போது அடிப்படை

ஆண்டாக (BASE YEAR) 2011-12 உள்ளது. அந்த ஆண்டில் நிலவிய விலைகளின் அடிப்படையிலேயே ஜி.டி.பி விகிதங்கள் கணக்கிடப்படுகின்றன.

வெள்ளிக்கிழமை வெளியிடப்பட்டுள்ள அரசின் புள்ளிவிபரங்கள் தருகிற தகவல்கள் என்ன?

இது 2018-19 இரண்டாம் காலாண்டில் (Q2) மொத்த உள்நாட்டு உற்பத்தி 33.98 லட்சம் கோடிகளாகும். கடந்த ஆண்டு (2017-18) இதே காலாண்டில் மொத்த உள்நாட்டு உற்பத்தி 31.72 கோடிகளாக இருந்துள்ளது. கணக்கு கேட்டு பாருங்கள் ! 7.1 சதவீதம் என வளர்ச்சி விகிதம் மேற்கூறிய இரு  தொகைகளுக்கு இடையிலான வித்தியாசமே ஆகும். ஆனால் இந்த ஆண்டில் முதல் காலாண்டில் (2018 - 19) வளர்ச்சி விகிதம் 8.2 சதவீதமாக இருந்தது. கடந்த மூன்று காலாண்டுகள் என்று பார்த்தாலும் தற்போதைய 7.1 சதவீதம் என்பதே மிகக்குறைவு.

விவசாயத் துறை வளர்ச்சி எப்படி உள்ளது?

பட்ட காலிலேயே படும் என்பது விவசாயத்துறைக்கே பொருந்துவதாகும். இக்காலாண்டில் அதன் வளர்ச்சி 3.8 சதவீதம் என்பது மதிப்பீடு. இதுவே முதல் காலாண்டில் (ஏப்ரல் - ஜுன் 2018) 5.3 சதவீதமாக இருந்துள்ளது. இந்து பிசினஸ் லைன் (01.12.2018) வெளியிட்டுள்ள இன்னொரு செய்தி பாருங்கள்! நடப்பிலுள்ள “ராபி” பருவத்து பயிர்கள் 32 லட்சம் ஹெக்டேர் குறைவாக விதைக்கப்பட்டுள்ளதாம். அதாவது கடந்த “ராபி” பருவத்தில் 387 லட்சம் ஹெக்டேர் பயிரிடப்பட்டதெனில் இவ்வாண்டு 355 லட்சம் ஹெக்டேர் மட்டுமே விதைக்கப்பட்டுள்ளது.

எந்தெந்த மாநிலங்களில் விவசாயம் அதிகம் பாதிப்பிற்கு ஆளாகியுள்ளது?

விவசாயப் பயிரிடல் வீழ்ச்சியை சந்தித்துள்ள வேளையில் அதில் மூன்றில் ஒரு பங்கு ஹெக்டேர்கள் மகாராஷ்டிராவில்தான் குறைந்துள்ளது. அம்மாநிலத்திலுள்ள வட்டங்களில் பாதிக்கு பாதி தண்ணீர் பற்றாக்குறையால் வாடுகின்றன. உத்தரப் பிரதேசம், இராஜஸ்தான், கர்நாடகா என விவசாயம் பாதிக்கப்பட்ட மாநிலங்களின் பட்டியல் தொடர்கிறது. கோதுமை, அரிசி தவிர்த்த பயிர்கள் அதாவது கேழ்வரகு, மக்காச் சோளம் போன்றவை 27 சதவீதம் ஹெக்டேர் வீழ்ச்சியை சந்தித்துள்ளன. அதாவது 40 லட்சம் ஹெக்டேரிலிருந்து 29.64லட்சம் ஹெக்டேர்களாக பயிரிடல் குறைந்துள்ளது.மகாராஷ்டிரா, கர்நாடகாவில் அதிகம் பாதிப்பு.பருப்பு வகையறாக்கள் 12 சதவீத ஹெக்டேர் வீழ்ச்சியை அடைந்துள்ளன. 111 லட்சம் ஹெக்டேரிலிருந்து 101 ஹெக்டேர்கள் ஆகும்.

எது ஜி.டி.பியை கீழே இறக்கிவிட்டுள்ளது?

பொருளாதார நிபுணர்களின் கருத்தில் ரூபாய் மதிப்பு வீழ்ச்சி, அரசு முதலீடுகளில் ஏற்பட்டவீழ்ச்சி, கிராமப்புற மக்களின் வாங்கும் சக்தியில் தேக்கம் ஆகியன ஆகும். புள்ளி விவர நிபுணர்கள் கடந்த ஆண்டு இதே காலாண்டில் நல்ல வளர்ச்சி எட்டப்பட்டதால் அதை அடிப்படையாகக் கொண்டு கணக்கிடப்பட்டதால் இக்காலாண்டில் வளர்ச்சி விகிதம் குறைவாக இருக்கிறது என்று விளக்கம் தருகிறார்கள்.

நகர்ப்புற பொருளாதாரத்தின் நிலைமை என்ன?

தொழில் உற்பத்தி 7.4 சதவீத வளர்ச்சியை எட்டியுள்ளதாகச் சொல்லப்பட்டாலும் வர்த்தகம், ஓட்டல்கள், நிதிச் சேவைகள் எதிர்பார்த்ததைக் காட்டிலும் அதிகமாகச் சரிந்துள்ளன. இது நல்லஅறிகுறி அல்ல.

மொத்தத்தில் எப்படி மதிப்பிடுகிறார்கள்?

மொத்த மதிப்பு அதிகரிப்பில் விவசாயத்தையும், அரசு முதலீடுகளையும் கழித்துவிட்டு பார்த்தால் வட கேந்திரமான துறைகளின் வளர்ச்சி கூட பாதிக்கப்பட்டுள்ளது என்பதே தெளிவாகிறது. ஐசிஐசிஐ வங்கியின் தலைமை நிர்வாகி பிரசன்னா கூறுவது என்னவெனில் “நாங்கள் மூன்றாவது காலாண்டிலிருந்தே சரிவை எதிர்பார்த்தோம். ஆனால் இரண்டாம் காலாண்டிலேயே முக்கியமான அளவுகோல்களில் சரிவு ஏற்பட்டுள்ளது. இது 2018 - 19 ஒட்டுமொத்த ஆண்டிற்கான வளர்ச்சி மதிப்பீடுகளையே மறு பரிசீலனை செய்ய வேண்டிய நிலையை உருவாக்கியுள்ளது.’’

பொருளாதாரத்தின் மற்ற அளவுகோல்கள் எப்படி உள்ளன?

வெள்ளிக்கிழமை அன்று இன்னொரு புள்ளி விபரம் தலைமைத் தணிக்கை பொது அலுவலர் அலுவலகத்தால் (சிஏஜி) வெளியிடப்பட்டுள்ளது.அது தரும் தகவல் என்ன? 2018-19 நிதியாண்டிற்கு ரூ,6.24 லட்சம் கோடிகள் நிதிப் பற்றாக்குறையால் பட்ஜெட் மதிப்பீடு செய்யப்பட்டிருந்தது. ஆனால் முதல் 7 மாதங்களிலேயே (ஏப்ரல் - அக்டோபர் 2018) நிதிப்பற்றாக்குறை 6.48 லட்சம் கோடிகளைத் தொட்டுவிட்டது. இலக்கை போன்று103.9 சதவீதம். நிதிப்பற்றாக்குறை என்றாலே மோசம் என்று சொல்ல முடியாது. எதனால் அதுஏற்படுகிறது? எப்படி அரசு அதை எதிர்கொள்ளப் போகிறது? என்பதைப் பொருத்துதான் அதை முடிவு செய்ய வேண்டும்

ஜிடிபி மதிப்பீடுகளை மத்திய அரசு மாற்றுவது குறித்து அரசுக்கும் - முன்னாள் நிதியமைச்சர் ப.சிதம்பரத்திற்கும் மோதல் உள்ளதே!

நவீன தாராளமயம் குறித்த அணுகுமுறையில் இருவருக்கும் வேறுபாடுகள் இல்லாவிட்டாலும் பிஜேபி அரசின் செயற்கை பலூன்களை உடைக்கிறார் சிதம்பரம். நிதியமைச்சகத்தின் சூட்சுமங்கள் தெரிந்தவரல்லவா! பிஜேபி ஆட்சிக்கு வந்தபிறகு ஜிடிபி வளர்ச்சி அதிகரித்துள்ளது என்றால் ஏன் முதலீடுகள் 5 சதவீதம், 6சதவீதம் குறைவாக உள்ளது? மார்ச் 2014ல் எட்டப்பட்ட 315 பில்லியன் டாலர் ஏற்றுமதி என்ற அளவை இதுவரை ஏன் கடக்க முடியவில்லை? நிறுவனக் கடன்களின் வளர்ச்சி ஏன் 1.4 சதவீதம் என்கிற குறைவான அளவிலேயே உள்ளது? என் வேலைவாய்ப்பில் தேக்கம்? ஏன் விவசாயிகளின் துயரம்? என்று அவர் நிறைய கேள்விகளை எழுப்புகிறார். இவையெல்லாம் இடதுசாரிகளால் ஏற்கெனவே எழுப்பப்பட்ட கேள்விகளே!

ஜிடிபி வளர்ச்சி விகித சரிவை எப்படி சரி செய்வார்கள்?

ஜிடிபி வளர்ச்சி என்பது அனைத்து தரப்பு மக்களின் வளர்ச்சிக்கான அளவுகோலா என்பது தனிக்கேள்வி. அடிப்படையான மாற்றங்கள் நோக்கி நகராவிட்டால் இதுபோன்ற நெருக்கடிகள் எழுவது தவிர்க்க இயலாது. கிராமப்புற மக்களின் வருமானங்களில் உயர்வு, மக்களின் வாங்கும் சக்தி அதிகரிப்பு, வரி திரட்டல் கொள்கைகளில் மாற்றம், அரசு முதலீடுகள் அதிகரிப்பு உள்ளிட்ட அடிப்படை அம்சங்களில் கவனம் இல்லாதவரை இத்தகைய பிரச்சனைகள் வந்து கொண்டேயிருக்கும். 

அறுவை சிகிச்சை தேவைப்படுகிற காயத்தை ஆயின்மென்ட்டுகளால் குணப்படுத்த முடியுமா?

நன்றி - தீக்கதிர் 02/12/2018

கையேந்தி நிற்கிறது அட்சய பாத்திரம்

தஞ்சாவூரிலிருந்து வெ.ஜீவக்குமார்


காவிரி தஞ்சைக்கு இடப்பெயர்ச்சி பெற்றதாக கூறும் சில ஆய்வுகள் உண்டு. வலுவாக இதை மறுப்போரும் உண்டு. எப்படி இருந்தபோதிலும் காவிரி டெல்டாவின் வாழ்க்கை கி.பி,- கி.மு என்பது போல் கஜா புயலுக்கு முன் - கஜா புயலுக்கு பின் என மாற்றப்பட்டது. பேரளவு மருதமும் ஓரளவு நெய்தலும் கலந்த நிலம் தன் வடிவை இழந்தது. புதிய எதையும் அது பெறவில்லை. அதன் பண்பாடும் நாகரிகமும் கண் முன்னே நொறுங்கித் தகர்கிறது.இயல்பாகவே சோழ மண்டலத்தில் ஒவ்வொரு ஊருக்கும் ஒரு கீர்த்தி உண்டு. தமிழகத்தில் குடிசைகள் இப்போது அதிகம் உள்ள மாவட்டம் நாகப்பட்டினம். ஆனால் அதன் பூர்வீகம் அப்படி அல்ல. பேரரசன் ராஜராஜன் ஆட்சியில் (985-1014) நாகை மாபெரும் துறைமுகம் ஆகும். 13ஆம் நூற்றாண்டில் சீனர்கள் நாகையை நா-கியா-போ-டன்- நா என அழைத்தனர். 

1520ல் நாகை சர்வதேச வணிக மையம் ஆகும். இதன் வர்த்தக வனப்பு போர்த்துகீசியர், டச்சு, பிரெஞ்சுக்காரர்களின் கண்களை உறுத்தியது. அரிசி, வெண்ணெய், உப்பு, இரும்பு, மரம், பீரங்கி குண்டு போன்றவை இங்கிருந்து ஏற்றுமதியாயின. சீனாவிடம் பட்டுத்துணியை நாகை பெற்றது. அரிசியை திரும்ப தந்தது. 1500களில் முத்து மாலைகளாலும் மாணிக்கப் பரல்களாலும் வளம் பெற்று இருந்த நாகையில் கடற்கொள்ளை நடந்தது.நாகை அருகில் 2018லும் அது தொடர்கிறது.நாகையிலிருந்து அரசு வாகனம் வேதார ண்யம் புறப்படுகிறது. கஜா நிவாரணத்துக்கு ரூபாய் 50 ஆயிரம் மதிப்புள்ள மளிகை வாகனத்தில் உள்ளது. கீழையூர் அருகில் வாகனம் மறித்து பறிக்கப்படுகிறது. ஆயுள் காப்பீட்டு கழக சங்க தோழர்கள் தஞ்சையிலிருந்து திருத்துறைப்பூண்டி, வேதாரண் யத்திற்கு ஆதரவு கரம் நீட்டுகின்றனர். அவர்கள் கொண்டு சென்ற 5 லட்சம் மதிப்புள்ள நிவாரணப் பொருட்கள் வழியில் மிரட்டி பறிக்கப்படுகிறது.

எத்தனையெத்தனை புயல்கள்

மேற்கு பகுதியை விட கிழக்கு கடற்கரை பகுதி அடிக்கடி புயல்களை சந்திக்கிறது. 1890 முதல் 2002 வரை இப்பகுதி 304 புயல்களை சந்தித்துள்ளது. மேற்கு கடற்கரை பகுதியோ 48 புயல்களை மட்டுமே கண்டது. 2004 டிசம்பரில் சுனாமி, 2005ல் ஃபானூஸ் புயல், 2008ல் நிசா, 2010ல்... 2011ல் தானே, 2015ல் சென்னையில் வர்தா, இப்போது 2018ல் கஜா...புயலையோ சூறாவளியையோ கை நீட்டித் தடுக்கும் வல்லமை நமக்கு இல்லை. எனினும் புயலின் தாக்கத்தை, பாதிப்பை, விளைவை குறைக்க அரசாங்கத்தால் முடியும்? புயலின் நகர்வை பேரிடர் மேலாண்மையைத்துறை கணித்தது. வானிலை ஆராய்ச்சி மையம் ஊடகம் மூலம் அறிவித்தது.12-11-2018ல் தமிழக அரசின் உயர் மட்டக்குழு இதுகுறித்து விவாதிக்க கூடியது. 

16-11-2018ல் கஜா சண்டமாருதம் செய்தது. தமிழக அரசு முன்னெச்சரிக்கை செய்தது. விடியலில் புயல் வீச போகிறது என நள்ளிரவில் சங்கு ஊதியது. எனினும் அதிகாலை 2 மணிக்கு தமிழக அரசு குறட்டைவிட்டது. கஜா மணிக்கு 115கி.மீ வேகத்தில் வீசியது. எச்சரித்த அரசு அமைப்பு களே அலறின. தமிழக அரசு இயந்திரம் குடை சாய்ந்தது. தஞ்சாவூர் மாவட்ட ஆட்சியர் மேற்கூரையில் சூரிய ஒளி மின் தகடுகள் பறந்தன. அரசு அலுவலகங்கள், காவல் நிலை யங்கள், நீதிமன்றங்களில் இருந்த மரங்களே வீழ்ந்தன. குடிமக்களை மரம் மட்டையை வெட்ட சொன்ன அரசு தன் உடைமையை சரிசெய்யவில்லை.

 அரசு நட்டிருந்த மின் கம்பங்கள் ஒடிந்தன. 1,03,241 மின் கம்பங்கள் அதோ கதியாயின. முனனெச்சரிக்கை செய்த அரசிடம் 7,000 புது மின் கம்பங்கள் மட்டுமே இருந்தது. துவக்கத்தில் 471 நிவாரண முகாம்கள் அமைத்து அரசு 82,000 பேரை தங்க வைத்தது. பின்னர் அமைச்சர் உதயகுமார் அறிவிப்புப்படி 465 முகாம்களில் 3,78,533 பேர் அடைக்கப்பட்டனர். ஒரு தீப்பெட்டிக்குள் 10 யானைகள், ஒரு டவுன் பேருந்துக்குள் 10,000 பேர் நுழைந்தால் என்ன ஆகுமோ அதுதான் நடந்தது. 

அரசு முன்னெச்சரிக்கையுடன் நசுவினி ஆற்றினை தூர்வாரி இருந்தால் கரிசைக்காடு கிராமம் கண்ணீரில் படகு விட்டிருக்காது. அரசு எச்சரிக்கை காட்டி யிருந்தால் கோடியக் கரையில் மான்கள் நள்ளிரவில் மாண்டு இருக்காது. குதிரைகள் சேற்றுக்குள்ளும் கடலுக்குள்ளும் வீழ்ந்து இருக்காது. சரணாலயத்தில் பறவைகள் செத்து மிதந்து இருக்காது. மன்னார் தீவில் மேய்ச்சலுக்குப் போன 300க்கும் மேற்பட்ட மாடுகள் மடிந்திருக்காது. 35 ஆயிரம் ஏக்கர் உப்பளங்கள் காப்பாற்றப்பட்டு இருக்கும். மீனவர்களின் 2000 விசை படகுகளும் பைபர் படகுகளும் காப்பாற்றப்பட்டு இருக்கும். வீடுகள் தலைகுப்புற கவிழ்ந்து இருக்காது. 

தேவையான அளவு முகாம்கள் அமைத்து இருந்தால் முத்துப்பேட்டை, பின்னத்தூரில் மக்கள் சுடுகாட்டில் சமைக்கவும் சேற்று ஈரத்தில் படுக்கவும் நேர்ந்திருக்காது. கோட்டூர் அக்கரைகோட்டத்தில் கழிப்பறையில் சமையல் நடந்திருக்காது. மதுக்கூர் வானதெரியான் குடிக்காட்டில் சாலையில் சமைக்க நேர்ந்திருக்காது. மரவள்ளி கிழங்குகளையும் தேங்காய் குருத்துக்களையும் உணவாக உட்கொள்ள நேர்ந்திருக்காது. மாணவர்களின் கல்வி வெள்ளத்தில் மூழ்கியிருக்காது. காற்று வீசும் போது ஸ்விட்சை நிறுத்துவது ஒரு நடவடிக்கை. மெழுகுவர்த்தி தருவதுதான் முன்னெச்சரிக்கை. தமிழக அரசு அதை செய்யவில்லை.

இது தேசியப் பேரவலம் இல்லையா?

தென்னிந்தியாவின் நெற்களஞ்சியம் என தன்னை நிறுவிக்கொண்ட ஒரு பகுதியின் அவலம் தேசிய பேரவலம் என அறிவிக்க மத்திய அரசை கெஞ்ச வேண்டும். ஒரு அட்சயபாத்திரம் திருவோடாய் மாறியது. உலகெங்கும் உலாவரும் பிரதமர் சுமார் 70பேர் இறந்தும் ஒரு பெருமூச்சு விட மறுக்கிறார். குஜராத்தில் ஒரு சிலைக்கு 3000 கோடி செலவு செய்த பிரதமர்தமிழக நிவாரணத்திற்காக இன்னும் ஒரு ரூபாய்ஒதுக்க யோசிக்கிறார். இத்தாலிய நாட்டின் சீசர் டிஃபிரடரிக், போர்த்துகீசிய கஸ்பார் கொரையா, சீனாவின் துங் ஆவோ உள்ளிட்ட வெளிநாட்டு பயணிகள் 500 ஆண்டுகளுக்கு முன்னே அதிசயித்து மிதித்த டெல்டாவின் மண்ணிற்கு நரேந்திர மோடி வர மறுக்கிறார். கஜா எனும் மத யானைப் புயலின் பிளிறலை- அதன் பேரழிப்பை மத்திய அரசு அலட்சியப் படுத்தியது. பனித்துளிகள் மலர்களுக்கு முத்தம் தருவதை போல் மத்திய அரசு கஜாவை கண்ணடிக்கிறது.

 தமிழக அரசின் நிவாரண கோரிக்கைகளை புறம் தள்ளுவது மத்திய அரசின் வாடிக்கை. தமிழக அரசு ஒரு 1,02,573 கோடி கோரியது. மத்திய அரச தந்ததோ 2,012 கோடி. இப்போதும் கஜாவின் நாசத்தை மத்திய அரசின் குழு பார்வையிட்டுள்ளது. இவர்கள்பார்க்கும் போதே தென்னை மரத்தின் குருத்தைக்காட்டி இது தென்னை போட்ட முட்டையா குஞ்சு பொரிக்குமா என கேட்டுள்ளனர். ஒரத்தநாடு புலவன் காட்டில் 25-11-2018ல்அதுதான் நடந்தது. தமிழக அரசும் மனிதர் களின் சாவை ஈசலின் மரணம் போல் கடந்து செல்கிறது. 

கஜா ருத்ரதாண்டவம் நடத்தியபோது சேலத்தில் முதலமைச்சர் சந்தன மணத்துடன் திறப்பு விழாக்கள் நடத்தினார். தென்னந் தோப்பும் தேக்கும் நிர்மூலம் ஆனதால் ஒரு தற்கொலை, அதிர்ச்சி மாரடைப்பில் ஒரு சாவு, புயலில் விழுந்த மரத்தை அகற்றும் போது பாம்பு கடித்து ஒரு சாவு, நிவாரணம் வாங்க முயலும் போது சில சாவுகள், பூப்படைந்த தீட்டு என தனிக்குடிசையில் வைக்கப்பட்ட சிறுமியின்கூரையில் மரம் விழுந்து ஒரு சாவு,வீடுகள் இடிந்து பல சாவுகள், மின்சாரம் பாய்ந்து சில சாவுகள், திருத்துறைப் பூண்டி கீழக்கொற்கை, மணலியில் நிவாரண முகாமில்கெட்டுப்போன உணவை சாப்பிட்டு சிலர் சாவு,தொற்று நோய் வந்து சில சாவு என குலை குலையாய் முந்திரிக்காய் என்பது போல்மரணங்கள் நடந்தன. அதேசமயம் முதலமைச்சரோ தில்லி தாஜ்மான்சிங் ஹோட்டலில் ஒரு தனியார் நிகழ்ச்சியில் சிறந்த நிர்வாகி என மார்பில் 3 பதக்கங்களை சூடிக்கொண்டிருந்தார். மந்திரிகள் அங்கே தங்கி இருக்கிறார்கள். அவர்களை கொசுவோ மற்றவையோ கடிப்பது இல்லை. வியர்வை போக்க பனை மட்டை விசிறியால் அவர்கள் விசிறுவதில்லை. பசியாலோ தாகத்தாலோ அவர்கள் வாடுவதில்லை. 

முறையாக நிவாரணம் வழங்க அவர்களுக்கு திராணியும் இல்லை. சென்னை வர்தாவால் பாதிக்கப்பட்டபோது 20 ஆயிரம் மின் ஊழியர்கள் களத்தில் நிறுத்தப்பட்டனர். இப்போதோ 13,829 மின் ஊழியர்கள்தான். 4 ஆண்டுகளுக்கு முன்பே ஜெயலலிதா ஏக்கருக்கு ரூ.15ஆயிரம் நிவாரணம் கொடுத்தார். எடப்பாடியோ ஹெக்டேருக்கு 13,500 (ஏக்கருக்கு சுமார் 5400) தருகிறார்.தமிழக அரசு வெள்ள நிவாரண பணிகளில் கேரளா, ஒடிசா போன்றவற்றின் பாடத்தைபின்பற்றவில்லை. 

உற்பத்தி பாதிக்கப்பட்டால் மன்னர்கள் ஆட்சியில் வரி தள்ளுபடி செய்யப்பட்ட முன்மாதிரி சோழ மண்டலத்தில் உண்டு. இன்றைய அரசு அதையும் பின்பற்ற வில்லை.சோறு பெருக்கெடுத்த வீதிகளின் சேற்றில்நின்று சோற்றுப் பருக்கைகளுக்காக எங்கள்குழந்தைகள் முதல் முதியவர்கள் வரை கையேந்துகின்றனர். அமுதசுரபி ஏந்திய எங்கள் மணிமேகலைகள் எச்சில் இலை பொறுக்க க்யூவில் நிற்கிறார்கள். கர்ணன் போல் வள்ளலாய் வாழ்ந்த எங்கள் விவசாயி தர்ம சத்திரத்தின் வாசலில் துணி விரித்து யாசகம் கேட்கிறார்.துயரமும் கோபமும் கொப்பளிக்க நிற்கிறோம் நாங்கள்.­­­

தீக்கதிர் 01.12.2018

Saturday, December 1, 2018

காவிகளின் காலி லாரி மோசடி





இரண்டு நாட்களாக முகநூலில் உலா வரும் செய்தி இது.

நரேந்திர மோடி புகைப்படத்துடனான ஒரு பேனருடன் ஒரு லாரி கஜா புயல் தாக்கிய இடங்களில் சுற்றி வந்து கொண்டே இருக்கிறது. ஒரு கிளீனர் கூட  உடன் இல்லாமல் டிரைவர் மட்டும் சாலைகளில் அங்கேயும் இங்கேயும் போய்க் கொண்டிருக்கிறார்.

மக்கள் மடக்கிக் கேட்டதும்தான் உண்மை தெரிந்துள்ளது.

அந்த லாரியில் ஒரு பொருளும் கிடையாது. ஆனால் பாஜக ஏதோ நிவாரணம் வழங்குவதாக வெட்டி சீன் போடுவதற்காக செய்யப் பட்ட மோசடி வேலை இது. 

இதெல்லாம் ஒரு பிழைப்பு!
இதைச் செய்வது ஒரு மத்திய ஆளும் கட்சி!!
இந்த வெட்கம் கெட்டவர்கள்தான் மீண்டும் ஆட்சிக்கு வர வேண்டுமாம்!!!

பிகு 1

அந்த காலி லாரியை மக்கள் மறிக்கும் காணொளியைப் பார்த்த பிறகுதான் இந்த பதிவை எழுதுகிறேன். இரண்டாவது மற்றும் மூன்றாவது புகைப்படங்கள், அந்த காணொளியிலிருந்து எடுக்கப் பட்ட ஸ்க்ரீன் ஷாட்டுகளே. 

பிகு 2 

இதை எழுதிக் கொண்டிருக்கும் போதுதான் இதே ஃப்ராடு வேலையை கேரளத்திலும் செய்து கையும் களவுமாக பிடிபட்டார்கள் என்ற செய்தியும் நினைவுக்கு வந்தது. 



கருணை வடிவம் நீட் அம்மையார்; சீ சீ


கேரள மாநில பெரு வெள்ளத்திற்கு கேட்ட நிதி ஒன்று, மத்தியரசு அள்ளிக் கொடுத்ததோ அற்பத் தொகை. அதிலும் அரிசிக்கான தொகையை பிடித்துக் கொண்டது.

சவுதி அளிக்க இருந்த தொகையை வெட்டிக் காரணங்கள் சொல்லி தடுத்து விட்டது.

வெளி நாடுகளில் வாழும் மலையாளிகளை சந்தித்து நிதி திரட்ட அமைச்சர்கள் புறப்பட்ட போது அதையும் தடுத்து விட்டது.

இப்போது வெள்ள நிவாரணப் பணியில் இந்திய விமானப்படை ஈடுபட்டதற்காக

கருணை வடிவமான நீட் நிர்மலா அம்மையார் இருபத்து எட்டு கோடி ரூபாய்க்கு பில் அனுப்பியுள்ளார்.

சீசீ ரவிசங்கர் சாமியார் யமுனையை சீரழித்து கலை நிகழ்ச்சி நடத்திய போது ராணுவத்தை கூலிப்படையாக மாற்றிய இந்த அம்மையார் உயிர் காக்கும் பணிக்கு காசு கேட்கிறார்.

ஷேக்ஸ்பியரில் வரும் ஷைலாக் இவர்களை விட கருணை கொண்டவனாகத் தெரிகிறான்.

வார்ட் தேர்தலில் இந்த அராஜகப் பேர்வழிகளுக்கு பனிரெண்டு வாக்குகளே அதிகம் . . ..