ஸ்டான் சுவாமி – இறந்தும் துரத்தும் அதிகாரம்

 

ஸ்டான் சுவாமி – 84 வயதில் சிறைக்கு அனுப்பப்பட்டு சித்திரவதைகளுக்கு உள்ளான மனித உரிமை செயற்பாட்டாளர். மோடியை கொலை செய்ய சதி செய்ததாக போலிக் குற்றச்சாட்டிற்கு உள்ளான மனித உரிமை செயற்பாட்டாளர்களில் ஒருவர். அந்த பீமா கோராகன் வழக்கில் இன்னும் குற்றப்பத்திரிக்கை தாக்கல் செய்யப்படவில்லை. வழக்கு நடந்தால் பொய்கள் அம்பலமாகி அசிங்கமாகி விடும் என்பதால் இந்த தாமதம். தண்ணீர் குடிப்பதற்கு ஒரு சிப்பர் கொடுப்பதற்குக் கூட உச்ச நீதிமன்றம் வரை வழக்கு போட வேண்டியிருந்தது. சிறைத்தண்டனையின் கொடுமைகள் அவர் உயிரைக் குடித்தது.

 சேலம் அருகே தனியார் நிலத்தில் அவருக்கு நினைவுத்தூண் வைப்பதற்கு தமிழ்நாடு அரசு மறுத்துள்ளது. தாசில்தார், எஸ்.பி, கலெக்டர் ஆகிய அனைவரும் அதற்கு தடை போட்டுள்ளனர். அவருக்கு நக்ஸ்லைட்டுகளுடனும் மாவோயிஸ்டுகளுடனும் தொடர்பு இருந்தது என்று மத்தியரசு சொன்ன அதே பொய்யைச் சொல்லித்தான் அனுமதி மறுக்கப்பட்டுள்ளது.

 

ஸ்டான் சுவாமி இறந்தவுடன் அவரது அஸ்தி தமிழகம் முழுதும் கொண்டு வரப்பட்டு அவருக்கு மரியாதை செலுத்தப்பட்டது. சென்னை லயோலா கல்லூரியில் நடைபெற்ற நிகழ்வில் முதல்வர் மு.க.ஸ்டாலின் கலந்து கொண்டு அஸ்திக் கலசத்துக்கு மலர் வளையம் வைத்து அஞ்சலி செலுத்திய போது “ஸ்டான் சாமி பழங்குடி இன மக்களின் உரிமைகளுக்காக தன் வாழ்நாளை அர்ப்பணித்த உயர்ந்த மனிதர்” என்று பாராட்டி பேசியது மட்டுமல்லாமல் மத்தியரசையும் கண்டித்துள்ளார்.

 அந்த உயர்ந்த மனிதருக்கு நினைவுச் சின்னம் அமைக்க தமிழ்நாடு அரசு நிர்வாகத்தால் அனுமதி மறுக்கப்பட்டதை முதல்வர் அறிவாரா? தன்னால் புகழப்பட்ட ஒருவரது நினைவுச்சின்னம் அமைக்க மறுப்பதற்கு அவர் கண்டித்த மத்தியரசு சொன்ன காரணத்தைத்தான் முதல்வருக்கு கீழேயுள்ள அதிகாரிகள் சொல்லியுள்ளனர்  என்பதையும் முதல் அறிவாரா?

 விளிம்பு நிலை மக்களுக்காக பாடுபட்ட ஒருவரை அவர் இறந்த பின்பும் அவதூறு செய்கிறது அதிகார வர்க்கம். இப்படிப்பட்ட அதிகாரிகளாலும் சேகர்பாபு, அன்பில் மகேஷ் பொய்யாமொழி போன்ற சில  அமைச்சர்களாலும் அவருக்குத்தான் கெட்ட பெயர்.   இதை உணர்ந்து களையெடுக்காவிட்டால் இழப்பு   அவருக்குத்தான்.