இவர்கள்தான் இந்தியாவை காப்பாற்றப் போகிறார்களாம்?

இன்றைய மன்மோகன் அரசும் சரி, நேற்றைய வாஜ்பாய் அரசும் சரி இந்திய பெரு முதலாளிகளுக்கு ஆதரவாகவே தங்கள் கொள்கைகளை வகுத்து வைத்துள்ளனர்.

சாமானிய மனிதனுக்கு ரேஷன் அரிசி கொடுப்பதற்கோ இல்லை எரிவாயு சிலிண்டருக்கோ செலவாகும் தொகையை மானியம் என்று கொச்சைப் படுத்தி அதனால் எங்களின் உறக்கமே தொலைந்து போகிறது என்று புலம்பிக் கொண்டே பெரு முதலாளிகளுக்கு ஊக்கத் தொகை என்ற பெயரில் நேரடியாக வாரி வாரி வழங்குவார்கள்.

இதைத்தவிர ஸ்பெக்ட்ரம், நிலக்கரி, இத்யாதி இத்யாதி என்று அடிமாட்டு விலைக்கு ஒதுக்கீடு செய்வது தனி. இந்த முதலாளிகளுக்கு வாரி வாரி வழங்கினால் அவர்கள் தொழில்களில் முதலீடு செய்து அது அப்படியே சொட்டு சொட்டாக வடிந்து கடைசி மனிதனுக்கு வந்து சேரும் என்று வியாக்யானமும் செய்வார்கள்.

அப்படி அரசு வாரி வாரி கொடுப்பதை பெற்றுக் கொள்பவர்கள் தங்கள் முதலீடுகளை எப்படி செய்கிறார்கள் என்று ஒரு சின்ன சாம்பிள் பாருங்கள்.

2011 – 12 நிதியாண்டில் சில இந்திய பெரு முதலாளிகள் இந்தியாவிலும் வெளிநாட்டிலும் செய்த முதலீடுகளின் பட்டியல் கீழே உள்ளது.

எண்	பெயர்	உள் நாட்டில் செய்த முதலீடு (டாலர்களில்)	வெளி நாட்டில் செய்த முதலீடு (டாலர்களில்)
1	முகேஷ் அம்பானி	2.7 பில்லியன்	8 பில்லியன்
2	அனில் அம்பானி	400 மில்லியன்	3 பில்லியன்
3	ரத்தன் டாடா	200 மில்லியன்	3 பில்லியன்
4	சுனில் மிட்டல்	2 பில்லியன்	16 பில்லியன்
5	சஷி ரூயா	200 மில்லியன்	1.2 பில்லியன்

இவர்கள்தான் இந்தியாவை உய்விக்க அவதாரம் எடுத்தவர்கள் என்ற ரீதியில் அரசுகள் செயல்படுகிறது. அவர்கள் தங்கள் லாபத்தை பெருக்கிக் கொண்டே இருக்கிறார்கள். மக்கள் வறுமையில் வாடிக் கொண்டே இருக்கிறார்கள்.

பிரதமர் கனவில் மிதக்கும் மோடியும் ராகுலும் இந்த பண நாயகர்களின் எடுப்பார் கைப்பிள்ளைகள்தான்.

ஜனநாயகத் தேர்தலில் உங்களின் வாக்கு ராகுலுக்கோ, மோடிக்கோ சென்றால் அது இந்த பண நாயகர்கள் தழைக்க செலுத்தும் வாக்காகவே அமையும்.  உங்கள் வாக்கு விரயமாக வேண்டுமா?

சிந்திப்பீர், இடதுசாரிகள் சொல்லும் மாற்றுக் கொள்கைகளை ஆதரிப்பீர்.