முதலில் இவங்களை போட்டுத் தள்ளனும்

இன்று காலையில் ஒரு பதிவை படித்து விட்டு அவ்வளவு கோபம் வந்தது. ஜெயலலிதாவிற்கு  ஜால்ரா தட்டுவதையே முழுமுதற் கடமையாக வைத்துள்ள பெரிய மனிதர் அவர்.

அந்த ஜால்ரா சத்தம் இந்த ஆட்சியில் என்ன நடந்தாலும் அதற்கு கட்டணம் வாங்காமல் வக்காலத்து வாங்கும் வக்கீல் என்ற அளவிற்கு மாறிப் போய் விட்டது.

தவறு செய்பவர்கள், வன்முறையில் ஈடுபடுபவர்களை போலீஸ் போட்டுத் தள்ள வேண்டுமாம். மனித உரிமை மண்ணாங்கட்டி எல்லாம் அவசியம் கிடையாதாம். 

அப்படி எண்கவுண்டர் செய்தால் எல்லோரும் திருந்தி விடுவார்களாம். ஆகவே கையில் துப்பாக்கி தூக்கி கண்டவர்களையும் சுடுவதற்கு காவல்துறைக்கு அதிகாரம் வேண்டுமாம்.

நீதிமன்றம், வழக்கு, விசாரணைக் கமிஷன் போன்ற இத்யாதிகள் இருக்கும் போதே காவல்துறையின் அராஜகம் தாங்கவில்லை. பரமகுடி துப்பாக்கிச் சூட்டை மறக்க முடியுமா? இல்லை சென்னை திருட்டுக்களுக்கு காரணம் என்று பெயர் தெரியாத வட இந்தியர்களை கொலை செய்து பைலை மூடியதைத்தான் மறக்க முடியுமா?

தங்களுக்கு வேண்டாதவர்கள் மீது பொய் வழக்கு போட்டு போலி சாட்சி உருவாக்குகிற போலீஸ்காரர்களுக்கு அதிகாரம் கொடுத்தால் என்ன ஆகும் என்பதைக் கூட என்னுடைய வயது அளவிற்கு அனுபவம் உள்ள அந்த பெரிய மனிதருக்கு தெரியாமல் போனது வியப்பளிக்கிறது.

கேள்வி கேட்க முடியாத சிறப்புச் சட்டம் காஷ்மீரிலும் வட கிழக்கு மாநிலங்களில் இருக்கிறதே! அங்கே என்ன வன்முறை குறைந்துள்ளதா? சட்டத்தைப் பயன்படுத்தி  நடக்கும் அயோக்கியத்தனம்தானே அதிகரித்து உள்ளது?

இல்லை எவன் செத்தால் என்ன? நம்ம அம்மா ஆட்சியைப் பற்றி யாரும் விமர்சிப்பதற்கு முன்பாக நாம் தாக்குதலில் இறங்கி விடுவோம் என்ற புத்திசாலித்தனமா?

தவறு செய்பவர்கள் யாராக இருந்தாலும் சரி, அவர்கள்  சட்டத்தின் முன் நிறுத்தப்பட்டு தண்டிக்கப்பட வேண்டும். காவல்துறை ஒன்றும் நீதிமன்றம் அல்ல, தாங்களே தண்டிக்கும் உரிமையை எடுத்துக் கொள்ள.

பொதுப்புத்தியில் ஒரு தவறான கருத்தை உருவாக்குகிற இது போன்ற அதிமேதாவிகளை போட்டுத்தள்ள வேண்டும் என்று சொன்னால் அந்த பெரிய மனிதர் ஏற்றுக் கொள்வாரா?

கொஞ்சம் பொறுப்புணர்வு வந்தால் நன்றாக இருக்கும். 

பின் குறிப்பு : அங்கேயே சென்று இதை பின்னூட்டமாக இட்டிருப்பேன். பாவம், வயதானவர், ரத்தக் கொதிப்பு அதிகமாகி விடும் என்பதாலும் அம்மா கட்சி என்பதால் போலீசிடம் சொல்லி என்னையும் போட்டுத் தள்ள சொன்னால் என்ன செய்வது என்ற அச்சத்தாலும் இங்கே எழுதி விட்டேன் !

ஃபேக் ஐடி பினாமிகளின் வரவை ஆவலோடு எதிர்பார்க்கிறேன்.