சபாஷ் சித்தராமையா

 கீழே உள்ள பதிவு, தீக்கதிர் பொறுப்பாசிரியர் தோழர் அ.குமரேசன் எழுதியது.

அவருக்கு நன்றி சொல்லி, துணிச்சலான முடிவெடுத்த கர்னாடக முதல்வர் திரு சித்தராமையா அவர்களை பாராட்டுவதில் நானும் இணைந்து கொள்கிறேன்

ஏதேனும் வேண்டுதலுக்காக மனிதரை பலி கொடுப்பது...

பிராமணர்கள் சாப்பிட்ட இலைகள் மீது பிற சாதியினர் உருண்டு வரச் செய்வது...

தீக் கங்குகள் மேல் நடக்க வைப்பது...

மாதவிடாய் நாட்களில் அல்லது கர்ப்பக் காலத்தில் பெண்ணைத் தனிமைப்படுத்துவது...

வழிபாட்டின் பெயரால் பெண்களை நிர்வாணமாக நடக்க வைப்பது...

பேய் விரட்டுவதாகச் சவுக்கால் அடிப்பது...

புதையல் எடுப்பதாகக்கூறி பூஜை நடத்தி ஏமாற்றுவது...

விலங்கின் கழுத்தைக் கடித்து அதைக் கொல்ல வைப்பது...

சூனியம் வைப்பதாக, சூனியம் எடுப்பதாகச் சொல்லிச் சடங்குகள் செய்வது...

கன்னத்தில் அல்லது நாக்கில் அலகு குத்துவது...

பாம்பு, தேள், நாய்க் கடிக்கு மருத்துவம் பார்ப்பதைத் தடுத்து வழிபடக் கட்டாயப்படுத்துவது...

கருவில் உள்ள குழந்தையின் பாலினத்தை மாற்றுவதற்கான பூஜை என மோசடி செய்வது...

நோய்களைக் குணப்படுத்துவதன் பெயரால் குழந்தைகளை அடிப்பது, முள்ளில் நிற்க வைப்பது, உயரத்திலிருந்து கீழே போடுவது...

நாணயத்தை சிவக்கச் சிவக்கத் தீயில் சூடாக்கி வயிற்றில் முத்திரை பதிப்பது...

இவை உள்ளிட்ட கொடுநம்பிக்கைச் செயல்களுக்குத் தடைவிதிக்கும் சட்ட முன்வரைவு கர்நாடக சட்டமன்றத்தில் இன்று (நவ.16) நிறைவேற்றப்பட்டுள்ளது.

தடையை மீறுவோருக்கு மூன்று மாதங்கள் வ்ரை சிறைத்தண்டனை, ரூ.5,000 வரையில் அபராதம்.

வாஸ்து, ஜாதக சோதிடம் போன்றவை ‘கர்நாடக மனிதமற்ற தீய நடைமுறைகள், சூனியம் தடுப்பு மற்றும் ஒழிப்பு சட்ட முன்வரைவு - 2017’ என்ற இந்தச் சட்டமுன்வரைவுக்குள் கொண்டுவரப்படவில்லை. அவற்றில் சித்திரவதைகள் இல்லை என்பதோ, அல்லது அவற்றிற்கு ஆதரவாகப் பெரிய வட்டாரம் இருப்பதோ காரணமாக இருக்கலாம்.

மத வழிபாடுகள், விழாக்கள், ஊர்வலங்கள் ஆகியவற்றுக்குத் தடையில்லை.

சீத்தாராமய்யா அரசுக்குப் பாராட்டுகள். கர்நாடகத்தில் செயல்படும் பகுத்தறிவாளர் அமைப்புகளுக்கு வாழ்த்துகள். பேராசிரியர் எம்.எம். கல்பூர்கி, பத்திரிகையாளர் கவுரி லங்கேஷ் ஆகியோருக்கு செவ்வணக்கம்.

“இந்த சட்ட முன்வரைவு இந்துக்களின் நம்பிக்கைகளைத் தாக்குவதாக இருக்கிறது” என்று சில அமைப்புகளைச் சேர்ந்தோர் எதிர்ப்புத் தெரிவித்திருக்கின்றனர். இந்து மக்களின் கவுரவத்தைப் பாதுகாப்பவர்கள்தானா இவர்கள் என்பதை இந்து மக்களே முடிவு செய்யட்டும்.

முறைப்படி இந்தச் சட்டமுன்வரைவுக்குக் குடியரசுத் தலைவர் ஒப்புதல் அளிக்க வேண்டும. மத்திய அரசு அதற்குப் பரிந்துரைக்க வேண்டும். அது நடக்குமா அல்லது தமிழகத்தின் ‘நீட்’ எதிர்ப்புச் சட்ட முன்வரைவுக்கு ஏற்பட்ட கதிதான் இதற்குமா?