மழையில் நனையும் எருமைகளாய் . . .

தொழிற்சங்க இயக்கங்கள் ஒன்றிணைந்து நடத்தும் இரண்டு நாட்கள் வேலை நிறுத்தம் நேற்று வெற்றிகரமாய் தொடங்கியுள்ளது.

வேலை நிறுத்தத்தை முன்னிட்டு நாடெங்கிலும் பேரணிகள், ஆர்ப்பாட்டங்கள், மறியல்கள் என்று ஆவேச இயக்கங்களும் எழுச்சிகரமாக நடந்துள்ளன.

கோடிக்கணக்கான தொழிலாளர்கள் பங்கேற்கும் இரண்டு நாட்கள் வேலை நிறுத்தத்தின் சிறப்பான துவக்கத்தினால் போராட்ட எதிரிகளுக்கு வழக்கம் போல வயிற்றெரிச்சலும் தொடங்கி விட்டது.

ஐய்யப்பனின் பெயரைச் சொல்லி வாரத்திற்கு மூன்று நாள் கதவடைப்பும் கல்லெறிதலும் செய்யும் காவிகளுக்கு எந்த உபதேசம் செய்ய முன்வராத பேர்வழிகள் தொழிலாளர்களுக்கு மட்டும் இலவச உபதேசம் கொடுக்க ஓடி வந்து விடுகிறார்கள்.

உற்பத்தி குறையுமாம், தொழில் முடங்குமாம், நுகர்வோருக்கு அவதியாம்,

ஆமாம், செல்லா நோட்டு என்று அறிவித்த போது மக்களை பிச்சைக்காரர்களாய் தெருவில் அலைய விட்டபோது எங்கே போயிருந்தார்கள் இந்த உபதேசிகள்?

ஜி.எஸ்.டி என்ற பெயரில் இப்போது சிறு தொழில் செய்வோரை முடக்கியுள்ள மோடி அரசுக்கு எதிராக உபதேசிகளின் உபதேசம் என்னவோ?

எல்லாம் சரி

எந்த ஒரு வேலை நிறுத்தமும் விரும்பி மேற்கொள்வதல்ல. மிகப் பெரிய உழைப்பும் திரட்டலும் இல்லாமல் ஒரு மாபெரும் வேலை நிறுத்தப் போராட்டம் சாத்தியமில்லை என்பதெல்லாம் உபதேசிகளுக்கோ அல்லது வேலை நிறுத்தத்தை முறியடிக்க நினைக்கும் கருங்காலிகளுக்கோ தெரியாது. 

அவர்களுக்கு ஒரே ஒரு கேள்வி

இரண்டு நாட்கள் வேலை நிறுத்தப் போராட்டத்திற்கான அறைகூவல் கடந்த செப்டம்பர் மாதமே கொடுக்கப்பட்டு விட்டது. நாடெங்கிலும் அதற்கான தயாரிப்பு வேலைகளும் நடந்து வருகிறது.

போராடும் சங்கங்களின் கோரிக்கைகள் தொடர்பாக தொழிற்சங்கங்களை அழைத்துப் பேசாமல் "மழையில் நனையும் எருமை" போல ஏனய்யா  கொஞ்சமும் பொறுப்பில்லாமல் அசமந்தமாய் இருந்தீர்கள் என்று மோடி அரசை ஒரு வார்த்தையாவது கேட்கும் அறம் உங்களுக்கு உண்டா?

இல்லையென்றால் நீங்களும் அந்த எருமைக் கூட்டத்தைச் சேர்ந்தவர் என்பதையாவது ஒப்புக் கொள்ளுங்கள்