தமிழ் அருவி மணியன் ஐயா, அற்புதமாகச் சொன்னீர் ஐயா, நாங்களெல்லாம் அறிவில்லாதவர்கள்தான், ஆனால்

நாக்பூர் போனதால் படிக்காமல் விட்ட வார இதழ்களை இன்று காலையில்தான் படித்து தமிழக நிலவரங்களை அறிந்து கொண்டேன். இரண்டு இதழ்களில் தரகுப்புயல் தமிழ் அருவி மணியன் அவர்களின் பேட்டியும் கட்டுரையும் வந்திருந்தது. 

அதிலே ஒரு கட்டுரையில் அரவிந்த் கேஜ்ரிவாலை அவர் மிகக் கடுமையாக தாக்குகிறார். அதில் ஒன்றும் தவறில்லை. அரவிந்த் கேஜ்ரிவால் எப்படி செயல்பட வேண்டும் என்று போதிக்கிறார். அதிலும் தவறில்லை. எந்த வித கொள்கையோ கோட்பாடோ இல்லாத அமைப்பாகத்தான் ஆம் ஆத்மி கட்சி உள்ளது என்ற விமரிசனமும் சரிதான். 

எனக்கு ஒரே ஒரு கேள்விதான் உண்டு.

அரவிந்த் கேஜ்ரிவாலிடம் நீங்கள் எதிர்பார்க்கிற எல்லா நற்குணங்களும் நீங்கள் உயர்த்திப் பிடிக்கிற நரேந்திர மோடியிடம் உள்ளதா? 

மத வெறி அற்றவராக, சுய சார்பு சுதேசிப் பொருளாதாரத்தை தாங்குபவராக, பன்னாட்டுக் கம்பெனிகளின் பாதம் தாங்கியாக இல்லாத,  வெற்று ஆடம்பரத்தை விரும்பாதவராக, ஊழல் பேர்வழிகளை ஊக்குவிக்காதவராக, நேர்மையானவராக, விளம்பர ஸ்டண்ட்டில் நாட்டம் இல்லாதவராக உங்கள் பிரதமர் வேட்பாளர் நரேந்திர மோடி இருக்கிறாரா? அப்படி எல்லாம் இருக்க வேண்டும் என்று பாஜக விடம் சொல்லும் தைரியம்தான் உங்களுக்கு இருக்கிறதா? உங்களால் கண்டிப்பாக முடியாது.

அதே போல பாமக வை இப்போது ஜாதிக்கட்சி என்று விமர்சிக்கிற நீங்கள் உங்கள் கனவுக் கூட்டணியில் பாமக வை இணைக்க முயன்றது ஏன்? திராட்சை கிட்டாத நரியின் புலம்பலா உங்களின் விமர்சனம்?

இந்த முரண்பாடுகளை சுட்டிக்காட்டினால் நீங்கள் வலைப்பக்கங்களில் எழுதுபவர்கள் ஞானமற்றவர்கள், எந்த அனுபவமும் அற்றவர்கள், அறிவற்றவர்கள், அவர்கள் எழுதுவதை படித்து என் நேரத்தை விரயமாக்க மாட்டேன் என்று சாடுகிறீர்கள். அரவிந்த் கேஜ்ரிவாலின் அராஜகத்திற்கும் உங்களின் இந்த பதிலுக்கும் என்ன வேறுபாடு இருக்கிறது? 

தங்களை விமர்சிப்பவர்களை முட்டாள்களாகவும் உங்களை மிகவும் உயர்ந்தவராகவும் கருதும் உங்களின் இந்த ஆணவமான பதில் “நீங்கள் இத்தனை நாள் காந்தியவாதியாக வேடம் தரித்த ஒரு கபடப் பேர்வழி” என்பதை மீண்டும் அம்பலமாக்கி விட்டது. வலைப்பக்கம் எழுதும் எங்களைப் போன்றவர்களுக்கு உங்களைப் போல ஞானமும் அனுபவமும் இல்லாமல் இருக்கலாம். ஆனால் உங்களிடமில்லாத நேர்மை இருக்கிறது. கொண்ட கொள்கையில் உறுதி இருக்கிறது. உங்களைப் போன்ற சந்தர்ப்பவாதிகள் அல்ல நாங்கள், பச்சோந்திகள் எங்களுக்கு பாடம் எடுக்க வேண்டியதில்லை.