ஒபாமாவின் வெற்றி – இந்தியர்களின் ரத்தத்தில் எழுதப்பட்டது.

பாரக் ஒபாமா மீண்டும் அமெரிக்காவினுடைய ஜனாதிபதியாக தேர்ந்தெடுக்கப்பட்டு விட்டார்.

மாற்றம் என்ற முழக்கத்தை முன் வைத்து கடந்த முறை அவர் வெற்றி பெற்றார். எந்த ஒரு மாற்றத்தையும் அவரால் கொண்டு வர முடியவில்லை என்பது அவருக்கும் தெரியும்

அமெரிக்கப் பொருளாதாரத்தில் கொஞ்சம் கூட முன்னேற்றம் கிடையாது. பணி இழப்புக்கள் தொடர்கிறது. வேலையின்மை விகிதம் உயர்ந்து கொண்டே உள்ளது. வங்கிகள் திவாலாவது நிற்கவில்லை. பென்ஷன் நிதியில் காணாமல் போன பணம் போனதுதான். ஆப்கானிலும் ஈராக்கிலும் அமெரிக்கப் படைகளின் ஆக்கிரமிப்பு நீடிக்கிறது.  

அவரது எந்த தேர்தல் வாக்குறுதியும் நிறைவேறவில்லை. வரும் நான்காண்டுகளிலும் நிறைவேறப் போவதில்லை. எரிகிற இரண்டு கொள்ளிகளில் இந்த கொள்ளி நல்ல கொள்ளி என்று அமெரிக்க மக்கள் முடிவெடுத்துள்ளனர். அவ்வளவுதான்.

ஒபாமாவின் இந்த வெற்றிக்கு இந்தியா கொடுத்துள்ள விலைதான் பெரிது. தேர்தல் காலத்தில் அவர் இந்தியாவை மிரட்டுகிறார். முடிவு எடுப்பதில் இந்திய அரசுக்கு உறுதியில்லை என்று விமர்சிக்கிறார். அமெரிக்க முதலாளிகளின் குரலை அப்படியே எதிரொலித்தார்.

அதன் விளைவாகத்தான் சில்லறை வர்த்தகத்தில் அன்னிய மூலதனத்தை அனுமதிப்பது உள்ளிட்ட மோசமான முடிவுகளை மத்திய அரசு எடுக்கிறது, இன்சூரன்ஸ்துறையில் அன்னிய மூலதன வரம்பை உயர்த்த அனுமதித்து இந்திய மக்களின் சேமிப்பை சர்வதேச மூலதனம் கொள்ளையடிக்க பாதை உருவாக்குகிறது. அதே போலதான் பென்ஷன் நிதியும்.

ஒபாமாவின் மிரட்டல் இன்னும் நான்காண்டுகள் தொடரும் என்பதுதான் நாம் கவலையோடு பார்க்க வேண்டிய விஷயம். அமெரிக்க முதலாளிகளின் பிரதிநிதியான ஒபாமா மீண்டும் அமெரிக்க ஜனாதிபதியானதில் இந்தியர்கள் மகிழ்ச்சியடைய வேண்டிய அவசியமே எதுவும்  இல்லை.

ஆனாலும் பலர் மகிழ்ந்துள்ளார்கள், கலைஞர் உட்பட.

அவர்கள் தாங்கள் செய்வது எவ்வளவு பெரிய தவறு  என்பது புரியாமல் வாழ்த்தியுள்ளார்கள். பாவம் அப்பாவிகள்,