தர்மபுரி கலவரத்தின் குற்றவாளிகள் காடுவெட்டிகளும் கருப்பையாக்களும் அம்மா, ஐயாக்களுமே

தர்மபுரி நத்தம் காலனி தலித் மக்கள் தாக்கப்பட்டது தமிழகம் இன்னும் ஜாதியின் கோரப் பிடியில்தான் சிக்கித் தவிக்கிறது என்பதன் அடையாளம்.

காடுவெட்டி குரு ஜாதிய மறுப்பு திருமணத்திற்கு எதிராக வெறியோடு பேசுகிறார். அண்ணல் அம்பேத்கர், மாமேதை காரல் மார்க்ஸ், தந்தை பெரியார் ஆகியோருக்கு தனது தைலாபுரம் தோட்டத்து வீட்டிற்கு முன்பாக சிலை திறந்து வைத்துள்ள மருத்துவர் ஐயா, மாடர்ன் சின்னய்யா இருவரும் அதை வேடிக்கை பார்க்கிறார்கள்.

கோவையில் மணிகண்டன் என்றொரு நபர் கலப்பு திருமண எதிர்ப்பு மாநாடு நடத்துகிறார்.

ஆளும் அதிமுகவின் சட்டமன்ற உறுப்பினரும் பல கட்சிகள் கண்டவருமான பழ.கருப்பையா, சாதிய மறுப்பு திருமணங்களுக்கு எதிராக விஷம் கக்குகிறார்.

இந்த சம்பவங்கள் அனைத்தையும் தமிழக அரசு மவுனமாக எதிர்க்கிறது. மார்க்சிஸ்ட் கட்சி தவிர வேறு எந்த கட்சியும் கண்டிக்கவும் இல்லை.

இந்தப் பேச்சுக்கள் எல்லாம் ஜாதிய மறுப்பு திருமணங்களுக்கு எதிரான கோபத்தையும் வெறியையும் தூண்டிவிடும் நோக்கமுடையவை. அந்த நோக்கம் வெற்றி பெற்றுள்ளது. அதனால்தான் தனது மகள் தலித் இனத்தைச் சேர்ந்த ஒரு பையனை திருமணம் செய்து கொண்டதால் அந்த தந்தை தற்கொலை செய்து கொண்டுள்ளார்.

ஜாதிய மறுப்பு திருமணங்களுக்கு எதிரான கருத்துக்களை விதைத்தவர்களையும் கண்டு கொள்ளாமல் இருந்தவர்களையும் அந்த மனிதனின் சுற்றத்தாரையும் தற்கொலைக்கு தூண்டியதாய் கைது செய்து நடவடிக்கை எடுத்திட வேண்டும்.