சாம்சங் – தமிழ்நாடு அரசு இனியாவது தவிர்க்கட்டும்

 

சாம்சங் தொழிலாளர்கள் சங்கம் ஒரு வழியாக பதிவு செய்யப்பட்டு விட்டது. உறுதியோடு போராடிய தொழிலாளர்களுக்கு இறுதி வெற்றி கிடைத்து விட்டது.

அவ்வளவு சுலபமாக வந்து விடவில்லை இந்த வெற்றி . . .

ஒரு தொழிற்சங்கத்தை உருவாக்குவது என்பதும் போராடுவதும் என்பதும் எப்போதுமே எளிதானது அல்ல. சாம்சங் போன்ற பன்னாட்டு நிறுவனத்தில் மிகவும் கடினமான ஒன்று. தொழிலாளர்களுக்கு அங்கே தொடர்ச்சியாக இழைக்கப்பட்ட கொடுமைகளே அவர்களுக்கு தொழிற்சங்கத்தின் அவசியத்தை உணர்த்தியது.

நிர்வாகத்திற்லு வால் பிடிக்கிற சங்கங்கள் இருக்கும் சூழலில் அவர்கள் போராட்டத்தை வாழ்க்கையாக கொண்டுள்ள சி.ஐ.டி.யு சங்கத்தை நாடினார்கள். தொழிற்சங்கம் உதயமானது.

தொழிற்சங்கத்தை பதிவு செய்ய தொழிலாளர் நலத்துறை மறுத்தது. நிர்வாகம் சொன்ன காரணத்தையே அரசும் சொன்னது.

தொழிலாளர்கள் வேலை நிறுத்தப் போராட்டத்தை துவக்கினார்கள். அடக்குமுறையும் தொடங்கியது, அவதூறுகளும் தொடங்கியது. காஞ்சிபுரம் மாவட்ட காவல்துறை  சாம்சங்கின் ஏவல் நாயாகவே மாறியது. கைது, தடியடி என்று எல்லாமும் நடந்தது. தனியார் இடத்தில் தொழிலாளர்கள் கூடியதைக் கூட தடுக்க முனைந்தது.

மாநில அரசின் செயல்பாடு நிர்வாகத்திற்கு ஆதரவாகவே அமைந்திருந்தது. தொழிற்சங்க பதிவு தொடர்பாக நிர்வாகத்தின் நிலைப்பாட்டை ஆதரித்தது. பேச்சுவார்த்தைகளில் அமைச்சர்கள் பங்கேற்றாலும் அவர்கள் நிர்வாகம் சொல்வதையே கூறினார்கள்.

திமுக அரசை முழுக்க முழுக்க விமர்சிப்பதையே பிழைப்பாக கொண்ட ஆட்டுக்காரன் உள்ளிட்ட சங்கிகள்  சாம்சங் பிரச்சினையில் மட்டும் அரசுக்கு ஆதரவாக இருந்தார்கள். சுமந்து மாதிரியான தரகர்களின் கூச்சல் வேறு.

இத்தனைக்கு மத்தியிலும் தொழிலாளர்கள் போராட்டத்தை உறுதியாக தொடர்ந்தார்கள். பிரச்சினை நீதிமன்றத்துக்கும் சென்றது. மூன்று அமைச்சர்கள் பங்கேற்ற பேச்சுவார்த்தையில் மற்ற கோரிக்கைகளில் முன்னேற்றம் இருந்தாலும், வேலை நிறுத்தம் விலக்கிக் கொள்ளப்பட்டாலும்  பதிவில் தேக்கம் நீடித்தது.

நீதிமன்றத்தில் கூட நிர்வாகத்தின் குரலைத்தான் அரசு வழக்கறிஞரும் எதிரொலித்தார். ஆறு வாரத்திற்குள்ளாக பதிவு செய்யப்பட வேண்டும் என்று உத்தரவிட்டும் கூட இழுத்தடித்தார்கள். காலவரை என்பதைக் கூட தீர்ப்பு சொன்ன நாள் என்பதற்காக தீர்ப்பு இணையத்தில் வெளியான நாள் என்று அவகாசத்தை கூட்டிக் கொண்டார்கள். சாம்சங் என்றாலே ஓ மை காட் என்று மோடி ஓடியதைப் போல தொழிலாளர் நலத்துறை அமைச்சர் ஓடினார்.

இறுதியாக வேறு வழியின்றி சாம்சங் தொழிலாளர் சங்கத்திற்கு இன்று பதிவு அளிக்கப்பட்டு விட்டது.

சாம்சங் தொழிலாளர்களின் உறுதியான சமரசமற்ற போராட்டமே இந்த  வெற்றியை ஈட்டிக் கொடுத்துள்ளது. அவர்களுக்கு மனமார்ந்த வாழ்த்துக்களும் பாராட்டுக்களும்.

உழைக்கும் மக்கள் மத்தியில் திமுக அரசுக்கு இப்பிரச்சினையில் காண்பித்த அணுகுமுறை எரிச்சலையும் அவநம்பிக்கையையும் உருவாக்கியது. இதனை புரிந்து கொண்டு இது போன்ற போக்கினை எதிர்காலத்தில் தவிர்க்க வேண்டும்.

பன்னாட்டுக் கம்பெனிகளிடம் தொழிற்சங்கம் செல்லுபடியாகாது என்று கொக்கரித்து வந்த எஸ்.ஜி.சூர்யா போன்ற அயோக்கிய சங்கிகள் இந்த பதிவுச்சான்றிதழைப் பார்த்தாவது வாயை மூடிக் கொள்ள வேண்டும்.

லப்பர் பந்து படத்தில் பலத்த கிண்டலுக்கு உள்ளாகும் பெண் வீராங்கனை அகிலா பவுண்டரி அடிக்கும் போது எதிர் அணி கேப்டனிடம் வர்ணனையாளர் சொல்வார், “இது ஆஃப் சைடில அடிச்ச மாதிரி இல்ல, உன்னை செருப்ப கழட்டி அடிச்ச மாதிரி இருக்கு”

 

போராட்டத்தை நக்கல் செய்து கொச்சைப் படுத்தியவர்கள் அனைவருக்கும் அந்த வர்ணனையாளர் சொன்னது பொருந்தும்.