ஒரு மரணமும் மருத்துவரின் அறிவுரையும் - அவசியம் படியுங்கள்

 மருத்துவர்ஃபரூக் அப்துல்லா அவரளின் பதிவு. நீண்ட பதிவுதான். ஆனால் மிகவும் முக்கியமானது. அவசியம் முழுமையாய் படியுங்கள்.

பிரபல எழுத்தாளர் திரு. இந்திரா செளந்தர்ராஜன் அவர்கள்

கழிப்பறையில் தவறி விழுந்து உயிரிழந்திருக்கிறார்.

அன்னாரைப் பிரிந்து வாடும் அவர்தம் குடும்பத்தார், உற்றார் உறவினர், அவரது நலம் விரும்பிகள் அனைவருக்கும் ஆழ்ந்த இரங்கல் உரித்தாகுக.

முதியோர்கள் வீட்டில் கீழே விழுவதும் தலையிலோ எலும்பு முறிவு ஏற்படும் வகையிலோ காயம் ஏற்படுவது என்பது முதியோர்களை வீடுகளில் பேணுபவர்களுக்கு எப்போதுமே கலக்கத்தை ஏற்படுத்தும் விசயமாக இருக்கிறது.

இன்னும் சொல்லப்போனால் 65 வயதுக்கு மேற்பட்ட முதியோர்களுக்கு

கீழே விழுவது மற்றும் அது தொடர்பான மரணங்கள் மிக அதிகமாகப் பதிவு செய்யப்பட்டு வருகிறது.

ஒருமுறை கீழே விழுந்து எலும்பு முறிவு, இடுப்பெலும்பு முறிவு , தலையில் மூளையில் பலத்த காயம் என்று ஏற்பட்ட பின் முதியோர்களால் பிறரது உதவியின்றி வாழ இயலாது எனும் நிலைக்குத் தள்ளப்படுகின்றனர்.

இதன்பொருட்டு நாம் அனைவரும்

கட்டாயம் முதுமையில் ஏற்படும் இந்த விழுதல் விபத்துகள் குறித்து விழிப்புணர்வு பெற்றிருக்க வேண்டியது காலத்தின் கட்டாயமாகிறது.

ஒருமுறை தவறி கீழே விழுந்த முதியோர் மீண்டும் தவறி விழுவதற்கு அத்தனை வாய்ப்பும் உள்ளது.

எனவே முதல் முறை வழுக்கிக் கீழே விழுந்ததற்கான காரணத்தைக் கண்டறிந்து அதை சரிசெய்ய முற்படுவது அடுத்த முறை விழுவதைத் தடுக்கும் செயலாக அமையும்.

பொதுவாக முதியோர்கள் கீழே விழுவதற்கு மூன்று வகையான காரணங்கள் உள்ளன.

முதல் காரணம்

முதியோர்களிடம் தன்னகத்தே உள்ள முதுமை மற்றும் முதுமை சார்ந்த நோய்கள் மற்றும் அவற்றுக்கு உட்கொள்ளும் மருந்துகள் தொடர்பானவை

இரண்டாவது காரணம்

அவர்கள் வாழும் சூழல் சுற்றுப்புறம் சார்ந்த காரணங்கள்

மூன்றாவது காரணம்

சந்தர்ப்ப சூழ்நிலை சார்ந்த காரணங்கள்

முதல் காரணத்தைப் பற்றிப் பேசுகையில் முதியோர்களுக்கு அவர்களின் வயது மூப்பின் காரணமாக தள்ளாட்டம் இல்லாமல் நிலையாக நிற்பதும் நடப்பதும் என்பது சிறுகச் சிறுக சவாலாக மாறுகிறது.

கண்பார்வை மங்குதல் மற்றும் குறைபாடுகள் காரணமாக

நிறத்தின் வெளிர் அடர் பாகுபாடுகளை உணர இயலாமை, இரவு நேரப் பார்வைப் போதாமை

நடக்கும் போது நிலையாக இருப்பதற்கும் தள்ளாட்டம் இல்லாமல் இருப்பதற்கும் தேவையான செரிபெல்லம் எனும் மூளையின் பகுதியில் ஏற்படும் தேய்மானம்

நீரிழிவு ரத்தக் கொதிப்பு இதய, சிறுநீரக, நுரையீரல் , கல்லீரல் நோய்கள் மற்றும் அவற்றுக்கு எடுத்து வரும் மருந்துகள்

தூக்கமின்மை, மனத்தாழ்வு நிலை மற்றும் சோர்வுக்கு உட்கொண்டு வரும் மனநல மாத்திரைகள் ரத்த சோகை, இதயத் துடிப்பில் மாறுபாடு, நீரிழப்பு, தாது உப்புகள் மாறுபாடு, நுரையீரல் தொற்று , இதய வால்வுகளில் அடைப்பு, நினைவாற்றால் குறைபாடு, மூட்டுத்தேய்மானம், பக்கவாதம், கழுத்து மற்றும் குறுக்கு தண்டுவட எலும்பு தேய்மானம், பார்கின்சோனிசம், நீரிழிவினால் ஏற்படும் நியூரோபதி, உள்காதில் உள்ள லேபிரின்த் எனும் உறுப்பில் ஏற்படும் பிரச்சனை காரணமாக தலைசுற்றல், கண் புரை நோய், கண் அழுத்த நோய், நீரிழிவு மற்றும் ரத்தக் கொதிப்பினால் ஏற்படும் விழிப்படலச் சிதைவு நோய் என்று

முதியோர்கள் எதிர்கொள்ளும் பிரச்சனைகளை பட்டியல் இடலாம்.

மேற்கூறிய அனைத்து பிரச்சனைகளும் ஒரு நபரை கீழே விழ வைக்க முடியும்.

எனவே இத்தகைய காரணங்களைக் கண்டறிந்து சிகிச்சை பெற வேண்டும். இவையன்றி முதியோர்கள் மேற்கூறிய பல நோய்களுக்கு மாத்திரைகளை உட்கொள்வர்.

உடல் வலிக்குப் பயன்படும் மார்ஃபின் வகை மத்திய நரம்பு மண்டலத்தில் வேலை செய்யும் வலிநிவாரணிகள், இதயத் துடிப்பு சீராக்கும் மாத்திரைகள்,நீரிழிவுக்கான மாத்திரைகளால் ரத்த க்ளூகோஸ் மிகவும் குறைவது, சில ரத்தக் கொதிப்பு மாத்திரைகள், நீரை வெளியேற்றும் மாத்திரைகள் ஆகியவற்றால் தலை சுற்றல் , மயக்கநிலை ஏற்பட்டு கீழே விழும் நிலை ஏற்படலாம்.

இரண்டாவது காரணம்

தங்குமிடத்தில் முதியோர்களுக்குத் தேவையான

பாதுகாப்பு போதாமை -

போதிய வெளிச்சமின்மை,

வழுக்கும் தரைகள் போன்றவற்றால் முதியோர்கள் வழுக்கி விழும் வாய்ப்பு ஏற்படுவது

மூன்றாவது காரணம்

சந்தர்ப்ப சூழ்நிலை

இரவில் உறக்கத்தின்

போது சிறுநீர் கழிக்கும் இச்சை ஏற்பட்டு அதற்காக விரைந்து கழிப்பறை செல்ல எத்தனிக்கையில் விழுவது, அலைப்பேசியில் பேசிக் கொண்டே மாடிப்படிகளில் ஏறும் போது வழுக்கி விழுவது என சந்தர்ப்ப சூழ்நிலைகளும் வீழ்ச்சிக்கு வழிவகுக்கின்றன.

பொதுவாக கீழே விழுந்த முதியோர்களிடம்

"எப்படி விழுந்தீர்கள்?" என்று மருத்துவர் கேட்டால்

"தெரியாம தடுக்கி விழுந்தேன்.

மேஜை அல்லது நாற்காலி இடறி விழுந்தேன்..

பாத்ரூம்ல டைல்ஸ் வழுக்கி விழுந்தேன்" என்று கூறுவார்கள்

ஆனாலும் உண்மையில் தங்களுக்கு வரும் தலைசுற்றல் குறித்தோ...

படபடப்பு குறித்தோ.. கூறமாட்டார்கள். காரணம் இவையெல்லாம் பெரிய அறிகுறிகளல்ல என்று அசட்டை செய்வார்கள் அல்லது அத்தகைய அறிகுறிகள் தங்களுக்கு ஏற்படுகிறது என்பதையே உடனே மறந்து விடுவார்கள்.

ஒருவர் நடக்கும் போது கீழே விழுவதற்கான வாய்ப்பைக் கண்டறியும் எளிய பரிசோதனைகள் இரண்டு உள்ளன.

அவற்றை நரம்பியல் சிறப்பு மருத்துவர்கள் நோயாளிகளுக்கு செய்து பார்ப்பார்கள்.

அதைக் கூறுகிறேன்

அனைவருமே முயற்சி செய்து பார்க்கலாம்.

கை வைத்த நாற்காலியில் அமர்ந்து கொள்ள வேண்டும்.

நாற்காலியில் இருந்து எழுந்து

நேர்க்கோட்டில் பத்து அடி நடக்க வேண்டும்

மீண்டும் அதே நேர்க்கோட்டில் திரும்ப வேண்டும்

திரும்பி வந்து நாற்காலியில் அமர வேண்டும்.

இவ்வாறு முதியோர்கள் செய்யும் போது

அவர்கள் இதை எவ்வளவு வேகமாகவும் துல்லியமாகவும் செய்கிறார்கள் என்பதைப் பார்க்க வேண்டும்.

இந்த செயல்முறையை நிறைவு செய்ய 12 நொடிகள் போதுமானது.

இந்தப் பரிசோதனைக்குப் பெயர் " கெட் அப் & கோ " (எழு & செல்) ஆகும்.

12 நொடிகளுக்கு மேல் ஒருவர் எடுத்துக் கொண்டால்

அவர் அடுத்தடுத்து விழுவதற்கான வாய்ப்பு அதிகம் என்று எடுத்துக் கொண்டு அவரை மேலும் பாதுகாப்பாக கவனிக்க வேண்டும்

அவருக்கு நான் மேற்கூறிய பல காரணங்களுள் விடையைத் தேடி பரிசோதனைகள் செய்யப்பட வேண்டும்.

மூளை நரம்பியல் மருத்துவர், கண் நோய் சிறப்பு நிபுணர், இதய நோய் சிறப்பு நிபுணர், மனநல மருத்துவர் ஆகியோரிடம் அந்த முதியவரைக் காட்டி காரணத்தை அறிந்து அதற்கு சிகிச்சை செய்ய வேண்டும்.

இன்னும் நாம் நடக்கும் போது நமக்கு சரிசம நிலையை வழங்கி தள்ளாட்டம் இல்லாமல் பார்த்துக் கொள்ளும் மூளையின் "செரிபெல்லம்" சரியாக செயல்படுகிறதா என்பதை வைத்து ஒருவர் அடிக்கடி கீழே விழுவாரா என்பதை யூகிக்கலாம்.

முதியவர் ஒருவரை அவரது ஒரு காலில் பத்து நொடிகள் நிற்கக் கூறவும்

பிறகு உடனே கண்களைத் திறந்து கொண்டு நேர்க்கோட்டில் பத்து அடிகள் நடக்க வேண்டும்

இதை அவர் தள்ளாட்டம் ஏதுமில்லாமல் சரியாகச் செய்து விட்டால் மூளை சார்ந்த தள்ளாடப்பிரச்சனை இல்லை என்பதை ஊர்ஜிதப்படுத்தலாம்.

இவையன்றி முதியோர்கள் வாழும் இல்லங்களை அவர்கள் விழாத வண்ணம் பாதுகாப்பாக அமைக்க சில யோசனைகள் இதோ

1.வீடு முழுவதும் குறிப்பாக இரவில் கழிப்பறை செல்லும் வழி தோறும் ஒளிவிளக்குகளை அமைக்க வேண்டும். அதற்குண்டான ஸ்விட்ச்களை கைக்கெட்டும் தூரத்தில் வைக்க வேண்டும்

2. வீட்டில் எங்கெல்லாம் தண்ணீர் புழக்கம் உள்ளதோ அங்கெல்லாம் கால் உலர்த்தும் சாக்குகள் அல்லது கார்பெட்டுகளைப் போட்டு வைக்க வேண்டும்.

3. முதியோர்கள் வாழும் இடத்தில் போடப்படும் நாற்காலி மற்றும் மேஜை ஆகியவற்றை ப்ளாஸ்டிக்கில் இல்லாமல் மரத்தில் இரும்பினால் செய்யப்பட்டதாக வலிமையானதாக இருக்க வேண்டும். ஒருவேளை வழுக்கி விழுந்தாலும் இந்த மேஜை நாற்காலி மீது சாய்ந்து கொள்ள அல்லது பிடித்துக் கொள்ள உதவும்.

கட்டாயம் சர்க்கரங்கள் பூட்டப்பட்ட நாற்காலிகளைத் தவிர்க்க வேண்டும்.

4. வீட்டில் அங்குமிங்கும் காலில் மாட்டி விழுச் செய்யுமாறு வயர்கள் மற்றும் கயிறுகள் இருக்கக் கூடாது.

5. சமையலறையில் முதியோர்கள் கைக்கு எட்டும் தூரத்திலும் உயரத்திலும் அலமாரிகள் , அடுக்குகள் இருக்க வேண்டும்

6. பாத்திரம் கழுவும் இடத்துக்குக் கீழ் தரையில் ரப்பர் மேட் போடுவது நல்லது

7. கழிப்பறைகளில் வழுவழுப்பான டைல்ஸ் பயன்படுத்துவதை தவிர்க்க வேண்டும். ரப்பர் மேட்களை விரிக்கலாம். கழிப்பறைக்குச் செல்லும் போது ரப்பர் செருப்புகளை அணிந்து செல்லலாம். பிடிமானம் நன்றாக இருக்கும்.

கழிப்பறையில் பிடித்துக் கொள்ள கைப்பிடிகளை சுவரில் அடித்து வைக்க வேண்டும்.

ஒருவேளை தலைசுற்றல் ஏற்பட்டாலும் அந்த பிடிமானக் கம்பிகள் காப்பாற்றும்.

8. மலம் கழிக்கும் கோப்பையை வெஸ்டர்ன் முறையில் உயரம் ஏற்றி வைப்பது நல்லது.

9. முதியோர்கள் பயன்படுத்தும் கழிப்பறைகளில் இருபக்கம் இருந்தும் திறக்குமாறு தாழ்பாள்களை அமைப்பது நல்லது.

10. முதியோர்கள் படியேறும் போது சிரமம் இல்லாமல் இருக்கவும் வழுக்காமல் இருக்கவும் ஒரு படியின் உயரத்தை 15செண்ட்டிமீட்டருக்குள் அமைப்பது சிறந்தது. படியின் உயரம் அதிகமாக இருப்பின் இடறி விழும் வாய்ப்பு அதிகம்.

11. மாடிப் படிக்கட்டுகளில் சில படிகளுக்கு ஒருமுறை நிற்பதற்கு வசதியாக லேண்டிங் அமைப்பது சிறந்தது.

12. படிக்கட்டுகள் முழுமைக்கும் இருபுறமும் உருளை வடிவில் ஸ்டீல் கைப்பிடியை அமைக்க வேண்டும். அந்தக் கைப்பிடியானது சுவற்றில் இருந்து 2.5 முதல் 5 செண்ட்டீமீட்டர் இடைவெளி விட்டு இருக்க வேண்டும்.

13. படிக்கட்டுகளின் கைப்பிடிகள் ஏற்றத்திலும் சரி

இறக்கத்திலும் சரி

படியை விட ஒரு அடி அதிகமாக இருக்க வேண்டும். கைப்பிடி முடிவுறும் இடத்தில் உள்பக்கமாக வளைத்து விடப்பட்டிருக்க வேண்டும்.

14. படிக்கட்டுகளில் தண்ணீர் வடியுமாறு இயன்றவரை அமைக்கக் கூடாது. அவ்வாறு தண்ணீர் வழுக்கும் என்று தெரிந்தால் படிக்கட்டுகளில் தண்ணீர் உலர்த்தும் சாக்குகளைப் போட வேண்டும்

15. மாடிப்படிகளில் இரவு நேரங்களில் சரியான ஒளி கிடைக்குமாறு ஒளிவிளக்குகளை அமைக்க வேண்டும்.

16. நடக்க சிரமப்படும் முதியோர்கள் நடப்பதற்கு கைத்தடி மற்றும் வாக்கர்களை உபயோகப்படுத்துவது உபயோகப்படுத்துவது நல்லது.

17. தசைகளை வலுப்படுத்தவும், மூட்டுகளை பலப்படுத்தவும் உடல் பயிற்சிகளை இயன்முறை சிகிச்சையாளரின் பரிந்துரையில் பெற வேண்டும்.

"டாய் ச்சி" (TAI CHI) எனும் தற்காப்புக் கலை உடல் பயிற்சியை முதியோர்கள் செய்து வருவதென்பது அவர்களைக் கீழே விழுவதில் இருந்து தடுக்கிறது என்று ஆய்வுகள் கூறுகின்றன. அதையும் முயன்று பார்க்கலாம்.

18. எலும்புகளுக்கு வலிமை கூட்டும் விட்டமின் டி சத்துக்காக தினமும் இருபது நிமிடங்கள் சூரியக்குளியல் எடுக்கலாம். விட்டமின் டி யை சப்ளிமெண்ட்டாகவும் உட்கொள்ளலாம்.

மேற்கூறிய பல விசயங்களையும் கருத்தில் கொண்டு

முதியோர்கள் கீழே விழுவதைத் தடுப்போம்

அதன் வழி ஆரோக்கியமான அமைதியான வாழ்க்கையை அவர்கள் வாழ வழிவகை செய்வோம்.

நன்றி

Dr.அ.ப.ஃபரூக் அப்துல்லா

பொது நல மருத்துவர்

சிவகங்கை