அடுத்தவர் போராட்டத்தை அறுவடை செய்தது பாஜக

பத்தாண்டு கால காங்கிரஸ் ஆட்சியின் அவலங்கள், ஊழல்கள், நிர்வாக சீர் கேடுகள், கொள்கை சீரழிவுகள் இதற்கெல்லாம் எதிராக வலுவான போராட்டம் நடத்தியது இடதுசாரிகள் மட்டுமே. பல மோசமான கொள்கைகளில் காங்கிரஸோடு கைகோர்த்துக் கொண்ட கட்சி பாஜக. ஸ்பெக்ட்ரம், நிலக்கரி போன்ற பிரம்மாண்டமான ஊழல்களுக்கான துவக்கப் புள்ளியே வாஜ்பாய் ஆட்சியில்தான் போடப்பட்டது. காங்கிரஸ் ஆட்சிக்கு எதிராக நாடாளுமன்றத்திற்கு உள்ளேயும் வெளியேயும் இடதுசாரிகள் போராடிய போது பாஜக வேடிக்கைதான் பார்த்துக் கொண்டிருந்தது. ஆனால் இடதுசாரிகளால் உருவாக்கப்பட்ட காங்கிரஸ் மீதான அதிருப்தியை அது அறுவடை செய்து விட்டது.

காங்கிரஸ் மற்றும் பாஜக கட்சிகளின் முதலாளித்துவப் பொருளாதாரக் கொள்கைகளுக்கு எதிரான மாற்றுக் கொள்கைகளை முன்வைத்து ஒரு ஒன்றுபட்ட அணியை உருவாக்க இடதுசாரிகள் முயற்சித்த போது துவக்கத்தில் அதற்கு ஆதரவளித்த பல கட்சிகள் பிறகு ஒதுங்கிப் போனது ஒரு மோசமான நிலைமையை உருவாக்கியது. முலாயம், நவீன் பட்நாயக், ஜெயலலிதா, நிதீஷ் குமார் போன்றவர்களின் பேராசை இதற்குக் காரணம். ஒரு வலுவான மாற்று இருக்கிறது என்ற உணர்வை மக்கள் மத்தியில் ஏற்படுத்த முடியவில்லை.

மோடி வந்தால் ஏதேதோ நடந்து விடும் என்ற மாயையை பல்லாயிரம் கோடிகளைக் கொட்டி உருவாக்க முடிந்ததும் மத உணர்வுகளை மீண்டும் தூண்டி விட முடிந்ததும் பாஜகவின் வெற்றிக்கு ஒரு காரணி.

தமிழகம் போன்ற மாநிலங்களில் ஒரே நாளில் வாக்குப் பதிவை நடத்தி விட்டு மேற்கு வங்கத்தில் ஐந்து கட்டங்களில் தேர்தலை நடத்தி குண்டர்களையும் ரௌடிகளையும் அனைத்து தொகுதிகளுக்கும் அனுப்ப உதவிய அயோக்கியத்தனத்தை தேர்தல் ஆணையம் செய்தது. அங்கே நிகழ்ந்த வன்முறை வெறியாட்டம், மோசடிகள், மிரட்டல்கள் ஆகியவற்றை தேர்தல் ஆணையம் கண்டுகொள்ளவே இல்லை. அதே போல் தமிழகத்தில் பணப் பட்டுவாடா தடையற நடக்க 144 தடையை கொண்டு வந்தது.

கார்ப்பரேட்டுகள் காங்கிரஸ் ஆட்சியில் முடியும் வரை தேசத்தை சுரண்டி விட்டார்கள். இனி இன்னொரு சேவகனான பாஜக மூலம் மிச்சமிருக்கும் செல்வாதாரங்களை சுருட்டலாம் என்று திட்டமிட்டு மோடியை ஜெயிக்க வைத்து விட்டார்கள். இரட்டைக் குதிரைகளாக சங் பரிவாரத்தின் மத வெறி அஜெண்டாவும் கார்ப்பரேட்டின் கொள்ளை அஜெண்டாவும் பூட்டப்பட்ட ரதத்தில் இந்திய மக்களின் மீது மோடியின் பயணம் நடக்கும்.

தங்களுக்கு நன்மை செய்பவர்கள் யார்? தங்களின் வாழ்வைப் பறிப்பவர்கள் யார் என்ற புரிதலே இல்லாமல் இத்தேசத்தின் பெரும்பான்மை மக்கள் அறியாமையில் மூழ்கிக் கிடப்பது இந்தியாவின் பெருந்துயரம். காங்கிரசிற்கு எதிராக ஏன் வாக்களித்தார்களோ அதே கொள்கைகளைத்தான் பாஜகவும் அமலாக்கப்போகிறார்கள் என்பதை அனுபவத்தில் உணர்ந்து கொள்வார்கள்.

“நாடும் நாட்டு மக்களும் நாசமாகப் போகட்டும்” என்ற சாபம் முகநூல் நெடுக பரவிக்கிடக்கிறது. கோபத்திலும் விரக்தியிலும் வந்து விழுந்த வார்த்தைகள் அவை. அப்படிப்பட்ட சோர்வு மக்களுக்காக உண்மையான பணி செய்பவர்களுக்கு அவசியமில்லை.

முதலாளித்துவக் கட்சிகள் தோல்விகளால் துவண்டு முடமாகி விடலாம், மூலையில் முடங்கி விடலாம். ஆனால் மக்களின் பிரச்சினைகளுக்காக மார்க்சிஸ்ட் கம்யூனிஸ்ட் கட்சி முன்னைக் காட்டிலும் வேகமாக, முன்னை விட முனைப்பாக, முன்னைப் போலவே உறுதியாக போராடும். தேர்தல் முடிவுகளால் எங்களுக்கு யாரும் முடிவுரை எழுத முடியாது. அப்படி எண்ணியவர்களின் முடிவுகளையும் பார்த்த அனுபவம் எங்களுக்கு இருக்கிறது.