அதானி டிவிக்காரன் கணக்கே தனிதான் . . .

 

அடுத்த கேரளா முதல்வர் யாரென்று அதானி முதலாளியாக உள்ள என்.டி. டிவி ஒரு கணக்கு போட்டுள்ளது.

அதில் 16.9 % ஐ விட 14.7% பெரியதாக இருக்கிறது.

அது மட்டுமல்ல மார்க்சிஸ்ட் கட்சிக்கு இரண்டு முதல்வர், காங்கிரஸ் கட்சிக்கு இரண்டு முதல்வர் என்று பிரித்து பித்தலாட்டம் செய்துள்ளது.

அப்படி செய்தும் பாஜக முதல் இடத்திற்கு வர முடியலையே அதானி!

எப்படி இருந்த என்.டி, டிவி இப்படி ஆயிடுச்சே!

பத்திரிக்கையாளர் மன்றத்திற்கு பாராட்டுக்கள், ஆனால்

 

இன்று சமூக ஊடகத்தின் வைரல் செய்தி, ஒரு பத்திரிக்கையாளர் சந்திப்பில் திரைக்கலைஞர் கௌரி கிஷன் அவர்களிடம் கீழே தொப்பி அணிந்துள்ள பத்திரிக்கையாளர் (யூ டூயுபராம்) அநாகரீகமாக கேள்வி கேட்டதும் அதற்கு அவர் தக்க பதிலடி கொடுத்ததும்தான். அந்த காணொளியை நான் முழுமையாக பார்த்தேன். 

அந்த நபர் மீண்டும் மீண்டும் கூச்சலிடுகிறான், தன்னிடம் மன்னிப்பு கேட்க வேண்டும் என்றும் கூறுகிறான். அந்தப் பெண் இறுதிவரை உறுதியாக சமாளித்தார்.

சென்னை பத்திரிக்கையாளர் மன்றம் அந்த யூடூயுபரை கண்டித்து அறிக்கை வெளியிட்டுள்ளது.

இந்த அறிக்கை பாராட்டத்தக்கது.

அதே நேரம்

இந்த அறிக்கையில் அந்த யூடூயுபரின் பெயரையும் அந்த சேனலையும் பெயரின் சேர்த்திருக்க வேண்டும். அந்த சமயத்தில் அந்த கார்த்திக்கின் நடவடிக்கையை கண்டிக்காமல் மௌனம் காத்திருந்த இதர பத்திரிக்கையாளர்களையும் சேர்த்து கண்டித்திருக்க வேண்டும். அறிவுரை மட்டும் போதுமானது அல்ல.

லேளா மரங்களாக இருந்தவர்கள் அந்த பத்திரிக்கையாளர்கள் மட்டும் அல்ல, அந்த திரைப்படக்குழுவினரும்தான். அவர்களும் கண்டனத்துக்கு உரியவர்கள். 

தினமலரின் வழக்கமான அயோக்கியத்தனம்

 

தினமலரின் ஜால்ரா முடியல

கீழே உள்ள தின மலர் செய்தியை ஒரு தோழர் மெனக்கெட்டு கொண்டு வந்து கொடுத்தார். எதுக்கு என்னை டென்ஷன் செய்கிறாய் என்று கேட்டதற்கு நீங்க எழுத மேட்டர் கொடுத்திருக்கேன் என்றார்.

ஒரு பிரதமராக உருப்படியாக எதையும் செய்ய துப்பில்லாத மோடி, மாறு வேடப் போட்டியில் கலந்து கொள்வது போல விதம் விதமாக ஆடைகள் மட்டும் அணிந்து கொள்வார்.

 அவர் அணியும் ஆடைகள் எதுவும் எளிமையானது கிடையாது. இயல்பானது கிடையாது. யாருக்கோ வாழ்வு வந்தால் அர்த்தராத்தியில் குடை பிடிப்பார்கள் என்று சொல்வார்களே, அந்த ரகம் இதெல்லாம்.

 அந்த அற்பத்தனத்தின் உச்சம்தான் அவர் பெயர் பொறிக்கப்பட்ட பத்து லட்ச ரூபாய் கோட்டை ஒபாமா வந்த போது அணிந்தது. நாட்டில் உள்ள அனைவரும் கழுவி கழுவி ஊற்றிய பின்பு அந்த ஆடையை ஏலம் போட்டார்கள்.

 ஒரே நாளில்  நாலு முறை, ஐந்து முறை என்று உடை மாற்றுவதெல்லாம் கொழுப்பன்றி வேறில்லை, அல்லது மோடிக்கு ஏதாவது தோல் வியாதி இருந்து பக்கத்தில் உள்ளவர் மூக்கை சுளிப்பார்கள் என்பது காரணமாக இருக்கலாம்.

 அப்படி இருக்கையில்  “உங்களில் ஒருவன் – உடை வழி உணர்த்தும் பிரதமர்” என்றெல்லாம் தலைப்பு கொடுத்திருப்பதெல்லாம்  தினமலரின் வழக்கமான அயோக்கியத்தனம்.

 நியாயப்படிப் பார்த்தால் மேலே உள்ள படத்தில் வடிவேலு கேட்பது போன்ற கேள்வியைத்தான் தின மலர் கேட்டிருக்க வேண்டும்.

தமிழ் இந்து வெட்டிய "தகப்பன்சாமி"

 

எங்கள் தஞ்சைக் கோட்டத்தோழரும் தமுஎகச துணைப் பொதுச்செயலாளருமான தோழர் களப்பிரன் எழுதிய கட்டுரையை இங்கே பகிர்ந்து கொண்டுள்ளேன்.

நேற்றைய தமிழ் இந்து வெளியிட்ட கட்டுரையில் வெட்டப்பட்ட பகுதிகளை ப்ரௌன் நிறத்தில் கொடுத்துள்ளேன்.

சங் பரிவாரம் பற்றிய பயமோ, கரிசனமோ, சில முக்கியமான பகுதிகள் வெட்டப்பட்டுள்ளது.

நவம்பர் 14 ம் தேதியன்று ஜவஹர்லால் நேரு பற்றிய கட்டுரையை வெளியிட மறுத்த அனுபவம் தோழர் களப்பிரனுக்கு நேர்ந்துள்ளது. இந்த கட்டுரை பிரசுரமானதற்கு அதிலே மகாத்மா காந்தி குறித்த விமர்சனங்களும் உள்ளது கூட காரணமாக இருக்கலாம்.

ஆனாலும் கூட அண்ணல் அம்பேத்கரை மகாத்மா காந்தியின் தகப்பன்சாமி என்று சொல்லும் வரி நீக்கப்பட்டுள்ளது. தலைப்பிம் கூட மாற்றப்பட்டு விட்டது. ஒருவேளை இதுவும் ஒரு வகை தீண்டாமையோ.

*அம்பேத்கர் எனும் தகப்பன்சாமி*

- களப்பிரன் Kalapiran Kalam

(நன்றி: இந்து தமிழ் திசை 30.01.2025)

இன்று வெளிவந்துள்ள கட்டுரையின் முழு வடிவம்

காந்தியடிகள் படுகொலை செய்யப்பட்ட நாளில் அம்பேத்கர் குறித்து ஏன் பேசவேண்டும்? தன் வாழ்நாளின் கடைசி நிமிடம் வரை காந்தியடிகளுடன் மாறுபட்ட கருத்துக்கொண்டிருந்த ஒருவர் குறித்து இந்நாளில் பேச என்ன இருக்கிறது? காந்தியடிகளை மகாத்மா என்று ஏற்றுக்கொள்ளாதவர் அம்பேத்கர். காந்தியடிகளும் அம்பேத்கர் கருத்துக்கு எதிராக தனது இதழ்களில் தொடர்ந்து பதில் எழுதிக்கொண்டே இருந்தார். இப்படி இவர்களுக்குள் இருந்த பல முரண்பாடுகளை சொல்லிக் கொண்டே போகலாம். ஆனால் காந்தியடிகள் வாழ்க்கையில் நடைபெற்ற மிக முக்கியமான மனமாற்றங்களுக்கு அம்பேத்கர் எந்த அளவிற்கு தாக்கம் செழுத்தினார் என்று பார்த்தோமானால், இவர்களுக்குள் இருந்தது பகை முரண் அல்ல என்பது நன்றாகத் தெரியும்.

*தீண்டாமைக்கு எதிரான தலைவர்*

1948 ஜனவரி 30ல் காந்தியடிகள் சுட்டுக்கொல்லப்பட்டதற்கு முன்பாக அவரைக் படுகொலை செய்ய ஏழு முறை முயற்சிகள் நடைபெற்றுள்ளது. அந்த ஏழு முயற்சிகளும் காந்தியடிகளுக்கும் அம்பேத்கருக்கும் நடைபெற்ற பூனா ஒப்பந்த உரையாடலுக்குப் பின்பே நடைபெற்றது. காந்தியடிகள் ஆப்ரிக்காவில் இருந்த காலத்திலிருந்தே தீண்டாமைக்கு எதிராக குரல் கொடுத்துவந்தவர் தான். தன் மனைவி கஸ்தூரிபாயை கொண்டு ஒரு ஒடுக்கப்பட்டவரின் மலச்சட்டியை சுமக்கச்சொல்லும் அளவிற்கு தீண்டாமைக்கு எதிராக சொந்த வாழ்வில் இருந்தவர் தான். 1915ல் இந்தியா வந்த பிறகு அகமதாபாத்தில் அவர் தொடங்கிய ஆசிரமத்தில் ஒடுக்கப்பட்ட சாதியை சேர்ந்த ஒரு குடும்பத்தை தங்கவைத்தார். அதற்காக காந்தியடிகளை வைணவப் பிரிவினர் ஊரை விட்டே ஒதுக்கி வைத்தனர். அவர் ஆசிரமத்திற்கு நிதி கொடுத்தவர்கள் தங்கள் நிதியை நிறுத்திக்கொண்டனர். ஆனாலும் காந்தியடிகள் தன் ஆசிரமத்தை தொடர்ந்து நடத்தினார்.

”தீண்டாமை ஒரு பாவகரமான செயல். அதைப் பின்பற்றுகிற நீங்கள் எல்லாம் இந்து மதத்தின் ஜெனரல் டயர்கள்” என்றும், “நாம் ஆங்கிலேயரிடம் இருந்து விடுதலை பெறப் போராடுகிறோம். பெரும்பான்மை மக்களைச் சமமானவர்களாக நடத்தாமல் தீண்டாமைக் கொடுமையால் பிரித்து வைத்திருக்கும் வரை நமக்கு சுயராஜ்ஜியம் சாத்தியமே இல்லை” என்றும் 1920களிலேயே அதுவும் காங்கிரஸ் மாநாடுகளில் நின்று கொண்டு கடுமையாக பேசியவர் தான் காந்தியடிகள். ஆனாலும் சாதிய அமைப்பு குறித்தும், இந்துமத புனிதம் குறித்தும் காந்தியடிகளுக்கு இருந்த பார்வை மிகப்பழமையானவை. அப்போதெல்லாம் காந்தியடிகளின் இக்கருத்துக்கு எதிராக யாரும் வீதியில் இறங்கி போராடவில்லை.

*கிளம்பிய எதிர்ப்பு*

1932 பூனா ஒப்பந்தத்தை ஒட்டியும் அதற்கு பின்பும் அம்பேத்கருடன் நடைபெற்ற உரையாடல்கள் காந்தியடிகளிடம் பெரும் மனமாற்றத்தை ஏற்படுத்தியது. அதுவரை தீண்டாமைக்கு எதிரான கருத்துக்கள் இவரின் தனிப்பட்ட கருத்துக்களாகவே பார்க்கப்பட்டது. அம்பேத்கருடனான உரையாடலுக்குப் பின் அது ”ஹரிஜன இயக்கம்” என்று தேசிய இயக்கத்தின் வேலைத் திட்டமாக மாறியது. தீண்டாமைக்கு எதிராக காந்தியடிகள் தொடர் சுற்றுப்பயணம் செய்யத் தொடங்கி அது சூராவளியாக வீசத் தொடங்கியவுடன், அவருக்கு எதிராக இந்துமகா சபையினரின் கருப்புக் கொடி ஆர்ப்பாட்டம், மலத்தை எடுத்து அவர் மீது வீசுதல் என்று எதிர் இயக்கத்தை தொடங்கினார்கள். முதல் முறையாக இந்தியாவில் காந்தியடிகளுக்கு எதிரான இயக்கம் தீவிரமடைந்தது அப்போது தான். அதன் உச்சமாக 1934 ஜுன் 25ல் புனாவில் அவர் சென்று கொண்டிருந்த கார் மீது குண்டு வீசி, அவரை கொலை செய்யும் முதல் முயற்சியை தொடங்கி வைத்தார்கள். அம்பேத்கரை காந்தியடிகள் சந்தித்து உரையாடாமல் இருந்திருந்தால் இந்த முதல் கொலை முயற்சியே நடந்திருக்காது.

ஆனாலும் காந்தியடிகளின் தீண்டாமைக்கு எதிரான இயக்கம் சுனக்கமில்லாமல் தீவிரமடைந்தது. கோவில் நுழைவுப் போராட்டம், தலித் அல்லாதோர் தலித்துகளை சாதிமறுப்புத் திருமணம் செய்து கொண்டால் மட்டுமே அவர்களை ஆசிர்வதிப்பது என்று அவர் பணி இன்னும் வேகமெடுத்தது. ”இந்து மதத்தின் புனிதத்தை நீங்கள் கெடுக்கலாமா?” என்று காந்தியடிகளை நோக்கி வீசப்பட்ட கேள்விகளுக்கு “என்னுடைய செயலால் இந்து மதம் அழிந்தால் அழியட்டும். நான் கவலைப்படவில்லை. நான் இந்து மதத்தை காப்பாற்ற வரவில்லை. இந்து மதத்தின் முகத்தை மாற்றவே விரும்புகிறேன்” என்று கடுமையான பதிலைளித்தார். அவர் பேச்சின் சுடு தாங்காமல், “காந்தியையும் அவரைப் பின்பற்றுகிறவர்களையும் மக்கள் தொகை கணக்கெடுப்பில் இந்து இல்லை என்று குறிக்க வேண்டும்” என்று ஆங்கில அரசுக்கு கடிதம் எழுதினார்கள் அப்போதைய மடாதிபதிகள். இதன் தொடர்ச்சியாக காந்தியை கொலை செய்த அதே நாதுராம் கோட்சே 1944 மே மாதத்தில் புனே அருகே உள்ள பஞ்சாக்னி என்ற இடத்தில் காந்தியடிகள் மீது கத்தியால் குத்தி இரண்டாம் கொலை முயற்சியில் ஈடுபட்டார்.

*இவ்வாறு நடைபெற்ற தொடர் கொலை முயற்சிகளுக்கு, காந்தியடிகள் இந்துமத சனாதனிகளின் கருத்துக்களுக்கு எதிராக தீவிரமாக செயல்பட்டதே காரணமாகும். ஒரு முறை காந்தியடிகள், “கொலை முயற்சியிலிருந்து எனது உயிர் ஏழு முறை காப்பாற்றப்பட்டிருக்கிறது. நான் அவ்வளவு சீக்கிரம் இறந்து விட மாட்டேன். 125 ஆண்டுகள் வரை உயிர் வாழ்வேன்” என்று கூறினார். அதற்கு பதிலாக நாதுராம் கோட்சே தான் நடத்தி வந்த ”அக்ரனி” இதழில் “அதுவரை யார் உங்களை உயிருடன் விட்டுவைக்கப் போகிறார்கள் பார்ப்போம்” என்று வன்மத்தோடு பதில் எழுதினார். அதன் பிறகே 1948 ஜனவரி 30ல் அதே கோட்சேவால் காந்தியடிகள் சுட்டுக் கொல்லப்பட்டார். அந்த அளவிற்கு காந்தியடிகளுக்கும் சனாதானிகளுக்கும் இடையே தீராப்பகையை தொடங்கிவைத்தது அம்பேத்கருடனான காந்தியடிகளின் உரையாடல்களே.*

ஆனாலும் காந்தியடிகளின் தீண்டாமை ஒழிப்புப் பணிகளை அம்பேத்கர் முழுவதும் அங்கீகரிக்கவில்லை. பல நேரங்களில் கடிந்தே சொல்லியுள்ளார். ”காந்தி ஒரு ஆச்சாரமான இந்து தான். இவரால் தீண்டாமை ஒழிக்கப்படாது. அமெரிக்காவில் கருப்பினத்தவர்களுக்காகப் போராடிய கேரிசன் போலல்ல காந்தி” என்றே விமர்சித்தார். ஆனால் மறுமுனையில் காந்தியடிகளோ, “டாக்டர் அம்பேத்கரின் விமர்சனத்தை என்னால் புரிந்து கொள்ள முடிகிறது. என் மீது துப்புவதற்கு கூட அவருக்கு உரிமை உண்டு. அனைத்து உயர் சாதி இந்துக்களும் தீண்டத்தகாதவர்களை நடத்துவது பாவம். நம் மீது காறி உமிழ்வதற்கு அவர்களுக்கு முழு உரிமை உண்டு. அதை செய்தால் நான் ஏற்றுக்கொள்வேன்” என்று பதிலளிக்கிறார். ஆனால் இவ்வளவு கணிவான பதிலை தன்னை எதிர்க்கும் சனாதனிகளுக்கு எதிராக காந்தியடிகள் ஒருபோதும் சொன்னதில்லை.

*காந்தி – அம்பேத்கர் உறவு*

இந்திய பாகிஸ்தான் பிரிவினைக்குப் பிறகு அம்பேத்கரை ஜின்னா தன் நாட்டிற்கு அழைத்தார். காரணம் அம்பேத்கர் 1946ல் அன்றைய வங்காள மாகனத்திலிருந்தே தேர்வு செய்யப்பட்டார். அது பாகிஸ்தான் வசமானது. ஆனால் காந்தியடிகள் இதில் தலையிட்டு அம்பேத்கரை மும்பை மாகாணத்திலிருந்து மீண்டும் தேர்வு செய்ய வலியுறுத்தினார். அதோடு அவரை இந்தியாவின் முதல் அமைச்சரவையில் இடம்பெறச் செய்ய வேண்டும் என்பதையும் தனது விருப்பமாக முன்வைத்தார். சனாதானிகளிடம் இருந்த பகை முரண் போல் ஒரு நாளும் காந்திக்கும் அம்பேத்கருக்கும் இடையே இருந்த முரண்கள் பகை கொண்டதாக இருந்ததில்லை.

காந்தியடிகளைப் பொறுத்த வரையில் இந்திய விடுதலைப் போராட்டக் களத்தில் அன்றைக்கு இருந்த நேரு, நேதாஜி, அம்பேத்கர், பிசி ஜோசி என்ற எல்லோருமே அவரின் பிள்ளை வயது உடையவர்களே. அதனால் ஒரு தந்தையின் முறுக்கோடே அவர் எல்லோரிடமும் நடந்துகொண்டார். தான் எடுத்த முடிவில் ஒருநாளும் அவர் பின்வாங்கியது கிடையாது. சில பிள்ளைகள் அவர் பேச்சை கேட்கும். சில பிள்ளைகள் அவரோடு முரண்பட்டு நிற்கும். ஆனாலும் அவர் தனது முடிவை முரண்படும் பிள்ளைக்காக மாற்றிக் கொண்டதேயில்லை. அதற்காக வருத்தப்பட்டதுமில்லை. ஆனால் ஒரே ஒரு பிள்ளை அவரின் மனசாட்சியை தூங்கவிடமால் செய்தது. அந்தப் பிள்ளை அண்ணல் அம்பேத்கர். அந்தப் பிள்ளைக்காகவே அவர் பல நேரங்களில் மனம் மாறினார். நம்மூரில் தந்தைக்கு அறிவுரை சொல்லும் பிள்ளைக்கு தகப்பன் சாமி என்ற பெயர் உண்டு. காந்தியடிகள் வாழ்வில் அவருக்கான தகப்பன் சாமி அண்ணல் அம்பேத்கர் தான்.

நேருவின் மேல் என்னய்யா பயம்?

 

எங்கள் தஞ்சைக் கோட்டத் தோழரும் தமிழ்நாடு முற்போக்கு எழுத்தாளர்கள் கலைஞர்கள் சங்கத்தின் துணைப் பொதுச்செயலாளருமான தோழர் களப்பிரன் எழுதிய முகநூல் பதிவையும் அவர் எழுதிய கட்டுரையையும் இங்கே பகிர்ந்து கொண்டுள்ளேன்.

நேரு பற்றிய கட்டுரையை அவரது பிறந்த நாளன்று கூட அச்சிட ஊடகங்கள் மறுக்கின்றன என்றால் யார் மீது பயம்? 

இன்றைய ஆட்சியாளர்கள் கோபித்துக் கொள்வார்கள் என்ற பயமா?

மோடி மாதிரியான சில்லறைகள் பிரதமராக இருக்கும் காலத்தில் இப்படியும் ஒரு சிறந்த மனிதர் பிரதமராக இருந்தார் என்ற உண்மை தெரியக்கூடாது என்ற பயமா?

நேரு பற்றி கட்டமைத்த பொய்கள் தகர்ந்து போகுமா என்ற அச்சமா?

தோழர் களப்பிரனின் முகநூல் பதிவு கீழே

*9 ஆண்டுகளை இந்திய விடுதலைப் போரில் சிறையில் கழித்தவர்.*

*17 ஆண்டுகள் இந்தியாவின் பிரதமராக தொடர்ந்து இருந்தவர்.*

*தன் குடும்ப சொத்துக்கள் பலவற்றை இந்த நாட்டிற்கு கொடையளித்தவர்.*

*அவர் பிறந்த நாள் குழந்தைகள் தினமும் கூட.*

*ஆனால் அவர் குறித்து ஒரு கட்டுரையோ, செய்தியோ எதுவும் எதிலும் வந்துவிடக் கூடாது என்ற மேலிட உத்தரவுகளுக்கு கட்டுப்பட்டு எல்லா அச்சு ஊடகங்களும் அச்சத்தால் இன்று மௌனம் காக்கிறது.*

*இது நம் ஜனநாயகத்திற்கு கொஞ்சமும் நல்லதல்ல...*

*இந்தச் சூழலில் நேரு குறித்த என்னுடைய இன்றைய பொழுதின் இரண்டாவது கட்டுரை.*

*இந்தக்கட்டுரையும் ஒரு பெரும் அச்சு ஊடகம் அச்சப்பட்டு பதிப்பிக்க மறுத்த கட்டுரையே. இதனை மாற்று இணைய இதழ் தற்போது பதிப்பித்துள்ளது.*

*அவசியம் வாசிக்கவும்*

மாற்று இணைய தளத்தில் வெளியான கட்டுரை

நேரு – இந்தியாவின் விலைமதிப்பில்லா ஆபரணம்

”இந்திய விடுதலையின் விடியலுக்கு முன்னால் இருந்த இருள் சூழ்ந்த பொழுதில், நமது வழிகாட்டும் விளக்காக ஜவஹர்லால் நேரு தான் இருக்க வேண்டும் என்ற முடிவும், விடுதலையை நாம் சாதித்ததைத் தொடர்ந்து, இந்தியா பிரச்சினைக்குப் பின் பிரச்சனையை எதிர் கொள்ளும் போது, நமது நம்பிக்கையை உயர்த்திப் பிடிப்பவராகவும், நமது படைகளின் தளபதியாகவும் நேரு மட்டுமே இருக்க வேண்டும் என்பதும், அவருக்கு இருந்த தகுதிகளின் அடிப்படையில் தான் அவரை தேர்வு செய்தோம். நமது கடினமான வாழ்வின் கடைசி இரண்டு ஆண்டுகளில் இந்த நாட்டுக்காக நேரு எந்த அளவுக்கு உழைத்தார் என்பது என்னை விடவும் வேறு ஒருவரும் அறியார். அவர் சுமந்த பிரமாண்டமான பொறுப்புக்களாலும், அவர் வகித்த உயர்ந்த பதவி தந்த கவலைகளாலும், அந்தக் காலத்தின் போது, விரைவாக அவருக்கு வயதாகி விட்டதை நான் கண்டேன்.” 

இந்த வார்த்தைகளை நேருவின் தீவிர ஆதரவாளரோ, நண்பரோ, உறவினரோ, அல்லது அவரை விட வயதில் குறைந்த யாரோ ஒருவர் சொல்லியிருக்கக்கூடும் என்று நீங்கள் நினைக்கலாம். ஆனால் இந்த வார்த்தைகளுக்குச் சொந்தக்காரர்   நேருவை விட 14ஆண்டுகள் வயதில் மூத்தவரான சர்தார் வல்லபாய் படேல். நேருவுக்கு எதிராக பல நேரங்களின் இன்றைய பிரதமர் தொடங்கி ’நேரு ஒவ்வாமை’ கொண்ட அத்தனை சங்பரிவாரத்தவர்களும் நேருவிற்கு எதிராக படேலை முன் நிறுத்தி உண்மைக்குப் புறம்பான பிரச்சாரம் செய்துவருகிறார்கள். படேலின் 150ஆவது ஆண்டுவிழாவில் கூட படேலை உயர்த்திப்பேசுவதற்காகவே நேருவை தாழ்த்திப்பேசும் நிகழ்வுகள் அறங்கேறின. ஆனால் உண்மை அதுவல்ல என்பதை அந்தக்காலத்தின் ஆவணங்கள் நமக்கு உணர்த்துகிறது. நேரு குறித்த நீண்ட உரையின் ஒரு பகுதியான இந்த வார்த்தைகள், படேல் தான் காலமாகும் ஓராண்டு முன்பாக 14 அக்டோபர் 1949ல் தன் அந்திம காலத்தில் பேசியவை.

நேருவின் தேர்வும் – படேலின் இசைவும்

1947 இந்திய விடுதலைக்கு முன்பாக நடைபெற்ற காங்கிரஸ் கட்சியின் தலைவர் தேர்தல் மிக முக்கியமானது. அந்தத் தேர்தலில் தேர்வு செய்யப்படுகிறவர் தான் இந்தியாவின் முதல் பிரதமர் என்கிற நிலை இருந்தது. அன்றைய இந்தியாவின் 15 மாகானங்களில் 12 மாகனங்கள் படேலை தேர்வு செய்தனர். அந்த அளவிற்கு காங்கிரஸ் கட்சியை படேல் தன் கட்டுப்பாட்டில் வைத்திருந்தார். ஆனால் இந்திய நாட்டு மக்கள் மத்தியில் மட்டுமல்ல, உலகத் தலைவர்கள் மத்தியிலும் புகழ் மிக்க தலைவராக நேரு இருந்தார். அதோடு காந்தியடிகள் தனது தீவிர விசுவாசியான படேலுக்கு பதிலாக, தன்னிடம் பல இடங்களில் முரண்படும்  நேருவை பிரதமராக தேர்வு செய்ய தனது விருப்பத்தை தெரிவித்தார். அதற்கு காந்தியடிகள் சொன்ன காரணம், “நேரு நவீன சிந்தனை கொண்டவர். உலகலாவிய அவரின் முற்போக்கு எண்ணம் கொண்ட பார்வை இந்தியாவின் எதிர்காலத்திற்கு உதவும்” என்று குறிப்பிட்டார். இறுதியில் காந்தியின் முடிவே காங்கிரஸ் முடிவானது.

நேரு விடுதலை இந்தியாவின் முதல் பிரதமராக தேர்வு செய்யப்பட்டார். அதன் பின்னர் 1947 ஆகஸ்ட் 1 அன்று நேரு படேலுக்கு ஒரு கடிதம் எழுதினார். அதில் “ஓரளவு சம்பிரதாயங்கள் கடைபிடிக்கவேண்டும் என்பதன் அடிப்படையில் மத்திய அமைச்சரவையில் உங்களை சேர்த்துக் கொள்வதற்கான முறையான அழைப்பு விடுப்பதற்கான கடிதம் இது. இந்தக் கடிதத்திற்கு எந்தவித முக்கியத்துவமும் கிடையாது, ஏனெனில் நீங்கள் நம் அமைச்சரவையின் வலுவான தூண்.” என்று குறிப்பிட்டார். அதற்கு படேல், “எனது வாழ்வின் எஞ்சியுள்ள காலம் முழுவதும் உங்களுக்கு சேவை செய்ய விரும்புகிறேன். உங்களைப் போன்ற தியாகத்தை வேறு யாரும் செய்ததில்லை, நாட்டின் லட்சியத்தை நிறைவேற்ற அப்பழுக்கற்ற முழுமையான விசுவாசத்தை காட்டுவேன்.” என்று பதில் எழுதினார். இந்த இருவரைத் தான் இன்றைக்கு ஒருவருக்கு எதிராக ஒருவரை நிறுத்த முயற்சிக்கிறார்கள்.

எல்லோருக்கும் இடம் கொடுத்த நேரு அமைச்சரவை

கருத்தியல் ரீதியில் படேலுக்கு நேருவிற்கு பல எதிர் முனைகள் இருந்தாலும், செயல்பாட்டில் ஒருவரை ஒருவர் விட்டுக்கொடுத்து எங்கும் நடந்துகொள்ளவில்லை. படேல் மட்டுமல்ல, எதிர்கட்சிகளாக இருந்தவர்களையும் கூட தன்னுடைய முதல் அமைச்சரவையில் இணைத்துக் கொண்டார் நேரு. தொடர்ந்து காங்கிரஸ் மற்றும் நேருவின் கொள்கைகளை விமர்சித்து வந்தவர் டாக்டர் பாபாசாஹேப் அம்பேத்கர். அதே போல் நேரு தன் காலம் முழுக்க விமர்சித்து வந்த இந்து மகாசபை அமைப்பின் அப்போதைய தலைவர் டாக்டர் ஷியாம்பிரசாத் முகர்ஜி. இந்த இருவருக்கும் தனது அமைச்சரவையில் இடம் கொடுத்தார் நேரு. அதற்கு நேரு சொன்ன காரணம், ”இருவரின் கல்வி மற்றும் அரசியல் அறிவுத்திறன் புதிய இந்தியாவிற்குத் தேவை” என்றார். அதோடு ”நாம் பெற்றுள்ள சுதந்திரம் காங்கிரஸுக்கானது மட்டுமல்ல, அனைத்து மக்களுக்குமானது” என்றார் நேரு. பல்வேறு கட்சிகளை சேர்ந்தவர்களுக்கும் தனது அமைச்சரவையில் இடம் கொடுக்க வேண்டும் என்று காங்கிரஸ் கட்சிக்குள்ளும் அவர் வாதிட்டார்.

நேரு வாரிசு அரசியலுக்கு வித்திட்டாரா

“நேரு தனது குடும்பத்தை மட்டுமே அரசியல் வாரிசாக்கினார் என்றும், படேல் உள்ளிட்டவர்களையும் அவர்களது குடும்பத்தினரையும் திட்டமிட்டு அரசியலில் இருட்டடிப்பு செய்துவிட்டார்” என்றும் கூசாமல் இன்றும் தவறான விமர்சனங்களையும் முன்வைக்கிறார்கள். உண்மை என்ன என்றால் நேரு காலமாகும் வரை அவரது ஒரே மகளான இந்திரா நாடாளுமன்ற உறுப்பினராகக் கூட அவர் அனுமதிக்கவில்லை. ஆனால் அதே நேரத்தில் படேல் மறைவிற்குப் பிறகு அவரது மகள் மணிபென் படேலுக்கு 1952 முதல் தேர்தலிலேயே தெற்கு கைரா தொகுதியிலிருந்து போட்டியிட வாய்ப்பு கொடுத்து வெற்றி பெறச்செய்தார். அதே போல் 1957ல் ஆனந்த் நாடாளுமன்றத் தொகுதியிலும் 1964 மாநிலங்களவை உறுப்பினராகவும் காங்கிரஸ் சார்பில் தேர்வு செய்யப்பட்டார் மணிபென். அதோடு 1957 தொடங்கி 1964 வரை மணிபென் குஜராத் காங்கிரஸ் தலைவராகவும் இருந்தார். அதே போல் படேலின் மகன் தஹ்யாபாய் படேலும் 1957 முதல் 1973 வரை நாடாளுமன்ற உறுப்பினராக தொடர்ந்து பதவி வகித்தார். இதில் நகை முரண் என்னவென்றால் இன்றைக்கு படேலுக்காக கண்ணீர் வடிக்கும் ஆர்.எஸ்.எஸ். கார்ர்கள் தான், அன்றைக்கு படேல் வாரிசுகளான மணிபென்னும், தஹ்யாபாயும் நாடாளுமன்ற உறுப்பினர்களாக தேர்வு செய்யப்பட்ட போது, ஒவ்வொரு முறையும் கடுமையாக எதிர்தவர்களாக இருந்தார்கள். ஆனால் நேருவின் ஒரே மகள் இந்திராவோ 1964 நேரு மறைவிற்குப் பிறகே நாடாளுமன்ற உறுப்பினராக்கப்பட்டார்.

நேரு சந்தித்த தேர்தல்கள்

நேருவை பிரதமராக தேர்வு செய்த காந்தியடிகள் 1948லேயே இந்துத்துவ தீவிரவாதிகளால் கொல்லப்பட்டுவிட்டார். நேருவின் அமைச்சரவையில் இருந்த மூத்த உறுப்பினரான படேல் 1950லேயே காலமாகிவிட்டார். ஆனால் இவர்களது மறைவிகுப் பின்னர் தான் நாட்டின் முதல் பொதுத் தேர்தல் நடைபெற்றது. பெரும்பாலும் எழுத்தறிவு இல்லாத, ஆனால் வயது வந்தோர் அனைவருக்கும் வாக்களிக்கும் முறையில் முதன் முதலாக அறிவிக்கப்பட்ட உலகின் மிகப்பெரும் ஜனநாயக நாடு, தனது முதல் தேர்தலை 1952ல் சந்தித்தது. இந்தத் தேர்தல் பிரச்சாரத்தில் காங்கிரஸ் கட்சிக்கு வாக்களிக்க வேண்டும் என்பதற்காக எதிர்கட்சிகளை தகாத வார்த்தைகளில் நேரு பேசவில்லை. உண்மைக்குப் புறப்பான செய்திகளை சொல்லி நேரு வாக்கு கேட்கவில்லை. அன்றைக்கு புதிய இந்தியாவின் முன் இருந்த பல்வேறு சவால்களை எளிய மக்கள் முன் வைத்தார். இந்தியாவின் வளர்ச்சிக்கு என்னென்ன செய்யலாம் என்று பேசினார். அதோடு மதவாதத்தால் பீடிக்கப்பட்டிருந்த பகுதிகளின் மத்தியில் மதவாதத்தில் உள்ள தீமைகளை முன்வைத்து பிரச்சாரம் செய்தார். இந்தப் பிரச்சாரத்தின் முடிவில் நடந்த தேர்தலில் தான் 490 இடங்களில் காங்கிரஸ் 364 இடங்களில் வெற்றி பெற்றது. அது முதல் தேர்தல் அதனால் தான் அவ்வளவு இடங்களை காங்கிரஸ் வென்றது என்று நினைக்கலாம். ஆனால் நேரு இருந்த காலத்தில் நடைபெற்ற 1957ல் தேர்தலில் 371 இடங்களும், 1962 தேர்தலில் 361 இடங்களையும் தொடர்ந்து காங்கிரஸ் வென்றது. இது முழுக்க முழுக்க நேரு என்கிற மனிதர் இந்தியா எனும் நாட்டை மதசார்பற்ற, ஜனநாயக நாடாக பாதுகாத்து நடத்திய உள்நாட்டுப் போராட்டத்திற்கு, நாட்டு மக்களிடம் நடத்திய உரையாடலுக்குக் கிடைத்த வெற்றி ஆகும்.

நேரு குறித்து நிறைவாக படேல்

படேல் தனது மேற்கண்ட உரையின் நிறைவாக ”நேருவின் மாபெரும் மற்றும் அனைவரையும் விஞ்சி நிற்கும் ஆளுமை பற்றி இந்த சில வார்த்தைகளால் நிறைவு செய்வது வெளிப்படையாகவே இயலாத ஒன்று. அவரது பல்துறை திறம் மிக்க பாத்திரமும், சாதனைகளும் அவர் பற்றிய வரையறுப்பை உடன் மீறக்கூடியவை. சில நேரங்களில் அவருடைய சிந்தனைகள், எளிதில் அளக்க முடியாத ஓர் ஆழம் மிக்கவை. ஆனால் அவற்றுக்குள் எல்லாம் ஆழ்ந்திருப்பது, ஜாதி, சமயம், இனம் மற்றும் மத வேறுபாடின்றி அனைவருக்கும் அவரை பிரியமுடையவராக்கும் ஓர் வெளிப்படையான நேர்மையும், ஓர் இளைஞனின் நெஞ்சுரமும் தான். அவரது அறுபதாம் ஆண்டு வைர விழாவை முன்னிட்டு, சுதந்திர இந்தியாவின் இந்த விலை மதிப்பற்ற சொத்துக்கு நாம் மரியாதை செலுத்துவோம். இந்த நாட்டை முன்னேற்றுவதிலும், அவருடைய இலட்சியங்களை அடைவதற்கான முயற்சிகளிலும் அவர் பெரும், பெரும் வெற்றிகளை உறுதி செய்யட்டும்.” ஜவஹர் என்றால் ஆபரணம் என்று பொருள். ஆம் ஜவஹர்லால் நேரு நம் இந்திய நாட்டின் விலைமதிப்பில்லா ஆபரணம் தான்.

– களப்பிரன்

பஜாஜ் வீட்டுக்கு அமலாக்கப்பிரிவு போகலையா?

 

பஜாஜ் நிறுவனத்தின் முதலாளிகளில் ஒருவரான ராஜீவ் பஜாஜ், நான்கு வருடங்களுக்கு முன் சொன்ன ஒரு கருத்தை இப்போதுதான் பார்த்தேன்.

 

மோடியின் சத்தமான ஜால்ராவான, தன்னை மோடியின் நாய் என்று வெளிப்படையாக அறிவித்துக் கொண்ட  அர்ணாப் கோஸ்வாமியின் ரிபப்ளிக் டிவிக்கு விளம்பரம் தர முடியாது என்று  சொன்ன ராஜீவ் பஜாஜின் வீட்டுக்கோ அலுவலகத்திற்கு ஏன் உங்கள் எடுபிடிகளாக இருக்கும் அமலாக்கத்துறை, வருமான வரித் துறை ஆகியோரை ஏன் இன்னும் அனுப்பவில்லை

கருத்துத் திணிப்பே பாஜகவிற்கு பாதகமென்றால்?

 

ஹரியானா மாநிலம் மற்றும் ஜம்மு காஷ்மீர் யூனியன் பிரதேசம் (இப்படி சொல்ல வைத்தது மோடியின் அயோக்கியத்தனங்களில் ஒன்று) தேர்தல் முடிவுகள் நாளை வரும்.

தேர்தலுக்கு பிந்தைய கருத்துக் கணிப்பு முடிவுகள் இரண்டு மாநிலங்களிலும் (மோடி ஜம்மு காஷ்மீரை யூனியன் பிரதேசமாக்கினால் நாமும் அப்படித்தான் எழுத வேண்டுமா என்ன!) காங்கிரஸ் மற்றும் தேசிய மாநாட்டுக் கட்சிக்கு சாதகமாகவே அமைந்துள்ளன.

எப்போதுமே எக்ஸிட் போல் முடிவுகள் பாஜகவிற்கு ஆதரவான கருத்துத் திணிப்பாகத்தான் அமைந்துள்ளது.

அப்படிப்பட்ட கருத்துத் திணிப்பே பாஜக வெற்றி பெறாது என்று சொன்னால் உண்மை நிலவரம் இன்னும் மோசமாக இருக்குமோ!

நாளைய முடிவுகள் பாஜகவிற்கு மரண அடியாய் அமையட்டும். 

முடியாது மொட்டைச்சாமியாரே . . .

 

மொட்டைச்சாமியார் அறிவித்துள்ள டிஜிட்டல் கொள்கை கீழே . .

பணத்திற்காக எந்த அளவிற்கும் கீழிறங்கத் தயாராக உள்ள ஒரு போலிகள் வேண்டுமானால் பணத்திற்காக எழுத்தை விற்கலாம். குற்றவாளிகளின் புரோக்கர்கள் சிலர் என்ன வேண்டுமானாலும் எழுதுவார்கள். 

ஆனால்

என்னைப் போல கொண்ட கொள்கையில் உறுதியாக நிற்பவர்களை எல்லாம் மொட்டைச்சாமியார் எச்சரித்துள்ள சிறைத் தண்டனை கூட அச்சுறுத்தாது. உண்மைகளை தொடர்ந்து எழுதுவோம். 

என்ன "தி இந்து" நக்கலா?

 

இன்றைய ஆங்கில இந்து நாளிதழின் முதல் பக்கத்தில் மேலே உள்ள செய்தி " அமன் செஹாவரத்" இந்தியாவின் நாற்பத்தி ஒன்றாவது பதக்கத்தை வென்றார்" என்று தொடங்குகிறது.

கிடைக்க வேண்டிய தங்கப் பதக்கத்தைக் கூட கேடு கெட்ட தெய்வக் குழந்தை வகையறாக்கள் சதி செய்து கெடுத்து விட்டார்களே, எப்படி ஒரே இரவில் இத்தனை பதக்கங்கள் வந்தது என்று ஆச்சர்யத்துடன் மேலே படித்தால்தான் தெரிகிறது. 1900 ம் ஆண்டு ஒலிம்பிக்ஸ் போட்டியில் தொடங்கி 2024 பாரீஸ் ஒலிம்பிக் போட்டி வரை இந்தியா இதுவரை 41 பதக்கங்களை மட்டுமே வென்றுள்ளது என்ற அவலத்தை சொல்லும் செய்தி அது என்று.

இப்படி ஒரு நக்கல் தேவையா "தி இந்து"விற்கு?

பிகு: மத வெறியை தூண்டும் விஷப் பேச்சுக்களுக்கு வயது வாரியா போட்டிகள் வையுங்கய்யா, அவதாரமும் அவதாரத்தின் அத்தனை அல்லக்கைகளும் அனைத்து பதக்கங்களையும் அள்ளி வருவார்கள் பாருங்கய்யா . . .

வெட்கமே கிடையாதா பாண்டே?

 

ஊடகச்சங்கி ரங்கராஜ் பாண்டே தன் சாண்க்யா, ட்விட்டர் பக்கத்தில் புளகாங்கிதத்தோடு போட்ட பதிவு கீழே . . 

அரசு எழுதித்தருவதை படிப்பதுதான் ஜனாதிபதியின் வேலை. இது தெரிந்தும் என்னமோ ஜனாதிபதியே ஜிந்திச்சு பேசின மாதிரி பீற்றிக் கொள்ள உனக்கு வெட்கமில்லையா பாண்டே?

நீயெல்லாம் ஒரு ஊடகக்காரன்!

சன் டிவி - இதை மட்டும்

 

சன் டிவி ராமாயணம் தொடரை ஒளிபரப்பப் போகிறதாம். அது தொடர்பான விளம்பரம் கீழே . . .

சன் டிவி ராமாயணம் ஒளிபரப்புவதில் எந்த ஆச்சர்யமும் இல்லை. காசுக்காக "மோடி கியாரண்டி" விளம்பரங்களை வெளியிட்டவர்கள்தான். டி.ஆர்.பி க்காக எந்த குப்பையையும் ஒளிபரப்புவார்கள்.

ஆனால்

மனைவியை தீக்குளிக்க வைத்து பின்பு காட்டுக்கு அனுப்பிய கதையை "இனிய காதல் காவியம்" என்று சொல்வதைத்தான் ஏற்றுக் கொள்ளவே முடியாது. 

சங்கி(புதிய) தலைமுறையா?

 

சங்கிகள் சூழ் ஆட்டுக்காரன் அரசியல் குழுவில் பார்த்த பதிவு கீழே உள்ளது. புதிய தலைமுறை செய்தியை முன்வைத்து ஆர்.எஸ்.எஸ்.ரெவிக்கு துதி பாடிக் கொண்டிருந்தார்கள்.

 டெல்லி துணை நிலை ஆளுனருக்கான அதிகாரம் குறித்து தெளிவான தீர்ப்பளித்த உச்ச நீதிமன்றம் ஏன் பஞ்சாப் விஷயத்தில் பல்டி அடித்தது என்று தேடிப்பார்த்தால் கிடைக்கும் உண்மை வேறு.

 

பஞ்சாப் ஆளுனருக்கு உச்ச நீதிமன்றம் குட்டுதான் வைத்துள்ளது.

 “நீங்கள் மக்களால் தேர்ந்தெடுக்கப்பட்டவர்கள் கிடையாது.  மாநில அரசுகள் நீதிமன்றத்திற்கு வரும் வரை ஆளுனர்கள் ஏன் மசோதாக்களை கிடப்பில் போட்டு வைத்திருக்கிறீர்கள்?”

 என்று சூடாக கேட்டுள்ளார்கள்.

 இந்த செய்தியை திரித்து எழுதியதன் மூலம் புதிய தலைமுறை தன்னுடைய பெயரை சங்கித் தலைமுறை என்று மாற்றிக் கொண்டுள்ளது.

 

தினமலரே நம்பாது.

 

ஃப்ரண்ட்லைன் முன்னாள் ஆசிரியர் தோழர் விஜயசங்கர் அவர்களின் பதிவை பகிர்ந்து கொள்கிறேன். அதிலே ஒருவர் தினமலர் பத்திரிக்கையின் அருமை பெருமையை எல்லாம் ஒருவர் எழுதியுள்ளார். நல்ல காமெடி.

 “இதை இட்லின்னா சட்னியே நம்பாது”  என்ற "சூது கவ்வும்" வசனம் போல தின மலர் பத்திரிக்கையே தன்னைப் பற்றி சொல்லப்பட்டதை நம்பாது.

இந்தக் கூத்தையும் படித்து சிரிக்கவும் (போர் வால் தெரியுமா போர் வால்)

  · 

Vijayakumar K Swamy

‘தினமலர்’ மிக ஆபத்தானது; யாருக்கு?

‘அரசு பள்ளி மாணவ, மாணவியரின் பொதுஅறிவு, வாசிப்புத்திறனை மேம்படுத்த ‘தினமலர்’ நாளிதழை கோவை மாவட்ட அரசு பள்ளிகளுக்கு இலவசமாக வினியோகிக்கலாம்’ என, நிபந்தனைகளுடன் கூடிய அனுமதியை வழங்கியது மாவட்ட முதன்மைக்கல்வி அலுவலர் அலுவலகம்.

அவ்வளவுதான், இதற்கு முடிவுரை எழுதுவதாக முகநுாலில் மூக்கை நுழைத்த ஆங்கில பத்திரிகை ஒன்றின் முன்னாள் ஆசிரியர் விஜயசங்கர் என்பவர், ‘இதைநான் அரசின் கவனத்துக்கு கொண்டு சென்றேன்; நடவடிக்கை எடுப்பதாக ‘நல்ல செய்தி’ வந்திருக்கிறது’ என, ஏதோ புரட்சியாளர் போல புளங்காகிதமடைந்து, தனக்குத்தானே சொரிந்து கொண்டு சுகம் கண்டுள்ளார். இவரைப்போலவே இன்னும் பலரும்... ‘திராவிட போர்வால்’கள் சில வலைதளத்தில் வாலையாட்டி, தினமலருக்கு எதிராக வக்கிரமழை பொழிந்துள்ளனர்.

மக்களை எப்போதும் இருட்டிலேயே வைத்திருக்க விரும்பும் உருட்டுப்புலிகளின் குருட்டுக் விழிகளுக்கு, திமுகவின் கட்சிப் பத்திரிகையான முரசொலி, மாணவர்களின் அறிவுக்கண்களைத் திறக்கும் அறிவுக்கேணியாக தெரிவதில் எந்தவொரு ஆச்சரியமும் இல்லை; அவற்றை பள்ளிகளில், நுாலகங்களில் தாராளமாக வினியோகிக்கலாம்; ஆனால், தினமலர் மட்டும் கூடாது. காரணம் அது, ஆபத்தானது!

ஆம்...

* அது மாணவர் மத்தியில் தேசப்பற்றை வளர்த்துவிடும்.

* லஞ்ச, ஊழலுக்கு எதிரான மனநிலையை விதைத்துவிடும்.

அதனால்தான், தினமலர் திட்டமிட்டு தவிர்க்கப்படுகிறது; தடுக்கப்படுகிறது!

அரசு விளம்பரங்கள் அடியோடு நிறுத்தப்படுகின்றன!

குறிப்பிட்ட ஒரு ஊடகத்தின் மீது நடத்தப்படும் மிக நுட்பமான துல்லிய தாக்குதல் இவை.

இந்த தாக்குதலின் வாயிலாக இவர்கள் சொல்ல வருவது...

* ஆட்சியாளர்களின் தவறுகளை சுட்டிக்காட்டாதே

* அரசின் முறைகேடுகளை அம்பலப்படுத்தாதே

* தவறான கொள்கை முடிவுகளை விமர்சிக்காதே

* முடிந்தால் ஊமையாகிவிடு; அதுவே, சாலச்சிறந்தது!

என்பதுதான்.

இதற்கெல்லாம் கட்டுப்பட்டால், மறைமுக நெருக்கடிகள் போகும்; விளம்பரங்கள் வரும்!

இந்த மறைமுக மிரட்டல்களுக்கெல்லாம் மண்டியிடாததைக் கண்டுதான், உலகம் முழுவதுமுள்ள லட்சோப லட்சம் வாசகர்கள், மாபெரும் ஆதரவை வழங்கி தினமலருக்கு தோள் கொடுத்து நிற்கிறார்கள்; என்றும் நிற்பார்கள்!

சுப்ரமணிய ஸ்வாமி, கிஷோர் கே ஸ்வாமி வரிசையில் இன்னொரு உருப்படாத ஸ்வாமி

 

யாரெல்லாம் வெட்கப்பட வேண்டும்?

 

ஊடக சுதந்திரத்தில் இந்தியா 161 ம் இடத்தில் உள்ளது. கடந்த வருடம் 150 வது இடத்தில் இருந்து இப்போது பின்னேறி 161 வது இடத்திற்கு வந்துள்ளது.

இதற்கு யாரெல்லாம் வெட்கப்பட வேண்டும்?

முதலில் வெட்கப்பட வேண்டியது இப்படிப்பட்ட சூழலை உருவாக்கியுள்ள ஒன்றிய அரசு. உருட்டல், மிரட்டல் மூலமாக தங்களுக்கு எதிரான செய்திகள் வெளி வராமல் பார்த்துக் கொள்வது ஒன்றிய அரசு.

அடுத்து ஊடக முதலாளிகள் வெட்கப்பட வேண்டும்.

அரசு என்ன சொல்கிறதோ அதை அப்படியே செயல்படுத்துகிற, ஒரு சின்ன விமர்சனம் கூட இல்லாமல் பார்த்து பக்குவமாக நடந்து கொள்கிறார்கள். அர்ணாப் போன்றவர்களோ அரசுக்கு ஆதரவாக காட்டுக் கூச்சல் போட்டுக் கொண்டிருக்கிறார்கள். தவறான செய்திகளை தெரிந்தே பரப்பிக் கொண்டிருக்கிறார்கள்.

மூன்றாவதாக ஊடகவியளாளர்கள்.

முதலாளிகளின் கட்டளைகளுக்கு அடி பணிந்து மன சாட்சியை அடகு வைத்து ஆட்டுக்காரன் போன்றவர்களிடம் பம்மி தோழர் திருமாவளவன் போன்றவர்களிடம் எகிறும் வீராதி வீர, சூராதி சூரர்கள். செய்திகளை கவர்களின் கனத்தின் அடிப்படையில் கவர் செய்பவர்கள்,

விதிவிலக்குகள் உண்டு.

ஆனால் இந்திய ஊடகம் இன்று பெருமளவில் ஊழல் மயமாகி விட்டது. பிறகு கடைசி இடத்திற்கு போகாமல் முதலிடத்திற்கா வரும்!

வெளிப்படைத்தன்மையா? வெறுப்பேத்தாதீங்கடா . . .

 

காலையில் நாளிதழை கையில் எடுத்ததும் பார்த்த முதல் செய்தி கடுப்பேற்றியது. 

ஊழலையும் லஞ்சத்தையும் சட்டபூர்வமாக்கி அதை பரம ரகசியமாகவும் வைக்கிற தேர்தல் பத்திரங்களை வெளிப்படைத்தன்மையானது என்று சொன்னால் கடுப்பு வராமல் மகிழ்ச்சியா வரும்!

தேர்தல் பத்திரத்தை கொண்டு வந்தவன்தான் கூச்சமில்லாமல் "வெளிப்படைத்தன்மை, ஐகோர்ட், மட்டை" என்று பேசலாம். நான்கு வருட அனுபவத்திற்குப் பிறகும் ஊடகங்களும் அதையே சொன்னால் எப்படி!

ஓ! இப்போது எல்லா ஊடகங்களும்தான் மோடியின் முதலாளிகள் வசம் போய் விட்டதல்லவா!