தோற்றுப் போயும் புத்தி வராத முலாயம் அகிலேஷ் வகையறா

முசாபர் நகர் கலவரத்தை அடக்க முடியாமல் பரவ விட்டதும் அதன் மூலம் ஜாதிய உணர்வுகளை பாரதீய ஜனதா கெட்டிப்படுத்த வழி செய்ததும் மக்களவைத் தேர்தலில் சமாஜ்வாடி கட்சி தோற்றுப் போனதற்கு முக்கியக் காரணம். ரோம் நகரம் பற்றியெறிந்த போது பிடில் வாசித்த மன்னனின் மறு வார்ப்பாக மாநிலம் முழுதும் கலவரத் தீ பரவிக் கொண்டிருந்த போது கலாச்சார விழாக்களில் பங்கேற்று ஆடிப் பாடிக் கொண்டிருந்த பெருமை அகிலேஷ் யாதவிற்கு உண்டு. நிர்வாகத் திறன் அற்ற முதல்வர் என்ற பெருமையையும் குறுகிய காலத்தில்  அடைந்தவர் அவர்தான். அதுதான் அவர்களை மண்ணைக் கவ்வச் செய்தது.

இப்போது

இரண்டு தலித் சகோதரிகள்,

ஒரு பெண்மணி ( வாயில் ஆசிட் ஊற்றப்பட்டவர்)

ஒரு நீதிபதி

என மூன்று அதிர்ச்சிகர சம்பவங்கள் அடுத்தடுத்து நடந்துள்ளது. பாலியல் வன்புணர்வோடு கொலையும் இணைந்து கொண்டுள்ளது.

உத்திரப்பிரதேச மாநிலத்தின் சட்டம் ஒழுங்கு சீரழிந்து போய் நாறிக் கொண்டிருக்கிறது என்பதற்கு இன்னும் வேறு சான்றுகள் அவசியமில்லை. ஆனாலும் கூட எந்த நடவடிக்கையும் இல்லாமல் மழையில் நனையும் எருமை போலவே உணர்வற்றே அகிலேஷ் அரசு செயல்படுகிறது.

பசங்க தப்பு செய்வது சகஜம்தானே என வக்காலத்து வாங்கி வந்த பிரதமர் கனவாளர் முலாயம் “நீங்கள் இப்போது பத்திரமாகத்தானே இருக்கிறீர்கள்?” என்று பெண் பத்திரிக்கையாளர்களிடம் சீறி விழுந்துள்ளார்.

தேர்தலின் மரண அடி வாங்கிய பின்பும் கூட கடமைகளை நினைத்துப் பார்க்க தயாராக இல்லை. மகளிர் மசோதா தேவையில்லை என்று சொல்கிற பிற்போக்குவாதியால் எப்படி பெண்களின் பாதுகாப்பை உத்தரவாதப் படுத்த முடியும்?

இதிலே வெட்கமே இல்லாம கிரீடம், வீர வாள் னு போஸ் வேற