குவார்ட்டரும் பிரியாணியும் இல்லாமலேயே

கீழே உள்ள புகைப்படங்கள் எல்லாம் நேற்று சென்னையில் நிறைவுற்ற இந்திய கம்யூனிஸ்ட் கட்சி (மார்க்சிஸ்ட்) ன் 21 வது மாநில மாநாட்டு பொதுக் கூட்டத்தின் போது எடுக்கப்பட்ட புகைப்படங்கள். ராயப்பேட்டை வொய்.எம்.சி.ஏ மைதானத்தில் நடைபெற்ற இக்கூட்டத்தில் எடுக்கப்பட்ட புகைப்படங்களைப் பார்த்த பின்பு பதிவிற்கு அவசியம் வரவும்.

ஆயிரக்கணக்கான கட்சி உறுப்பினர்கள் மாநிலம் முழுதிலிருந்தும் வந்து திரண்ட காட்சியை நீங்கள் இப்புகைப்படங்களில் பார்க்கலாம். இந்த புகைப்படங்களில் இருப்பது வந்த தோழர்களில் ஒரு பகுதியினர்தான். காவல்துறை பேரணிக்கு அனுமதி மறுத்த காரணத்தால் அனைவரும் ஒரே நேரத்தில் மாநாட்டுத் திடலுக்கு வந்து சேரும் வாய்ப்பு தடைபட்டு விட்டது.

பிரம்மாண்டமான அந்த மைதானம் நிரம்பி வழிந்ததால் பலர் வருவதும் அதே நேரம் அதே அளவில் புறப்படுவதுமான நிகழ்வு நடந்து கொண்டே இருந்தது. இத்தனை ஆயிரம் தோழர்கள் சங்கமித்தாலும் கொஞ்சம் கூட தள்ளுமுள்ளு இல்லாமல் அமைதியாக இருந்தனர் என்பது மார்க்சிஸ்ட் கட்சிக்கே உள்ள ஒரு பெருமை.

இதை விட மிக முக்கியமான விஷயம் என்னவென்றால் இப்பொதுக்கூட்டத்தில் பங்கேற்க மாநிலம் முழுதிலிமிருந்து வந்த கட்சித் தோழர்கள் தங்கள் சொந்தக் காசை செலவழித்து வந்தவர்கள். குவார்ட்டர் பாட்டில் (இப்போது சில கட்சிகளில் ஹாப் என உயர்ந்து விட்டதாம்) தருகிறோம், பிரியாணி தருகிறோம் என்றெல்லாம் ஆசை வார்த்தை சொல்லி அழைத்து வரப்பட்ட கூட்டமல்ல.

தலைவர்களுக்காக இல்லாமல், தனி நபர்களுக்காக இல்லாமல் கட்சியின் மீதும் அதன் கொள்கைகள் மீதும் உள்ள பிடிப்பின் காரணமாக வந்த இத்தோழர்கள் இருக்கும்வரை இடதுசாரிகளுக்கு என்றும் அழிவில்லை. வாக்குகளை விற்றவர்கள் நிச்சயம் ஒருநாள் நேர்மையானவர்களை நாடி வந்தே தீருவார்கள்.

மகத்தான்  மானுட சமுத்திரத்தின் சிறு துளியின் சிறு பகுதியாக நாங்கள்.