ரஜனிகாந்த் காப்பாற்றிய பாபனாசம்

பாபனாசம் திரைப்படத்திற்கு நான் எழுதிய விமர்சனம் பார்த்து விட்டு பதிவர் திரு நெல்லைத்தமிழன் எழுதிய பின்னூட்டம் கீழேயுள்ளது.

'நெல்லைத் தமிழன்July 8, 2015 at 8:12 PM

படம் நன்றாக இருந்தது. நான் திருஷ்யம் பார்க்கவில்லை. முதல் 15-20 நிமிடங்கள் படம் எந்தத் திசையில் செல்கிறது என்பதையே கணிக்க முடியவில்லை. ரொம்பப் பாராட்டப்பட வேண்டிய விஷயம், கதைக்கு மரியாதை கொடுத்து எடுத்திருப்பது. இதில் வேறு எந்த '.... ஸ்டார்' நடித்திருந்தாலும், அறிமுகக் காட்சி போன்று பில்டப் கொடுத்து கதையைக் கந்தர்கோளமாக்கியிருப்பார்கள். நீங்கள் சொன்னதுபோல் கௌதமி மட்டும் ஒட்டாமல் தெரிந்தது (ஓரிரு காட்சிகளைத்தவிர). //

எவ்வள்வு சரியாக இருக்கிறது இந்த கருத்து!

கமலுக்கு முன்பாக ரஜனிகாந்த் இந்த படத்தில் நடிக்க விருப்பப்பட்டு பிறகு பின் வாங்கியதாக செய்திகள் வந்திருந்ததை நினைத்துப் பார்த்தேன். அப்படியே நடுங்கிப் போய் விட்டேன்.

படம் தொடங்கும் போது புதிதாக மாற்றலில் சேரும் கான்ஸ்டபிள், கமலைப் பார்த்து திட்டுவதாகத்தான் தொடங்கும். 

அப்படி ஒரு கான்ஸ்டபிள் ரஜனியைப் பார்த்து திட்டுவதாகவா ரஜனிகாந்த் படம் தொடங்கும்?

ஏராளமான பில்ட் அப்களோடு ரஜனியை புகழோ புகழ்ந்து வைரமுத்து எழுதிய பாடலோடு ஆரம்பிக்காமல் ஒரு ரஜனி படமிருக்க முடியுமா?

அடுத்து கௌதமி மாதிரி நடுத்தர வயதானவரை ரஜனிக்கு இணையாக்க முடியுமா? ஏதாவது ஒரு சிறிய பெண்ணைத்தான் கதாநாயகியாக்க வேண்டும். அவர் பெண்ணுக்கு தங்கை மாதிரி இருந்தாலும் ஆச்சரியப் படுவதற்கு ஒன்றுமில்லை.

அதற்குப் பிறகு நெல்லைத் தமிழ். நினைத்துப் பார்க்கவே பயமாக இருக்கிறது.

படம் முழுவதும் ரஜனிகாந்த் வேட்டி மட்டும் கட்டிக் கொண்டு வர முடியுமா? செட்டிங்க்ஸ் இல்லாமல் வெளி நாட்டில் டூயட் இல்லாமல் என்னங்க ரஜனி படம்? 

பஞ்ச் டயலாக் இல்லாமல் எப்படி? இரண்டு சண்டைக்  காட்சியாவது இருக்க வேண்டாமா? ஸ்டைல் காண்பிக்க என்ன ஸ்கோப்?

ரஜனிகாந்தை பெண் போலீஸ் அதிகாரி மிரட்டினால் ரசிகர்கள் ஏற்றுக் கொள்வார்களா? மாத்துங்க கதையை.

கலாபவன் மணியை நினைத்தால் கதி கலங்குகிறது. ரஜனியை (படத்தில்தான்)  அப்படி அடித்து துவைத்து விட்டு அவரால் நிஜத்தில் நடமாட முடியுமா? அருணாச்சலம் படத்திற்குப் பிறகு வடிவுக்கரசி பட்ட அவஸ்தையை தமிழுலகம் கண்டிருக்கிறதே!

மோகன்லால் மாதிரி கமலஹாசன் நடிக்கவில்லை. கமலஹாசன்தான் தெரிந்தார், சுயம்புலிங்கம் தெரியவில்லை என்றெல்லாம் எழுதும் வாய்ப்பை எத்தனை விமர்சகர்கள் இழந்திருப்பார்கள்?

ரஜனிக்கு நன்றி சொல்லுங்கள். பாபனாசம் என்ற அருமையான திரைப்படம் வெளிவர அவர்தான் காரணம். 

பின் குறிப்பு :ரஜனிக்கு சொன்ன எல்லா விஷயமும் விஜய், அஜித் ஆகியோருக்குக் கூட பொருந்தும் என்பது இன்னொரு விஷயம்.