செத்தது அமெரிக்க தளபதியென்றால்????

இரானின் தளபதி காசீம் சுலைமானி அமெரிக்காவின் ஆளில்லா விமானத் தாக்குதலில் கொல்லப்பட்டுவிட்டார்.

என்னுடைய ஆணைப்படியே அவர் கொல்லப்பட்டார் என்று டொனால்ட் ட்ரம்ப் பீற்றிக் கொள்கிறார். பதவி நீக்கம் பிரச்சினையில் சிக்கியுள்ள அவருக்கும் ஒரு திசை திருப்பும் நடவடிக்கை தேவைப்படுகிறது. 

நடந்த கொலையை விட எரிச்சலூட்டுவது இந்திய அரசின் அறிக்கைதான்.

இந்த சம்பவத்திற்குப் பிறகு யாரும் எதுவும் எதிர்வினையாற்றக் கூடாது, அமைதியாகவும் பொறுமையாகவும் கடமை, கண்ணியம், கட்டுப்பாடோடும் இருக்க வேண்டும் என்று சொல்கிறது இந்திய அறிக்கை. 

இதுவே தாக்குதலில் செத்துப் போனது அமெரிக்க தளபதி என்றாலும் இந்திய அறிக்கை இப்படித்தான் உபதேச பாணியில் இருக்குமா?

ட்ர்ம்பை விட வெறிக் கூச்சல் கொண்டதாக அமைந்திருக்கும்.

இந்த அரசிடம் நேர்மை எல்லாம் எதிர்பார்ப்பது வீண்.

டாஸ்மாக் அதிகாரிகளுக்கு எச்சரிக்கை

டாஸ்மாக் அதிகாரிகள் ஏன் எச்சரிக்கையாக இருக்க வேண்டும் என்பதை இந்த காணொளியை பார்த்தால் புரியும்.

இப்படி நிறைய பேர் கிளம்பினால் அவர்களால் எப்படி எடுபிடி நிர்ணயிக்கும் இலக்கை அடைய முடியும்?

பிகு

சீரியஸ் பதிவுகளிலில் இருந்து மாறுதலாக வாட்ஸப்பில் வந்த காணொலியை பகிரலாம் என்று நினைத்தேன். ஆனால் அதிலும் அரசியல் வந்து விட்டது. நான் என் செய்வேன்!!!!

இதுதான் சிறப்பான வெற்றி

உள்ளாட்சி தேர்தல் முடிவுகளில் மகிழ்ச்சி அளித்த செய்தி இது.

இதற்கு முன்பாக மத்திய பிரதேச மாநிலத்தில் போபாலிலோ அல்லது இந்தோரிலோ திருநங்கைகள் மேயராக வெற்றி பெற்றுள்ளனர்.

தமிழகத்தில் இதுதான் முதல் முறை என்று கருதுகிறேன்.

வெற்றி பெற்ற ரியா,

அவர் போட்டியிட வாய்ப்பளித்த திமுக,

வெற்றி பெற வாக்களித்த வாக்காளர்கள்

அனைவருக்கும் வாழ்த்துக்களும் பாராட்டுக்களும்

அலங்கோலம், வெடிகுண்டு – கப்சிப் எடுபிடி

ஸ்டாலின் பேச்சைக் கேட்டு கோலம் போட்டால் குடும்பத்தையே குளோஸ் செய்து அலங்கோலமாக மாற்றி விடுவேன் என்று மிரட்டுகிறார் முன்னாள் மத்திய அமைச்சர் பொராகி.

மாணவர்கள் கல்லெறிந்தால் வெடிகுண்டு வீசுவோம் என்று திமிராக பேசுகிறார் எச்.ராசா.

இதெல்லாம் பழைய சம்பவங்கள் அல்ல. “ஜோலியை முடிச்சிருக்க வேண்டாமா” என்று பேசிய நெல்லை கண்ணனை கைது செய்து தர்மத்தையும்  நேர்மையையும் தமிழக காவல்துறையும் எடுபிடி அரசு நிலை நாட்டிய அதே சமயத்தில்தான்.

நெல்லை கண்ணனை கைது செய்த  தமிழக ஏவல்துறை இப்படி வெளிப்படையாக மிரட்டுகிற. வன்முறையை தூண்டுகிற பொராகியையும் எச்.ராசாவையும் ஏன் கைது செய்யவில்லை?

அவர்களை கைது செய்யாமல் எடுபிடி அரசு ஏன் கப்சிபென்று கள்ள மௌனம் சாதிக்கிறது?

அவர்கள் மீது எந்த நடவடிக்கையும் தேவையில்லை என்றால் நெல்லை கண்ணனை விடுதலை செய்வதுதான் சரியாக இருக்கும்.

எடுபிடி அரசு என்ன செய்யப் போகிறது?

ராணுவத்தை மதிக்க வேண்டாமா?

ராணுவத்தைப் பார்த்தால் மக்கள் பயப்பட வேண்டும் என்று  முப்படைத் தளபதி என்ற புதிய பொறுப்பை ஏற்றுக் கொண்டுள்ள மோடியின் சீடர் பிபின் ராவத் கருத்து தெரிவித்துள்ளார்.

அவருக்கு ஒரே ஒரு வார்த்தை.

இப்படியெல்லாம் முறைச்சு பார்த்தா மோடி கூட உங்களைப் பார்த்து பயப்படுவார். ஆனால் ராணுவம் என்பது மக்களால் மதிக்கப்படக் கூடிய விதத்தில்  செயல்பட வேண்டுமே தவிர அச்சப்படக்கூடிய விதத்தில் அல்ல.

ராணுவம் தன் மதிப்பை வி.கே.சிங் காலத்தில் இழக்க ஆரம்பித்தது. உங்கள் காலத்தில் நிலைமை இன்னும் மோசமாகி விட்டது. 

போன வருஷ வாசிப்புக் கணக்கு

கடந்த வருடத்தில் வாசித்த நூல்களின் பட்டியல் கீழே உள்ளது. 
இந்த பழக்கத்தை உருவாக்கிய தோழர் ச.சுப்பாராவ் அவர்களுக்கு நன்றி.

எண்	பெயர்	ஆசிரியர்	நூலின் தன்மை	பக்கம்
1	எம்.எஸ்.சுப்புலட்சுமி உண்மையான வாழ்க்கை வரலாறு	டி.ஜே.எஸ்,ஜார்ஜ், தமிழில் ச.சுப்பாராவ்	வாழ்க்கை வரலாறு	256
2	நானும் வீரப்பனும்	நக்கீரன் கோபால்	அனுபவம்	96
3	நீதி தேவன் மயக்கம்	அறிஞர் அண்ணா	நாடகம் - மறு வாசிப்பு	81
4	மனைவி கிடைத்தாள்	சுஜாதா	நாவல் - புனைவு	80
5	ஜோதி	சுஜாதா	நாவல் - புனைவு	56
6	ரோஜா	சுஜாதா	நாவல் - புனைவு	72
7	கேரக்டர்	சாவி	நகைச்சுவை கட்டுரைகள்	118
8	குருதி ஆட்டம்	வேல ராமமூர்த்தி	நாவல் - புனைவு	88
9	சிறைப்பறவை	சி.ஏ.பாலன்	சிறைப் போராட்டம்	66
10	சேதுக்கால்வாய் திட்டமும் ராமேசுவரத் தீவு மக்களும்	குமரன் தாஸ்	கட்டுரைகள்	96
11	அரிய நாச்சி	வேல ராமமூர்த்தி	நாவல் - புனைவு	120
12	காவல் கோட்டம்	சு.வெங்கடேசன்	நாவல் - புனைவு	1050
13	பாளையங்கோட்டை நினைவலைகள்	ப. எசக்கிராஜன்	அனுபவம்	172
14	ஜிப்ஸி	ராஜூ முருகன்	கட்டுரைகள்	136
15	பாடலென்றும் புதியது	கலாப்ரியா	கட்டுரைகள்	119
16	மணல் பூத்த காடு	முஹம்மது யூசுஃப்	நாவல் - புனைவு	448
17	கதைகளின் கதை	சு.வெங்கடேசன்	கட்டுரைகள்	128
18	கூட்ஸ் வண்டியின் கடைசிப் பெட்டி	அஜயன் பாலா	சிறுகதைகள்	160
19	சிதார் மரங்களில் இலைகள் பூப்பதில்லை	அ.கரீம்	சிறுகதைகள்	104
20	பேட்டை	தமிழ்ப்பிரபா	நாவல் - புனைவு	350
29	கெத்து	சாத்தூர் இலட்சுமணப் பெருமாள்	சிறுகதைகள்	96
30	நீல நதி	லஷ்மி சரவணகுமார்	சிறுகதைகள்	118
31	காளி	ச.விஜயலட்சுமி	சிறுகதைகள்	144
32	எசப்பாட்டு	ச.தமிழ்ச்செல்வன்	கட்டுரைகள்	216
33	மதுரம்	வண்ணதாசன்	சிறுகதைகள்	136
34	எதிர்ச்சொல்	பாரதி தம்பி	கட்டுரைகள்	120
35	கரும்பலகை	எஸ். அர்ஷியா	நாவல் - புனைவு	170
36	நீங்கள் சுங்கச்சாவடியில் நின்று கொண்டிருக்கிறீர்கள்	ஆதவன் தீட்சண்யா	சிறுகதைகள்	112
37	நகரத்துக்கு வெளியே	விஜய மகேந்திரன்	சிறுகதைகள்	132
38	தேர்தலின் அரசியல்	அ.வெண்ணிலா	கட்டுரைகள்	104
39	பழைய பேப்பர்	ஞானி	கட்டுரைகள்	144
40	போருழல் காதை	குணா கவியழகன்	நாவல் - புனைவு	350
41	சம்ஸ்காரா	யு.ஆர். அனந்தமூர்த்தி தமிழில் டி.எஸ்.சதாசிவம்	நாவல் - புனைவு	156
42	காட்டில் உரிமை	மகாசுவேதா தேவி தமிழில் சு.கிருஷ்ணமூர்த்தி	வாழ்க்கை வரலாறு	368
43	கறுப்பர் நகரம்	கரன் கார்க்கி	நாவல் - புனைவு	350
44	1729	ஆயிஷா நடராஜன்	நாவல் - புனைவு	80
45	குஜராத் - திரைக்குப் பின்னால்	ஆர்.பி.ஸ்ரீகுமார் தமிழில் ச.வீரமணி, தஞ்சை ரமேஷ்	குஜராத் கலவரம்	240
46	குறுக்கு வெட்டு	சிவகாமி	நாவல் - புனைவு	170
47	பால்கட்டு	சோலை சுந்தரப் பெருமாள்	நாவல் - புனைவு	336
48	மலை மாளிகை	சுஜாதா	நாவல் - புனைவு	48
49	விழுந்த நட்சத்திரம்	சுஜாதா	நாவல் - புனைவு	62
50	இராமானுஜர் - எளியோரின் ஆச்சார்யர்	கன்யூட்ராஜ்	வாழ்க்கை வரலாறு	211
51	பார்பி	சரவணன் சந்திரன்	நாவல் - புனைவு	160
52	வெக்கை	பூமணி	நாவல் - புனைவு	172
53	வானம் வசப்படும்	பிரபஞ்சன்	நாவல் - புனைவு	496
54	திருவரங்கன் உலா 1	ஸ்ரீவேணுகோபாலன்	நாவல் - புனைவு	675
55	திருவரங்கன் உலா 2	ஸ்ரீவேணுகோபாலன்	நாவல் - புனைவு	631
56	ஒரு புளியமரத்தின் கதை	சுந்தர ராமசாமி	நாவல் - புனைவு	220
57	தேசத்துரோகி	ஷோபா சக்தி	சிறுகதைகள்	224
58	பாரதியும் ஷெல்லியும்	தொ.மு.சி.ரகுநாதன்	கட்டுரைகள்	24
59	இந்துத்துவமும் சியோனிசமும்	அ.மார்க்ஸ்	கட்டுரைகள்	56
60	பாலஸ்தீன்	எட்வர்ட் செய்த் தமிழில் எஸ். அர்ஷியா	வரலாறு	64
61	சாக்ரடீஸுக்கு விஷம் கொடுத்தது ஏன்	எம். எம். சசீந்திரன் தமிழில் யூமா வாசுகி	கட்டுரைகள்	64
62	தேரிக்காடு	அமல்ராஜ்	நாவல் - புனைவு	270
63	ரோஹிங்கிய இன அழிப்பு	வீரைய்யன்	கட்டுரைகள்	72
64	கர்ணனின் கவசம்	கே.என்.சிவராமன்	புனைவு	247
65	நினைவோடைகள்	தீஸ்தா செதல்வாட்	குஜராத் கலவரம்	231
66	பாடலென்றும் புதியது	கலாப்ரியா	கட்டுரைகள்	119
67	பாபா ஆம்தே	கோபி ஆனயடி தமிழில் யூமா வாசுகி	வாழ்க்கை வரலாறு	136
68	வேள்பாரி - 2 பாகங்கள்	சு.வெங்கடேசன்	நாவல் - புனைவு	1408
69	ஜிப்ஸியின் துயர நடனம்	யமுனா ராஜேந்திரன்	கட்டுரைகள்	190
70	ராஜீவ் காந்தி சாலை	வினாயக முருகன்	நாவல் புனைவு	328
71	சிவந்த கைகள்	சுஜாதா	நாவல் புனைவு	136
				13582

கடந்த வருடம் சென்னை புத்தக விழாவில் வாங்கிய நூல்கள் அனைத்தையும் படித்து முடித்தது என்பது மன நிறைவளிக்கிறது. அதே வருடம் இதற்கு முந்தைய வருடங்களை ஒப்பிடுகிற போது வாசித்த நூல்களின் எண்ணிக்கையும் பக்கங்களின் எண்ணிக்கையும் குறைவுதான். 

இந்த நூல்களில் பரவச அனுபவம் கொடுத்த வேள்பாரி பற்றி தனியாக எழுதிட வேண்டும். 

அதே போல குஜராத் காவல்துறை அதிகாரி ஸ்ரீகுமார் மற்றும் மனித உரிமை செயற்பாட்டாளர் தீஸ்தா செதல்வாட் அவர்கள் இருவரின் நூல்களையும் ஒன்றன் பின் ஒன்றாக படிக்க வேண்டும். பில்லா ரங்கா கிரிமினல் கூட்டாளிகளின் உண்மை முகம் நன்றாக புரியும்.

தோழர் கரீம் அவர்களின் "சித்தார் மரங்களில் இலைகள் பூப்பதில்லை" நூலும் மிக முக்கியமான நூல்.

தோழர் வேல.ராமமூர்த்தியின் குருதி ஆட்டமும் அரிய நாச்சியும் ஏதோ அவசரகதியில் எழுதப்பட்ட நூல்கள் போல இருந்து ஏமாற்றியவை. 

"மணல் பூத்த காடு" மூலம் சவுதி அரேபிய பயணமே சென்று வரலாம்.

இந்த வருட சென்னை புத்தக விழாவிற்காக ஆவலோடு காத்திருக்கிறேன். 

புத்தாண்டே வருக

புத்தாண்டே வருக  . . .

புத்துணர்ச்சி தருக . . .

போராட்டக் களம்

புகும் நேரமிது,

புது வலிமை தருக.

புதிதாய் எல்லாம் மாறிட

புதிய பாதையில் செல்க.

மாற்றம் வரும் என்ற

நம்பிக்கையை சுமந்து

புத்தாண்டே வருக . . .