15 வருடம் – 8000 – ஓயாது அலைகள்

 

இது என்னுடைய எட்டாயிரமாவது பதிவு.

என்ன எழுதலாம் என்று யோசித்தேன்.

வலைப்பக்க அனுபவத்தையே எழுதலாம் என்று முடிவு செய்தேன்.

2009 ம் ஆண்டு மக்களவைத் தேர்தலின் போது வலைப்பக்கம் தொடங்கி ஒரு பதிவு எழுதினேன். தேர்தல் முடிவுகள் திருப்தி அளிக்காத காரணத்தால் மக்களை  திட்டி ஒரு பதிவு எழுதி ஒரு பூட்டு போட்டு பூட்டி விட்டேன்.

2010 ம் ஆண்டு ஒரு விபத்து. காலில் ஜவ்வு கிழிந்து கிட்டத்தட்ட ஒரு மாதத்திற்கு மேல் விடுப்பில் இருக்க நேரிட்டது. அப்போது பொழுதை போக்க வலைப்பக்கத்தை தூசி தட்டி எழுதத் தொடங்கினேன்.

எல்.ஐ.சி நிறுவனத்தை பொதுத்துறை நிறுவனமாக பாதுகாப்பது, அதற்கான நியாயங்கள், எங்கள் அகில இந்திய இன்சூரன்ஸ் ஊழியர் சங்கத்தின் செயல்பாடுகள், சில அனுபவங்கள் என்று எழுதத் தொடங்கியது பிறகு பல்வேறு விஷயங்கள் குறித்து எழுதும் அளவு விரிவடைந்தது.

நான் நம்புகிற பொது உடமைத் தத்துவம், நான் நேசிக்கிற மார்க்சிஸ்ட் கம்யூனிஸ்ட் கட்சி கற்றுக் கொடுத்ததன் அடிப்படையில் அன்றாடம் நடக்கும் நிகழ்வுகளை உழைக்கும் வர்க்கக் கண்ணோட்டத்தில் அணுகுவது என்ற முறையில் பதிவுகளை எழுதத் தொடங்கிய பின்பு  பதிவுகள் குவியத் தொடங்கியது.

தமிழ் மணம் திரட்டி செயல்பட்டு வந்து வரை அதிலே வரிசைப் பட்டியலில் இடம் பிடிப்பது, ஒவ்வொரு நாளும் வெளியாகும் டாப் பத்து பதிவுகளில் இடம் பெறுவது ஆகியவையெல்லாம் மிக்க உற்சாகம் அளித்தது. தமிழ் மணம் செயலிழந்ததும் பார்வைகளின் எண்ணிக்கையில் கொஞ்சம் சரிவு இருந்தது. அது ஒரு வருட காலம்தான். வாட்ஸப் குழுக்களில் பதிவை பகிர்வது அந்த இழப்பை ஈடு செய்தது.

பெரும்பாலும் அரசியல் பதிவுகள்தான். பதிவுக்கு பொருத்தமான படத்தை தயார் செய்ய பெரும்பாலும் உதவுவது வடிவேலுதான். அரசியல் பதிவுகளைத் தாண்டி நான் ரசித்த இசை, முயற்சித்த சமையல்கள் ஆகியவையும் வந்துள்ளது. கிட்டத்தட்ட எண்பது புத்தகங்களுக்கு அறிமுகம் எழுதியது நிறைவைத் தந்துள்ளது.

ஜெயமோகன், மாலன் போன்றவர்களின் போலித்தனத்தை தோலுரிப்பது என்பது மிகவும் விருப்பமான ஒன்று.

கிட்டத்தட்ட ஒரு ஐநூறு பதிவுகளாவது அடுத்தவர்கள் எழுதியதாக இருக்கும். அடுத்தவர் பதிவை தன் பதிவாக காண்பிக்கும் சிறுமையை எந்நாளும் செய்ததில்லை. ஒரிஜினலாக எழுதியவர்களுக்கு நன்றி சொல்லியே பகிர்ந்து கொண்டுள்ளேன்.

இந்த கொசுத்தொல்லை தாங்க முடியலை என்பது போல அனாமதேயங்கள் தொல்லையும் சமயத்தில் எரிச்சல் ஊட்டும். மண்டையை மறைத்தாலும் கொண்டையை மறைக்காத பாடி சோடாக்கள் போல சில அனாமதேயங்கள் யார் என்பதும் தெரியும். அதில் ஒருவரின் குடும்ப வாழ்க்கையை காப்பாற்றி இருக்கிறேன். இன்னொருவரின் வேலையை காப்பாற்றியுள்ளேன். ஆனாலும் . … நன்றி மறந்த துரோகிகளும் உலாவும் உலகல்லவா இது!

இன்றைக்கு வலைப்பக்கம் எழுதுவதற்கு ஒரே ஒரு நோக்கம்தான் உள்ளது.

இந்தியாவிற்கு நேர்ந்த மிகப்பெரிய துயரம் மோடி ஆட்சியில் தொடர்வது. மத வெறியை தூண்டி மக்களை பிளவுபடுத்தும் அந்த மோசமான சக்திகளை, அவர்களின் அராஜக செயல்களை, கேவலமான பொய்களை அம்பலப் படுத்துவதுதான். ஒவ்வொரு நாளும் எழுதுவதற்கான செய்திகளை சங்கிகள் அளித்துக் கொண்டே இருக்கிறார்கள்.

இந்தியாவில் சமூக மாற்றம் உருவாகும் வரை என் பதிவுகள் தொடர்ந்து கொண்டே இருக்கும். எழுத்து அலைகள் என்றும் ஓயாது.

இந்திரா போல் முடியுமா மோடி?

 

பழைய சம்பவம் பற்றியதுதான். சொல்லப்போனால் போன வாரம் எழுதியதுதான். 

தோழர் யெச்சூரி பற்றிய ஒரு கட்டுரையை தமிழாக்கம் செய்யும் வாய்ப்பு கிடைத்தது. ஜேஎன்யு பல்கலைக் கழக வேந்தர் பதவியிலிருந்து இந்திரா அம்மையார் விலக வலியுறுத்தியது தொடர்பாக தோழர் யெச்சூரியே எழுதியது கீழே உள்ளது.

“இந்திரா அவர்கள் தேர்தலில் தோல்வியுற்ற பின்னும் ஜேஎன்யு வேந்தர் பதவியில் தொடர்ந்தார். அவசர நிலைக் காலம் கொண்டு வந்ததாலும் அப்போது நிகழ்ந்த அநீதிகளாலும் அவர் அந்த பதவியில் தொடரக்கூடாது என நாங்கள் கூறினோம். நான்கு பக்க குற்றப்பத்திரிக்கை ஒன்றை எழுதி அனைத்து மாணவர்களும் வெலிங்டன் க்ரெஸெண்டில் இருந்த அவரது வீட்டிற்குச் சென்றோம். அவசர நிலைக்காலத்தின் போது தலை மறைவாக இருந்த மாணவர்களின் கைது வாரண்டுகளை ஜேஎன்யு விடுதியில் உள்ள அவர்களின் அறைக்கதவுகளில் ஒட்டி விட்டுச் செல்வார்கள். நாங்கள் எங்கள் மனுவை அவர் வீட்டுக் கதவில் ஒட்ட நினைத்தோம்.

 நாங்கள் அங்கே சென்ற போது வி.சி.சுக்லா எங்களிடம் என்னவென்று வினவினார். நாங்கள் இந்த மனுவை அவர்களிடம் தர வந்துள்ளோம் என்று சொன்னேன்.அவர் உள்ளே சென்று சிறிது நேரம் கழித்து வெளியே வந்தார். ஐந்து பேர் மட்டும் உள்ளே வரலாம் என்றார். நான் முடியாது என்று மறுத்தேன்.  அனைத்து மாணவர்களும்தான் வருவோம் என்று சொன்னேன். அவர் மீண்டும் உள்ளே சென்றார்,  இம்முறை இந்திரா அம்மையாரே கதவுக்கருகில் வந்தார்.  அனைவரும் ஆச்சர்யப்பட்டனர். என்ன இதெல்லாம் என்று அவர் கேட்டார். நான் ஜேஎன்யு மாணவர் சங்கத்தின் தலைவர், இந்த மனுவை உங்களிடம் அளிக்க வந்துள்ளோம் என்று அவரிடம் சொன்னேன். அங்கே போலீஸ் காவல் எதுவும் இல்லை. நீங்கள் வேந்தர் பதவியிலிருந்து விலக வேண்டும் என்று நாங்கள் விரும்புகிறோம் என்று சொன்னேன். நீங்கள்  அப்பதவியில் தொடர்வது சரியல்ல என்றேன். அவர் அந்த மனுவை வாசிக்குமாறு என்னிடம் சொன்னார்.  நாங்கள் சற்று தயங்கினோம். ஏனென்றால் அதில் ஏராளமான வசைகள் இருந்தன. நான் படித்தேன். முகத்தில் ஒரு நிரந்தரமான புன்னகையுடன் அவர் அதனை முழுமையாகக் கேட்டார்.

 ஜவஹர்லால் நேரு பல்கலைக்கழகத்தின் வேந்தர் பதவியிலிருந்து இந்திரா காந்தி உடன் விலகி விட்டார். 

இது போல யாராவது மோடியிடம் குறை சொல்ல வந்தால் அவர்களை பார்க்கவோ அல்லது அவர்கள் குற்றச்சாட்டுக்களை (வசைகள் அடங்கிய) முகத்தில் நிரந்தரப் புன்னகையோடு மோடியால் கேட்டுக் கொண்டிருக்க முடியுமா? குற்றச்சாட்டின் நியாயம் உணர்ந்து பதவியைத்தான் துறக்க முடியுமா?

பதில் சொல்லுங்க சங்கிகளா?

“லப்பர் பந்து” பார்க்கலாம்

 

 

நீண்ட நாட்களுக்குப் பிறகு திரைப்படப் பதிவு.

 

கடந்த சனிக்கிழமை அரங்கில் பார்த்த படம்.  ஒரு நிமிடம் கூட சலிப்படைய வைக்காமல் நகைச்சுவை, காதல், குடும்ப உறவுகள், மோதல்கள், ஜாதிய உணர்வுகள் உருவாக்கும் வலி என அனைத்தையும் சரியாக கலந்து கொடுத்துள்ள திரைப்படம்.

 

கிராமத்து கிரிக்கெட் போட்டிகளை களமாகக் கொண்டு உருவாக்கப்பட்டுள்ள படம் நாயகர்களான “அட்ட கத்தி” தினேஷ் மற்றும் ஹரிஷ் கல்யாண் ஆகியோருக்கிடையிலான ஈகோவும் அது எப்படி காதலுக்கு இடையூறாக மாறி தகர்க்கப்படுகிறது என்பதை  சுவாரஸ்யமான காட்சிகளோடு கொடுத்துள்ளார் புது இயக்குனர் பச்சைமுத்து  தமிழரசன்.

 

பழைய திரைப்படப்பாடல்களை பயன்படுத்திக் கொள்வது என்று சுப்ரமணியபுரத்தில் ஆரம்பித்த கலாச்சாரம் இப்படத்திலும்.

 

“பொட்டு வச்ச தங்கக்குடம், இந்த ஊருக்கு நீ மகுடம்” என்ற விஜயகாந்த் பாடல் அப்போது ஹிட் ஆனதா என்று தெரியாது. இப்போது மனதுக்குள் ஒலித்துக் கொண்டே இருக்கிறது.

 

தினேஷின் மனைவியாக வருபவரின் பாத்திரம் சிறப்பாக உருவாக்கப் பட்டுள்ளது. வேலைக்குச் செல்லாமல் கிரிக்கெட் விளையாட வந்த கணவனை ட்ராக்டரில் ஏற்றி அழைத்துச் செல்கையில் கிரிக்கெட் பிட்சை அழிப்பதில் தொடங்கி தன் கணவனைப் போலவே கிரிக்கெட்டில் மூழ்கி குடும்பப் பொறுப்புக்களை கவனிக்காதவன் மகளின் கணவனாகக் கூடாது என்பதில் காண்பிக்கும் அக்கறையும் அப்பாத்திரத்தை வலுவாக்கிறது. அம்மா  வீட்டுக்கு கோபத்துடன் பிரிந்து போன மனைவியின் நினைவாக அவரது புடவைகள் மீது படுத்துக் கொள்கிற கணவனை வீடு திரும்பிய பின் “ஒரே புடவை மேல படுக்க மாட்டியா, தினம் ஒரு புடவை மீது படுத்திக்கிட்டா யார் துவைச்சு மடிக்கிறது?” என்று கேட்பது சுவாரஸ்யமான காட்சி.

 

அவர்களின் மகளாக வருபவரும் கவனிக்க வைக்கிறார். காதலனுடன் சண்டை போடும் காட்சியில் பஸ்ஸில் ஏறச்சொல்லி சத்தம் போடும் கண்டக்டரை அதட்டுவதெல்லாம் புது விதமான காட்சி.

 

துணைப் பாத்திரங்களில் வருபவர்களும் ரசிக்க வைக்கிறார்கள். தினேஷின் மாமாவாக வரும் குடிமகன் (அவர் யாரென்று தெரியவில்லை. விக்கிரமனின் “உன்னை நினைத்து” படத்தில் ஜப்பானில் டெலிபோன் பூத் நடத்துவாரே, அவரா?),  விளையாடாத கிரிக்கெட் கேப்டன் காளி வெங்கட்,  அதிரடி கமெண்டுகளை அள்ளி வீசும் பால.சரவணன் ஆகியோர் படத்துக்கு பக்க பலம்.

 

“ஜாலி ஃப்ரண்ட்ஸ்” என்ற அணிக்கு எல்லாமுமாக இருக்கிற காளி வெங்கட், காலனியைச் சேர்ந்த ஹரிஷ் கல்யாணை அணியில் இணைக்க வேண்டும் என்று  முயன்றதற்காக அணியிலிருந்தே வெளியேற்றப்படுவதும் அவர் “அடேங்கப்பா அணி” என்று புதிய அணியை உருவாக்கி போட்டி போடுகிறார்கள்.

 

முக்கியமான போட்டியில் தினேஷும் ஹரிஷ் கல்யாணும் அவுட்டாகி விட காளி வெங்கட்டின் பெண் அடித்து விளையாடுவது எதிர்பார்த்ததுதான். ஆனால் காளி வெங்கட்டும் ஆட்டத்தில் கலக்குவது எதிர்பாராத் ஆச்சர்யம்.

 

படத்தின் கிளைமேக்ஸை ஊகிக்க முடிந்தாலும் சிறப்பான ஒன்று. காலனித் தெருப் பையன் என்ற காரணத்தால் ஹரிஷ் கல்யாணை ஒதுக்குகிற அணி, பலவீனமான நிலையில் அதே காலனித் தெருவிலிருந்து மூன்று, நான்கு பையன்களை இணைத்துக் கொள்வதும் அவர்கள் பிரகாசிப்பதால் அந்த அணியினரால் கொண்டாடப்படுவதும் தொடர வேண்டும் என்பதால் கடைசி பந்தில் அந்த அணியை வெல்ல வைப்பது நெகிழ்ச்சியானது.

 

நிச்சயம் பார்க்க வேண்டிய திரைப்படம் “லப்பர் பந்து”

 

பிகு: இதை  கண்டிப்பாக எழுதியே வேண்டும். இந்த படத்தை கொண்டாடும் சங்கிகள், தமிழரசன் பச்சைமுத்து போல மென்மையாக சொல்ல வேண்டும் என்று பா.ரஞ்சித், மாரி.செல்வராஜ் ஆகியோருக்கு உபதேசிக்க ஆரம்பித்து விட்டனர்.

 

ஒரு நேர்காணலில் இதே கருத்தை பேட்டி கண்டவர் கேட்க அதற்கு இயக்குனர் சொன்ன பதில் மிகவும் முக்கியமானது.

 

“அவர்கள் பாதிக்கப்பட்டவர்கள், நான் வேடிக்கை பார்த்தவன், நான் இப்படித்தான் எடுப்பேன், அவர்கள் ஆக்ரோஷமாகத்தான் (AGGRESSIVE) ஆகத்தான் எடுப்பார்கள். அப்படித்தான் எடுக்க முடியும்.

பஞ்சாமிர்த அரசியல்

 *நாளொரு கேள்வி (1621): 27.09.2024*

தொடர் எண்: *1621*

இன்று நம்மோடு தீக்கதிர் கட்டுரையாளர் *மதுரை சொக்கன்*

#########################

*பஞ்சாமிர்த அரசியல்*

கேள்வி: திருப்பதி லட்டு விவகாரத்தை தொடர்ந்து பழனி பஞ்சாமிர்தத்திலும் கலப்படம் என்றும், அரசு நிர்வாகத்தின் கீழ் கோயில்கள் இருக்கக் கூடாது என்றும் சங்பரிவார அமைப்புகள் கூக்குரல் இடுவது ஏன்?

*மதுரை சொக்கன்*

ஏ.ஆர்.நிறுவனம் திருப்பதி கோயிலுக்கு தாங்கள் மட்டுமே நெய் வழங்கவில்லை வேறு நிறுவனங்களும் வழங்கியிருக்கிறார்கள் என்றும், பழனி கோவிலுக்கு தாங்கள் நெய் வழங்கவில்லை என்றும் விளக்கம் அளித்திருந்தது. இந்து அறநிலையத்துறை அமைச்சர் பி.கே.சேகர்பாபு பழனி  கோவிலுக்கு தமிழக அரசுக்கு சொந்த மான ஆவின் நிறுவனத்திடமிருந்து மட்டுமே தரமான நெய் வாங்கப்படுகிறது என்று தெளிவுபடுத்தியிருந்தார். ஆனால் தவறான தகவலை பரப்பி யதற்காக எச்.ராஜா மன்னிப்புக் கேட்க வில்லை. தனது கருத்தை மாற்றிக் கொண்டதாகக் கூட தெரிவிக்க வில்லை. அத்தகைய பழக்கமும் அவருக்கு இல்லை. 

இதைவிட மோசமாக திரைப்பட இயக்குநர் என்று தன்னை கூறிக் கொள்ளும் மோகன். ஜி, பழனி பஞ்சாமிர்தத்திலும் கலப்படம் உள்ளது; பஞ்சாமிர்தத்தில் ஆண்மைக் குறைவை உருவாக்கும் மருந்தை கலந்துள்ளனர் என்றெல்லாம் அவதூறு செய்தார். பழனி கோவிலின் புனிதத்தை இழிவுபடுத்தினார். திருச்சி போலீசார் வழக்கு பதிவு செய்து மோகன். ஜியை  கைது செய்தனர். ஆனால் நீதிபதி, கைது செய்த விதம் சரியில்லை என்று கூறி ஜாமீனில் விடுவித்துள்ளார். தற்போது பழனியிலும் அவர் மீது வழக்குப் பதிவு செய்யப்பட்டுள்ளது. 

பழனி பஞ்சாமிர்தத்தை இழிவு செய்ததாக மோகன். ஜி மீது சங்கிகள் பாயவில்லை. மாறாக அவர் மீது கை  வைத்தால் நடப்பதே வேறு என வழக்க மான வாய்ச்சவடாலில் ஈடுபடுகின்றனர். பாமக தலைவர் அன்புமணி மோகன். ஜி என்ன தீவிரவாதியா என வக்காலத்து வாங்குகிறார்.

பழனி கோவில் குறித்து அவதூறு  பரப்பினால் ஏன் பாஜக மற்றும் அதன்  பரிவாரங்களுக்கு கோபம் வருவதில்லை. ஏனென்றால் கோவில்களை எங்களிடம் கொடுத்துவிடுங்கள்; அரசு கோவில்களிலிருந்து வெளியேற வேண்டும் என்று கூக்குரலிட்டு வருகின்றனர். திருப்பதி மற்றும் பழனி கோவில் சர்ச்சைகளை பயன்படுத்தி இப்போது இந்த கூச்சலை அதிகப்படுத்தியுள்ளனர். 

தனியார் கோவில் எனப்படும் சிதம்பரம் கோவில் பொது தீட்சிதர்கள் கட்டுப்பாட்டில் உள்ளது. அந்தக் கோவிலுக்குச் சொந்தமான 2 ஆயிரம் ஏக்கர் நிலம் சட்டவிரோதமாக விற்கப்பட்டுள்ளதாக நீதிமன்றத்தில் இந்து சமய அறநிலையத்துறை புகார் தெரிவித்துள்ளது. 

திருப்பதி, பழனி, சிதம்பரம் என அனைத்தையும் இணைத்துப் பார்த்தால் உண்மை ஓரளவு பிடிபடும்.

*செவ்வானம்*

காட்டிக் கொடுக்கும் சங்கியை துரத்துங்கள்

 

திருப்பதி லட்டு தொடர்பாக பரிதாபங்கள் என்றொரு யூட்யூப் சேனல் வெளியிட்ட காணொளியை சங்கிகளின் மிரட்டல்கள் காரணமாக நீக்கி விட்டார்கள். அவசியமில்லாவிட்டாலும் மன்னிப்பும் கேட்டு விட்டார்கள்.

அதற்குப் பிறகும் பாஜக கட்சியின் முக்கிய புரோக்கர்களில் ஒருவனான அமர் பிரசாத் ரெட்டி, ஆந்திர மாநில டி.ஜி.பி க்கு புகார் அனுப்பி நடவடிக்கை எடுக்கச் சொல்லியுள்ளான்.

அந்த காணொளியை நீக்கியது, மன்னிப்பு கேட்டது இரண்டுமே அவசியம் அற்றது. அதன் பின்னும் இந்த தரகன், அடுத்த மாநில போலீஸிற்கு புகார் கொடுத்துள்ளான். 

இவன் கட்சியில் பெரியாளாக அடுத்தவரை காட்டிக் கொடுப்பவனெல்லாம் தமிழ்நாட்டில் இருக்கலாமா?

இவனை இந்த மாநிலத்திலிருந்தே துரத்தியடிக்க வேண்டும். . .

சங்கிகளுக்குள் சண்டை - காமெடி

 

எல்.முருகன் – போலிப் பேரா ராம.சீனு – சண்டை போடாதீங்க.

 அதை மட்டும் ஏற்க முடியாது எல்.முருகன்  என்ற நேற்றைய பதிவின் தொடர்ச்சி இது.

 பாஜக கட்சியின் பொதுச்செயலாளர் போலிப் பேராசிரியர் ராம.சீனிவாசன் போட்ட பதிவு கீழே உள்ளது.

 

வதந்தியை பரப்பக் கூடாது என்று எர்ல்.முருகனுக்கு சொல்கிறார் ராம்.சீனு.

 ஆட்டுக்காரன் இடத்தை பிடிக்க கடுமையான குடுமிபிடி சண்டை பாஜகவிற்குள் நடப்பதற்கான அறிகுறி இதெல்லாம்.

பிகு: பேய்க்கும் பேய்க்கும் சண்டை டெம்ப்ளேட்டைத்தான் பயன்படுத்த நினைத்தேன். இவர்கள் இருவருமே அந்த அளவிற்கு வொர்த் இல்லை என்பதால் புதிய டெம்ப்ளேட்டை உருவாக்கி விட்டேன்.

 

முத்துக்காளையா மோடி?

 

நேடாவின் சார்பாக ரஷ்யாவுடன் போர் நடத்தும் உக்ரைன் ஜனாதிபதி ஸேலென்ஸ்கியுடனும் ஒரு அணைப்பு,

அந்த போரை சந்திக்கும் ரஷ்ய ஜனாதிபதி விளாடிமர் புதினையும் ஒரு அணைப்பு

போரின் பின்னணியாக இருக்கும் அமெரிக்க ஜனாதிபதி ஜோ பிடேனுடனும் ஒரு அணைப்பு.

 

வாங்கிய காசுக்கு விசுவாசமாக ஏணி சின்னத்தில் ஒரு குத்து, தென்னை சின்னத்தில் ஒரு குத்து என்று குத்திய முத்துக்காளையின் லேட்டஸ்ட் வெர்ஷனாக காட்சியளிக்கிறார் மோடி.

இதை மட்டும் ஏற்க முடியாது எல்.முருகன்…

 

ஆட்டுக்காரன் லண்டன் போயிருப்பதால் ஆட்டுக்காரனின் வேலையான வதந்தி பரப்பி அரசியல்  ஆதாயம்  தேடும் சங்கிகளின் கீழ்த்தரமான உத்தியை எல்.முருகன் எடுத்துக் கொண்டுள்ளார்.

எல்.முருகனின் ட்விட்டர் பதிவு கீழே.

 

அப்படி ஒரு சம்பவம் நடக்கவே இல்லை என்று நெல்லை மாவட்ட  காவல்துறை வெளியிட்ட அறிக்கை கீழே.

 

நடக்காத ஒன்றை நடந்ததாகச் சொல்லி கலவரத்தைத் தூண்டும் உங்கள் முய்ற்சிகள் மட்டும் எனக்குக் கோபத்தை அளிக்கவில்லை.

 

பார்க்க எருமை மாடு ( படத்தில் வட்டத்துக்குள் உள்ள நபர் )  மாதிரி வளர்ந்துள்ள 24 வயது ஆசாமியை சிறுவன் என்று சொன்னது கோபத்தை அதிகமாகவே உருவாக்கியது  மிஸ்டர் எல்.முருகன்.

 

 

ஆரென்.ரெவி மதம் மாறிவிட்டாரா?

 

உடல் தானம் செய்யப்பட்டதாலும் பல இடங்களில் அஞ்சலி செய்யப்பட்ட காரணத்தாலும் சவப்பெட்டியில் சடலம் வைக்கப்பட்டிருந்த காரணத்தால் தோழர் சீத்தாரம் யெச்சூரியை கிறிஸ்துவராக்கினார்கள் சங்கிகள்.

அதே சங்கிகள், வேளாங்கண்ணி ஆரோக்கிய மாதா காலத்தில் மனைவியுடன் வழிபட்ட ஆரெஸெஸ் ரெவி எனும் ஆட்டுத்தாடிக்கும் கிறிஸ்துவ முத்திரை அளிப்பார்களா? கிரிப்டோ, பாவாடை என்றெல்லாம் தூற்றுவார்களா?

மண்டபத்தில் யார் எழுதியது மோடி?

 

மோடி அமெரிக்காவில் பேசியது கீழே உள்ளது. 

அதை மோடிக்கு எழுதிக் கொடுத்த பூத எழுத்தாளர் ( GHOST WRITER)  யார் என்பதுதான் தெரியவில்லை.

இலங்கையின் திருப்பம் இனிதாகட்டும்

 

இலங்கையின் அரசியலில் ஒரு மிகப் பெரும் திருப்பம் ஏற்பட்டுள்ளது. இடதுசாரிக் கொள்கைகளைக் கொண்ட ஒருவர் ஜனாதிபதியாகி உள்ளார்.  ஜே.வி.பி மற்றும் 27 இடதுசாரிக் கட்சிகள், ஜனநாயக அமைப்புக்கள்,  NPP என்ற பெயரில்  இணைந்து தேர்தலை சந்தித்து வெற்றி கண்டன. அனுராகுமார் திஸநாயகா புதிய ஜனாதிபதியாகி உள்ளார். கொல்லப்பட்ட  முன்னாள்  ஜனாதிபதி சஜித் பிரேமதாசாவும் தற்போதைய ஜனாதிபதி ரனில் விக்ரமசிங்கேயும் தோற்றுப் போயுள்ளனர். ராஜபக்சே குடும்ப வாரிசு எங்கோ ஒரு மூலையில் . . .

ஜே.வி.பி யின் கடந்த காலம் களங்கமானது. இடதுசாரிக் கட்சியாக துவங்கி அதே தடத்தில் கால் பதித்து பின் தடம் மாறி இனவெறி அமைப்பாக தமிழர்களை வேட்டையாடிய ரத்த வரலாறு அவர்களுடையது. ஆனால் ஆயுதங்களை கைவிட்டு ஜுஅனநாயகப் பாதைக்கு திரும்பினார்கள். ராஜபக்சே குடும்பத்திற்கு எதிரான கோபத்தை மக்களின் போராட்டமாக ஒருங்கிணைத்ததுதான் இன்று அனுரா குமார் திஸநாயகாவை ஜனாதிபதி  ஆக்கியுள்ளது.

ஆனாலும் தமிழர்களுக்கு அவர்கள் மீது நம்பிக்கை வரவில்லை என்பதால்தான் அப்பகுதிகளில்  அனுராவிற்கு மூன்றாவது இடம் கிடைத்துள்ளது.

சிங்களர்கள், தமிழர்கள், இஸ்லாமியர்கள் என அனைவரிடத்திலும் ஒற்றுமையை உருவாக்குவதும் அனைருக்குமான வளமான எதிர்காலத்தை கட்டமைப்பதே புதிய அரசின்  இலக்கு என்று சொல்லியுள்ளார்.

மிகவும் சிறந்த சொல் செயல் என்பார்கள். எனவே சொல் செயல் வடிவம் காணட்டும்.

புதிய ஜனாதிபதிக்கு ஏராளமான சவால்கள் காத்திருக்கின்றன. இலங்கையின் பொருளாதாரம் மீட்கப்பட வேண்டும். சர்வதேச நிதி அமைப்பின் விதிகளுக்கு முந்தைய அரசுகள் செய்த சரணாகதிகள் இன்னும் ஒரு மிகப் பெரிய சவால். ஊழல் மலிந்து போன நாட்டில் அதனை கட்டுப்படுத்துவது ஆகப் பெரிய சவால்.  இந்த முடிவை விரும்பாத இந்தியா கொடுக்கப் போகும் சிக்கல்கள் எத்தனையோ?

இந்த சவால்களை சந்திக்கும் திறனை மக்களின் ஆதரவு என்ற ஆயுதம் கொடுக்கும்.

இந்த ஆட்சி சோஷலிச ஆட்சியாக மலரும் என்ற அதீத எதிர்பார்ப்பெல்லாம் எனக்கு கிடையாது. ஒரு மக்கள் நல ஆட்சியாக இருந்தாலே போதும்.

அந்த இலக்கை  நோக்கி ஆட்சி முன்னேறட்டும். இலங்கையின் இடதுசாரி துருப்பம் இனிதாக  அமையட்டும்.

தி.லட்டு - தானா மாட்டிக் கொள்ளுதா அமுல்?

 

திருப்பதி லட்டு சர்ச்சையில் தமிழ்நாட்டு நிறுவனம் ஒன்றின் மீதுதான் குற்றம் சுமத்தப்படுகிறது.

சந்திரபாபு நாயுடுவின் ஹெரிட்டேஜ் நிறுவனத்திற்கு திருப்பதி லட்டு செய்ய நெய் அனுப்பும் ஒப்பந்தம் கிடைப்பதற்காகத்தான் இந்த சர்ச்சை உருவாக்கப்பட்டது என்பதுதான் பெரும்பாலானவர்களின் சந்தேகம்.

குஜராத் ஆய்வக அறிக்கை என்பதால் அமுல் நிறுவனமும் லட்டுக்கு நெய் அனுப்பும் போட்டியில் உள்ளதா என்றொரு சந்தேகமும் எழுப்பப்பட்டுள்ளது.

இந்த சூழலில் அமுல் ஒரு அறிக்கை வெளியிட்டுள்ளது.

எங்க நெய்யெல்லாம் ரொம்ப தரமானது. ஆனா நாங்க திருப்பதி லட்டு செய்ய நெய் அனுப்பியதே இல்லை என்று சொல்லியுள்ளது அமுல்.

இது வரை அமுல் நெய் திருப்பதி லட்டுக்கு பயன்படுத்தப்படவில்லை என்பது எல்லோருக்கும் தெரியும். அதையே அறிக்கை விட்டது கூட சரி, அந்த அறிக்கையில் தங்கள் நெய்யின் நிறம், திடம், குணம், மணம் பற்றியெல்லாம்  த்ரீ ரோஸஸ்  விளம்பரம் போல சொல்ல வேண்டும்! இதுதான் அமுல் மீது சந்தேகத்தை எழுப்புகிறது.

பார்ப்போம் முதலமைச்சரின் நிறுவனமா? குஜராத் நிறுவனமா? லட்டுக்கு நெய் அனுப்பப் போவது யாரென்று! 

ஒரு லட்டு, எத்தனை "அம்மா"?

 

திருப்பதி லட்டு சர்ச்சை ஓடிக் கொண்டிருந்தது. சந்திரபாபு நாயுடு சொன்ன குற்றச்சாட்டு உண்மையா என்பது ஆய்வு செய்யப்பட்டு தவறு நடந்திருந்தால் தவறிழைத்தவர்கள் தண்டிக்கப்பட வேண்டும். குற்றச்சாட்டு பொய்யென்றால் சந்திரபாபு நாயுடு பதவி விலக வேண்டும்.

லட்டு பிரச்சினையை சங்கிகள் மாற்று மததவர்கள் மீது புழுதி வாரி தூற்றவும், கோயில்களில் முறைகேடுகள் செய்யும் உரிமைகள் தங்களுக்கே வேண்டும் என்பதற்காகவும் பயன்படுத்திக் கொண்டுள்ளார்கள்.

இதனை அரசியல் ஆதாயத்திற்காகவே சங்கிகள் பயன்படுத்துகின்றனர். மண்டையை மறைத்தாலும் கொண்டையை மறைக்காத முட்டாள்கள், அதனை அவ்வப்போது நிரூபித்து விடுகிறார்கள்.

கீழேயுள்ளது பல சங்கிகள் போட்ட ட்விட்டர் பதிவுகள்.

அதெப்படி அத்தனை பேரின் அம்மாக்களுக்கும் இரண்டு வருடமாகவே திருப்பதி லட்டு சாப்பிட்டால் உடம்பு சரியில்லாமல் போகிறது? அதெப்படி எல்லா அம்மாக்களும் ஒரே மாதிரி சுகாதாரத்தில் கருத்தாக நூறு ஆலோசனைகள் சொல்பவர்களாக இருக்கிறார்கள்?

ஏண்டா சொல்ற கதையை கொஞ்சம் கூட மாத்த மாட்டீங்களா?

அப்படியே ஈயடிச்சான் காப்பி. இதுதான் டூல்கிட்டா மோடி?

என்ன வழக்கமா சச்சின் டெண்டுல்கர், பி.வி.சிந்து, கௌதம் கம்பீர் போன்றவர்களை ட்வீட் போட வைப்பார்கள். அவர்கள் அதிர்ஷ்டவசமாக இப்போது தப்பியுள்ளார்கள். 

மக்களை விட டீலிங்கே மோடிக்கு முக்கியம்

பெல்ஜியம் தோழர் இ.பா.சிந்தன் அவர்களின் பதிவை பகிர்ந்து கொள்கிறேன். மோடி அரசின் மோசமான முடிவிற்கு என்ன காரணம் என்பதை கீழே சொல்கிறேன்.

 #UNResolution #Gaza #IndiaSupportGenocide

* காஸாவில் இஸ்ரேல் நடத்தும் தாக்குதலை உடனடியாக நிறுத்த வேண்டும்,

* பாலஸ்தீனப் பகுதிகளை இஸ்ரேல் ஆக்கிரமித்து வைத்திருப்பது சட்டவிரோதம்,

* பாலஸ்தீனப் பகுதியில் சட்டவிரோத யூதக் குடியிருப்புகளைக் கட்டியது தவறு,

* ஆக்கிரமித்துக் கட்டப்பட்ட சட்டவிரோதக் குடியிருப்புகளில் இருந்து உடனடியாக இஸ்ரேல் வெளியேற வேண்டும்

* இஸ்ரேல் ஆக்கிரமித்து வைத்திருக்கும் பகுதிகளை உலகின் எந்த நாடும் அங்கீகரிக்கக் கூடாது,

* ஐநா சபையும் இஸ்ரேலின் இந்த ஆக்கிரமிப்புப் பகுதிகளை அங்கீகரிக்கக் கூடாது,

* இஸ்ரேலிய யூத ஆக்கிரமிப்பாளர்கள் செய்யும் அட்டூழியங்களைக் கட்டுப்பாட்டில் கொண்டுவருவது இஸ்ரேலின் கடமை,

* கிழக்கு ஜெருசலேம் முழுவதும் பாலஸ்தீனப் பகுதியாக இஸ்ரேல் ஏற்றுக்கொள்ள வேண்டும்,

* காஸாவில் இஸ்ரேல் ஏற்படுத்திய அனைத்து இழப்புக்கும் இழப்பீடு வழங்க வேண்டும்,

* பாலஸ்தீனத்தை இவ்வளவு ஆண்டுகளாக ஆக்கிரமித்து வைத்திருப்பதால் அம்மக்களுக்கு ஏற்பட்ட இழப்பிற்கு ஈடு செய்ய வேண்டும்

* இஸ்ரேலுக்கு உலக நாடுகள் அனைத்தும் பொருளாதார தடை விதிப்பது குறித்து யோசிக்க வேண்டும்

உள்ளிட்ட ஏராளமான கோரிக்கைகளையும் கட்டளைகளையும் முன்வைத்து ஐநா சபையின் பொதுசபையில் கடந்த வாரம் (13, செப்டம்பர், 2024) அன்று ஒரு தீர்மானம் கொண்டுவரப்பட்டது.

124 நாடுகள் இத்தீர்மானத்திற்கு ஆதரவாக வாக்களித்ததால் இத்தீர்மானம் பெருவாரியான வாக்குவித்தியாசத்தில் வெற்றிபெற்றது. இது ஐநாவின் பொதுசபையில் நிறைவேற்றப்பட்டதால், இஸ்ரேலைக் கட்டாயப்படுத்த முடியாது. ஆனால், உலகின் பெரும்பாலான நாடுகள் பாலஸ்தீனர்களுக்கும் பாலஸ்தீனத்திற்கும் ஆதரவாக இருக்கின்றன என்பது மிகமுக்கியமாக கவனிக்கப்பட வேண்டியதாகும். அமெரிக்காவுகு வீட்டோ அதிகாரம் மட்டும் இல்லையென்றால், இதே சட்டத்தை ஐநாவின் மனித உரிமை ஆணையத்திலும் நிறைவேற்றி இஸ்ரேலை கதிகலங்க வைக்கலாம். ஆனால், அமெரிக்கா என்கிற ஒற்றை நாடு இதற்கு தடையாக இருக்கிறது.

சரி, நம் கதைக்கு வருவோம். பாலஸ்தீனர்களுக்கு ஆதரவாக வாக்களித்த அந்த 124 நாடுகளில் இந்தியாவும் இருக்கிறதா? என்றால்...

இல்லை.

இஸ்ரேலுக்கு எதிரான இந்த தீர்மானத்தில் வாக்களிக்க முடியாது என்று சொல்லி, வாக்கெடுப்பில் இருந்து இந்தியா வெளியேறிவிட்டது.

அதாவது இலட்சக்கணக்கான அப்பாவி மக்கள் பாலஸ்தீனத்தில் கொல்லப்படுவதை இந்த படுமோசமான பாசிச இந்திய அரசு வெளிப்படையாகவே ஆதரித்திருக்கிறது என்பது எவ்வளவு பெரிய வேதனை…

#NotOnMyName #NotOnMyTaxMoney #பாலஸ்தீனம்_என்ன_செய்ய_முடியும்_நம்மால்

இஸ்ரேல் அரசோடு ஆயுத விற்பனை உட்படஏராளமான டீலிங்குகளை செய்துள்ளார் மோடி. எதிர்க்கட்சிகளை உளவு பார்க்கும் பெகாஸஸ் மென் பொருள் கூட இஸ்ரேல் அளித்தது.

பாலஸ்தீனர்களின் இன்னல்களை விட இஸ்ரேலுடன் செய்து கொண்டுள்ள டீலிங்குகள்தான் முக்கியம் . . .

தலைமை நீதிபதி தவிர்த்திருக்க வேண்டும்.

 

தலைமை நீதிபதி சந்திரசூட்டின் வீட்டில் நடந்த வினாயகர் சதுர்த்தி விழாவில் மோடி கலந்து கொண்டது சர்ச்சையாகி உள்ளது.

 

தலைமை நீதிபதி வினாயகர் சதுர்த்தி கொண்டாடியதை யாரும் குறை சொல்ல முடியாது. அது விவாதத்திற்கு அப்பாற்பட்ட ஒன்று. இந்திய அரசியல் சாசனம் வழங்கியுள்ள வழிபாட்டு உரிமையின் படி வினாயகர் சதுர்த்தி கொண்டாடுவதற்கான உரிமை அவருக்கு உண்டு.

 சர்ச்சை மோடியின் பங்கேற்புதான்.

 மோடி அங்கே சென்றதும்  சட்டப்பேரவை  தேர்தல் நடைபெறவுள்ள மகாராஷ்டிரா மாநிலத்தில் உள்ள மக்கள் பயன்படுத்துகிற தொப்பியை அங்கே அணிந்து கொண்டதும் அரசியல் உள் நோக்கமுடையது.

 இந்திய ஜனநாயகத்தின் தூண்களில் ஒன்றான நீதித்துறையின் உச்சபட்ச பொறுப்பில் உள்ள ஒருவர், தன் வீட்டில் நடைபெறும் மத வழிபாட்டில் மதத்தை வைத்து அரசியல் செய்யும் ஒருவர் பங்கேற்பதை தவிர்த்திருக்க வேண்டும்.

 சந்திரசூட்டின் அழைப்பில் மோடி சென்றாரா இல்லை அழையா விருந்தாளியாக சென்றாரா?

 சர்ச்சை எழுந்த போதும் இருவரும் இது பற்றி பேசவே இல்லை. சந்திரசூட் அழைத்திருந்தார், அதனால்தான் சென்றேன் என்று மோடி சொல்லி இருப்பார். அப்படி அழைத்திருந்தால் என் அழைப்பின் பேரில்தான் மோடி வந்தார் என்று சந்திரசூடாவது சொல்லியிருப்பார். ஆனால் இருவருமே மௌனமாக இருப்பதால் மோடி அழையா விருந்தாளியாகத்தான் சென்றிருப்பார் என்று தோன்றுகிறது.

 தலைமை நீதிபதி வீட்டில் மோடி கலந்து கொண்ட புகைப்படங்களை சங்கிகள் வெளியிட்டு மத நம்பிக்கையை உயர்த்திப் பிடிக்கும்  தலைமை நீதிபதி என்று செய்தியை பரப்பினார்கள்.  அது தலைமை நீதிபதிக்கு ஒரு களங்கம்தான்.

 சர்ச்சை உருவானதும் “நான் வினாயகர் சதுர்த்தி விழாவை கொண்டாடியதை பிரச்சினை செய்கிறார்கள், குறை கூறுகிறார்கள்” என்று மோடி எதிர்க்கட்சிகள் மீது கீழ்த்தரமான தாக்குதலை தொடங்கினார்.

 “உச்ச நீதிமன்ற தலைமை நீதிபதி வீட்டில்” என்று மட்டும் சொல்லவில்லை. பிரச்சினையை திசை திருப்பும் கீழ்த்தரமான உத்தி அஇது.

 இப்படிப்பட்ட சர்ச்சைகள் உருவாவதை தலைமை நீதிபதி தவிர்த்திருக்க வேண்டும்.